Omuleli gwongundu yopapolitika yedhina Body of Christ (BCP), Festus Thomas, okwa popi kutya omalelo gopamuthigululwakalo otaga tongola oongeleka dhiiveva, sho taga tindi okugandja evi koongeleka dholudhi ndoka.
“Elalakano lyoshigongi shetu okwi ithana oongeleka dhomoNamibia ndhoka kaadhi na evi, dhi thikame dho dhi indile opo okatongo kegandjo lyevi ka hulithwepo, ku hulithwepo oluhepo, okwaathikepamwe osho wo etidhagano lyoongeleka,” osho Thomas a popi ngaaka moshigongi shoka sha ningilwa mEenhana oshiwike sha zi ko.
“Otushi uvite ko kutya moNamibia kamu na evi lyookuku, ashike, omalelo gopamuthigululwakalo moshilongo otage tu tongola kombinga yevi. Evi olyAanamibia ayehe ashike Aanamibia yamwe onkene taya shundulwa, ya tongolwa ko, nokuningwa aapika kaantu yawo. Otatu ningwa nayi nokumbandamekwa kepangelo. . . uuna twa ningi omaindilo gevi,” osho Thomas a popi ngaaka.
Poshigongi osho tuu shoka, iilyo nenge aayambidhidhi yoBCP oya popi kutya mwene gwomukunda okwa tongola mboka ye li moongeleka dhoshiveva, opo kaaya pewe evi.
“Inaya hala oku tu pa evi sho yu uvu kutya otuli moongeleka dhoshiveva. Oya hala tu kale peni? Otwa pumbwa omagumbo nomapya gokulonga. Eitaalo noongeleka ndhoka twa hogolola inadhi longithwa ongomatompelo gokuyugwa uuthemba wetu wokupewa evi moshilongo shetu,” osho oshilyo sho PCP, Sylvia Paulus, a popi ngaaka.
Omusita Toivo Omwene gwomomukunda Onambalati moshitopolwa shaHangwena okwa popi kutya ooyene yomikunda ohaya ningile ongeleka naakwanegongalo ye omatilitho uuna ya pula evi.
“Mwene gwomukunda okwe tu pula tu ninge eindilo lyopambelewa lyevi, naashoka otwe shi ninga. Okwa li wo i indile tu pewe eindilo lyopambelewa okuza kukansela gwoshikandjohogololo, ngoka e tu yamukula kutya ombelewa ye hayo yi na oshinakugwanithwa shokugandja nenge okulanditha evi. Okuza mpoka, otwa kala owala tatu ningwa iihelele, namwene gwomukunda okwe shi ninga oshidhigu okugongalela momukunda nongeleka yetu,” osho Omwene a popi ngaaka.
Sho a kwatathana naye, mwene gwomukunda Nikodemus Kambode okwa tindi okutya ko sha nokwa popi kutya iha popi naantu moongodhi dhopeke.
Elenga lyopamuthigululwakalo mEenhana Ephraim Weyulu okwa koleke kutya elelo lyopamuthigululwakalo oli na oshikumungu noongeleka ndhoka taku hokololwa hadhi eta evundakano moshigwana.
“Ngele oye shi kutya itaya eta evundakano naye shi yeleke opo tu kale tushi kutya oyo oye li ngiini. Ishewe, opu na omilandu dhi li po. Omagumbo ngashingeyi oga topolwa omolwoongeleka. Oshilongo shika osha taamba ko oongeleka adhihe ashike opu na omikalo ndhoka hatu kala twa tegelela oongeleka dhi ihumbate,” osho Weyulu a popi ngaaka.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
