Iilonga yokutunga oondama mOshana ya kalekwa

Elelo lyoshitopolwa shaShana olya kaleke iilonga yokutunga oondama dhomeya miikandjohogololo 11 moshitopolwa shawo sha landula uupyakadhi wopaungomba mboka taku hokololwa wa holoka po pethimbo lyokugandja ootendela.

Oshitopolwa shaShana osha tokola okutungitha ondama kehe moshikandjohololo opo yi kale nokutegeka omeya gomvula nelalakano lyokukondjitha enota moshitopolwa.

Elelo lyoshitopolwa shoka olya pewa oshimaliwa shoomiliyona N$15 kUuministili wUunamapya nUuniimuna, Omeya nEtendululo lyEvi opo ku tungwe oondama dhomeya miikandjohogololo, noondama ndhoka odha odhekelwa wo okukwata omeya gefundja ndyoka hali kala ko omathimbo gamwe monooli yoshilongo okuza koAngola.

Omukuluntuwiliki gwoshitopolwa shoka, Teopolina Hamutumwa okwa popi kutya moshimaliwa shotungitha oondama omwa kwatelwa wo okufula oondama ndhoak dha filala, okutunga oondama oompe osho wo okuninga nawa oondama unene tuu pomahala ngoka haga dhengwa olundji kefundja.

“Otendela yoondama dhi li hamano okwa oya pitithwa petameko lyomumvo nguka opo ku tamekwe niilonga yokutunga oondama nokwopaleka dhilwe, ashike, otwe yi kaleke mbala sho ta nongele kutya opu na epuko lyopaungomba. Iinima ayihe oya adhika ya pwa, notwa li nokuli pokutseyitha ngoka ta pewa otendela, ashike otwe shi kaleke omolwuupyakadhi wopaungomba wa nongelwa omulandu gwegandjo lyootendela. Oshikumungu shoka otwe shi gandja momake gokomisi yokukondjitha uulingilingi moshilongo opo ku ningwe omakonakono,” osho a popi ngaaka.

Hamutumwa okwa popi kutya otendela ndjoka oya kalekwa omolwiilonga inaayu uka mbyoka ya longwa pethimbo lyokutotha mo ngoka ta pewa otendela ndjoka.

“Otatu ka gandja ootendela dhoondama oonkwawo ntano manga omwedhi nguka inaagu hula, molwashoka otwa hala okutameka niilonga yokutunga nokwoopaleka oondama manga omumvo nguka inaagu hula. Otatu tsikile nokulandula oshinima shoka [shaali pauyuuki sha longwa], itatu yi komeho netungo lyoondama ndhoka manga oshikumungu shoka inaashi yelekwa,” osho a popi ngaaka.

Kansela gUukwiyushona, Andreas Amundjindi okwa popi kutya elelo lyoshitopolwa nali manithe oshikumungu shoka, molwashoka ekateko otali yi moshipala ooprojeka dhomapendulopo goshitopolwa.

“Oondama dhomeya nadhi tungwe manga omvula inaayi tameka okuloka, ishewe naye tu lombwele oshili kutya omolwashike iilonga yokutunga oondama ya kalekwa,” osho a popi ngaaka.

Uuministili wuunamapya nuuniimuna owe shi pondola okugongela oshimaliwa shi li poomiliyona N$98 okutunga nokwoopaleka oondama dhomeya miikandjohogololo ya yooloka miitopolwa yomonooli yoshilongo.

Iitopolwa mbyoka oya kwatela mo shaShikoto, shaMusati, shaHangwena, shaShikoto, shaKavango Uuzulo osho wo shaKavango Uuninginino.

Ompumbwe yomeya onkene yi li pombanda miitopolwa yomonooli yoshilongo, omasiku ga zi ko onzonkundaneki ndjika oya lopota kombinga yonkalo yoshikukuta ndjoka ya nayipaleka nokwe eta enota moshitopolwa shaShikoto omolwomuloka gwa nkundipala numvo.

Ngoloneya gwoshitopolwa shaShikoto, Penda ya Ndakolo okwa popi kutya aakalimo oyendji oya gumwa koshikukuta – unene tuu aaniimuna.

“Onkene, otwa pumbwa okuninga po omalongekidho taga pumbiwa okuhupitha iimuna. Itashi holekwa kutya oshitopolwa shetu onkene sha taalelwa komashongo gompumbwe yomeya, unene tuu momikunda ndhoka dhi li kokule, hoka oshimoko hashi nyengwa okuthikitha ko omeya, nenge komikunda ndhoka dhi na omeya goshimongwa. Onkalo ya yaga kegonga ndjoka tuna ngashingeyi oya gwedhele owala uupyakadhi womeya mboka twa kala twa taalela nale,” osho a popi ngaaka.