Omambo gaanasikola ga lika po koongombe

Omulongi gwoposikola yedhina Otatashe Primary School moshikandjolongo shaNkumbula moshitopolwa shaShikoto okwa thigwa i ikwata ombandamutse oshiwike sha zi ko konima sho oongombe dhi iteyele mongulusikola ye nokuhanagula osho wo okulya po omambo ngoka ga li mo.

Ongulusikola ye oya nika iipa yombwa molwashoka oya dhikwa niiti, nopombanda opo owala pu na iipeleki.

Omambo ngoka ga lika po koongombe dhopomukunda oga kwatela mo embo lye lyokundhindhilika iintsa yaanasikola, omambo giithigilwalonga yaanona, osho wo omalongithwambo.

“Ngashingeyi onda thaneka oku ka ninga embo epe lyokundhindhilikwa iintsa yaanona, opo ndi tamekulule ko. Ashike uupyakadhi uunene oomboka kutya kandi shi we mpoka tandi ka adha iintsa yaanasikola, molwashoka omambo gamwe gaanasikola nago oga lika po koongombe,” osho, Saara Shipena, omulongi gwondondo 2 no3 a popi ngaaka.

Okwa hokolola kutya oongombe odha panuna ongulusikola nokwi iteyela mo nodha tameke okulya omambo osho wo iikwambapila yilwe yosikola, naashoka osha ningwa komatango gEtitatu lya zi ko konima sho osikola ya piti mo.

Moonkundathana noThe Nmaibian, Shipena okwa popi kutya osikola yawo oyi na oongulusikola tadhi etitha ohenda.

“Ngohela onda thigi omambo poshitaafula manga oshiningwanima shoka inaashi ningwa, nongulusikola okwa li nokuli ndeyi thigi ya pata. Esiku lya landula sho ndeya kiilonga, onda adha aanona taya opaleke mo, nonda dhimbulula kutya nembo lyandje lyokundhindhilika iintsa yaanasikola olya tuulwa po, omalongithwambo osho wo omambo giinyangadhalwa yaanona nago oga hanagulwapo,” osho Shipena a hokolola ngaaka.

“Onda tameke okulongela mpaka mo2019, ashike onkalo inayi lunduluka sha posikola ngele otashi ya koongulusikola osho wo konkalo yompumbwe yomeya. Okwa li twa ningi oonkambadhala dhokukonga omakwatho opo tu tungilwe oongulusikola, ashike maanangeshefa mboka twa pula kapu na nande gumwe e tu pupu,” osho a popi ngakaa.

Shipena okwa popi kutya omudhingoloko gwelongo posikola yawo kagu li nande pondondo yi li nawa.
Okwa popi kutya okuwete epangelo lye ekelahi osikola yawo.

“Ohatu longele moongulusikola dhiiti, niinima yetu aluhe ohayi kala owala moshiponga shokuyonagulwapo koongombe. Oshinima shoka kashi li nande nawa. Ohandi longo ondondo 2 no3 nohandi dhi longele mumwe, dhi na aanona 28. Paushili, tse epangelo ihali tu tala. Otashi uvitha nayi,” osho a popi ngaaka.

Shipena okwa gwedha po kutya oye li mompumbwe onene yoongulusikola dhiipeleki opo ashike onkalo tayi hwepopala.

“Pethimbo lyomuloka ohatu nana nondatu noonkondo. Omeya ohaga kala owala taga tondoka moongulusikola, nohatu thiminikwa konkalo opo tu kaleke manga ootundi sigo omvula ya sheka. Oondje nomayoka iinima hambala yesiku kehe. Oongulu kadhina olupanda lwosamende. Pethimbo lyokufu, ohaku kala kwa talala noonkondo, naanona ohaya kala owala taya kakama, onkene otwa pumbwa ekwatho lela,” osho a popi ngaaka.

Nonande ehangano lyaNamWater ohali kambadhala ngaa okufala posikola ndjoka ootenga dhomeya osho wo komikunda dhopopepi, onkene aakalimo taya lili enota.

Shipena okwa popi kutya osikola yawo oyi na opolohalama yokugandja iikulya kaanasikola, ashike nando ongaaka aanasikola ihaya pewa iikulya mbyoka molwashoka ihapu kala omeya gokutelekitha.

Omukuluntusikola gwOtatashe Primary School, omusamane David Mushelenga okwa popi kutya Shipena ina thikitha nande omanyenyeto ge kombelewa ye.

“Otandi kwatathana naye opo ndi mu pule kutya oshe ende ngiini, ashike mongashingeyi opo tandi uvu ehokololo ndyoka [lyomambo ga lika po koongombe],” osho a popi ngaaka, mEtine.

Mushelenga okwa koleke kutya onkalo yomeya posikola oyi li eshongo enene ishewe kapu na elunduluko lya sha.
“Uuna NamWater e eta omeya komikunda nootenga, opo owala hatu mono omeya,” osho a popi ngaaka.

Osikola ndjoka oyi na aanasikola ye li 118 naalongi yaheyali. Petameko lyomumvo nguka, onzonkundaneki ndjika oya kundaneke kombinga yUuministili wElongo, Uunkulungu nOmithigululwakalo wu li mompumbwe yoongulusikola 2 837 moshilongo ashihe opo owala ku yapukilwe ompumbwe yomahala poosikola.

Uuministili owa popi kutya ompumbwe yi li pombanda yoongulusikola otayi etwa komwaalu gwaanona mboka taya taambwa omumvo kehe, tagu indjipala.

Pauyelele mboka wu li komulandu gomauyelele gelongo, moosikola dhi li moNamibia omu na aanasikola ye li 839 579.
Omukuluntuwiliki gwoshikondo shelongo moshitopolwa shaShikoto, Aletta Eises, okwa popi kutya ota kwatathana nomutalelishikandjo gwelongo opo a pewe uuyelele wonkalo yosikola ndjoka yaTatashe.

Ashike nando ongaaka okwa popi kutya ngele osikola ndjoka okwa monika kutya kayi na ompito yokukala aanona oyendji nena itayi vulu okutungilwa po oongulusikola tadhi kalelele.

MEtiyali pethimbo ta gandja oshipopiwa she shontengenekwathaneko yoshimaliwa yopokati komumvo, minista gwiimaliwa nomahangano gepangelo, Iipumbu Shiimi okwa tseyitha kutya Uuministili wElongo, Uunkulungulu nOmithigululwakalo owa pewa oshimaliwa sha gwedhwa po shoomiliyona N$129 “okweendeleleka omatungo goongulusikola moshilongo”.

Omupopiliko gUuministili wUunamapya nUuniimuna, Omeya nEtendululo lyEvi, Jona Musheko, okwa popi kutya uuministili wawo, melongelokumwe noshikethahangano shomidhingoloko shedhina Environmental Investment Fund, owi ipyakidhila nokutulitha moshitopolwa shaShikoto uushina wokukutha omeya oshimongwa.

“Shoka otashi ningwa momikunda dhi li hamano. Oprojeka ndjoka oya kwatelwa komeho ko-Environmental Investment Fund, niilonga otayi pula komeho nawa,” osho a popi ngaaka.