Omulandu gwegandjo lyootendela otagu tula oomwenyo dhaantu moshiponga – Shangula

Minista guundjolowele nomayakulo gonkalonawa Kalumbi Shangula okwa popi kutya omulandu ngoka tagu longithwa mongashingeyi okulanda iikwamiti yepangelo otagu ndopa okugwanitha po omalalakano gaashoka shi na okulongwa molwashoka otagu shongola naashoka osha tulitha moshiponga oonkalo dhuundjolowele wAanamibia.

Minista oshiwike sha zi ko okwa popi tati: “Omulandu gwokulanda iikwamiti itagu longo nawa. Onkene ngele omulandu itagu eta iizemo yaashoka gwa totelwa po nena osha pumbiwa ku ningwe oonkambadhala dhilwe. Kutse, uundjolowele noomwenyo dhAanamibia osho oshinima sha simana ishewe inashi pumbwa okwiikundwa.”

Shangula okwa popi kutya uuministili owa kala ethimbo nuule wa tega ootendela dhi manithwe kolaata yokugandja ootendela dhapangelo yedhina Central Procurement Board of Namibia (CPBN), opo omiti dhi landwe. “Shoka oshe etitha ompumbwe onene yomiti miipangelo,” osho a popi ngaaka.

Shangula ndhoka okwe dhi popi sha landula sho otendela yiikwamiti, ya kalekwa. MEtitatu lya zi ko, omupanguli gwompangu yopombanda Shafimana Ueitele okwa gandja etokolo lyokukaleka otendela yiikwamiti sha landula eindilo ndyoka omunangeshefa Shapwa Kanyama a gandja kompangu omasiku ga zi ko, okupitila mehangano lye lyedhina Africure Pharmaceutical, opo egandjo lyotendela kehangano lyedhina Cospharm, li kalekwe.

Ehangano ndyoka lyo-Cospharm olyo limwe yomomahangano ogendji ngoka kwa li ga ningi omaindilo gotendela yokugandja iikwamiti ashike eindilo lyawo okwa li lya tindwa omolwomapuko ngoka ga li mo notendela ndjoka oya topolelwa po omahangano galwe.

Lwanima, Cospharm okwa ningulula eindilo ndyoka lye etitha a pewe otendela yoobiliyona N$1,3, naashoka oshe eta omahangano ngoka kwa li ga pewa motendela ndjoka ga gumwe sho ondando ya tetwa nokushunitha pevi.

Ehangano lyaKanyama, olyo limwe lyomomahangano ngoka ga tetulwa oshimaliwa, sha landula sho Cospharm a pewa otendela.

Shoka oshe eta Kanyama a fale olaata yokugandja ootendela kokangundukonakoni, opo ku taliwe ngele Cospharm okwa pewa ngaa shili otendela ndjoka pamulandu.

Okangundukonakoni hoka oka talulula ashike oka gandja oshizemo kutya kapu na shoka sha puka nonkene Cospharm na pule owala komeho notendela ndjoka.

Shoka oshe eta Kanyama a ye kompangu, ndjoka lwanima ya mono kutya olaata yokugandja ootendela kaya li yi na okugandja otendela momake gaCospharm omanga kwi ipyakidhilwa nomakonakono gegandjo lyotendela ndjoka.

Ueitele oshiwike sha zi ko okwa gandja elombwelo opo ku kalekwe manga egandjo lyotendela ndjoka ya pewa ehangano lyoCospharm omanga etalululo tali ningwa.

Shoka otashi ulike kutya otendela ndjoka yomiti dhomiipangelo yepangelo onkene yi li natango othika.

Olaata yokugandja ootendela dhepangelo otaku hokololwa kutya inayi gandja natango otendela yonomola G/OAB/CPBN-02/2022 yokugandja iikwamiti, sha landula sho omunangeshefa Helena Figura, mwene gwehangano lyedhina Taliindje Investment, a katukile olaata, onkatu yopaveta.

Omupopiliko gwo-CPBN, Johanna Kambala okwa koleke kutya otendela ndjoka onkene yi li momake gomakonakono gompangu.
MuAuguste, onzonkundaneki ndjika oya kundaneke kombinga oshipangelo shaKatima Mulilo sha taalelwa kompumbwe onene yomiti.

Omukuluntuwiliki gwolaata, Amon Ngavetene, okwa popi kutya efalo kompangu lyiikumungu yegandjo lyootendela olyo tali shongolitha etulo miilonga lyootendela.