‘Oshili oshi li megulu’

Omwana gwanakusa Hidipo Hamutenya, Kennedy Hamutenya okwa popi kutya he osho wo Axali Doëseb ‘mboka ye li megulu’ otaya vulu okupopya oshili kombinga yaangoka a tota po eimbilo lyopashigwama.

Kennedy ndhoka okwe dhi popi pethimbo ta ti ko sha kombinga yoompata ndhoka dhi li moshilongo ngashingeyi kombinga yomutoti gweimbilo lyopashigwana, sho mongashingeyi pu na yamwe taya popi kutya olya totwa po kuHidipo omanga yamwe otaya popi kutya olya totwa po kuDoëseb.

“Kakele kwaamboka yaali, ayehe mboka ya li po pethimbo ndyoka, ngaashi oominista, oye shi ontontwaveta ndjoka ya pitithwa noye na oku tu kwatela komeho kombinga yoshinima shoka,” osho Hamutenya a lombwele onzonkundaneki ndjika ngaaka.

Oompata dhaangoka a totapo eimbilo lyopashigwana odha tukuka konima sho kwa tseyithwa kutya Doëseb ota pewa efumviko lyopapangelo.

Moonkundathana dha hugunina noThe Namibian, Doëseb, okwa popi kutya omaimbilo ashike gaali ngoka kwa li geshi pondola okuya monkatu ya hugunina, mu hogololwe ndyoka tali sindana lyo li ningwe eimbilo lyopashigwana.

Okwa popi kutya omaimbilo ngoka, limwe olye nekwawo okwa li lyaErnst van Biljon.

Okwa popi kutya omapopyo kutya Hidipo Hamutenya oye a shanga iitya yeimbilo lyopashigwana, kageshi goshili.

“Kehe omutoti gweimbilo muuyuni oteku lombwele kutya itashi vulika wu tote eimbilo niitya yomuntu gulwe,” osho Doëseb a popi ngaaka.

Oompata kombinga yaangoka a tota po eimbilo lyopashigwana okwa li wo dha hwahwamekwa kuminista gwombelewa yomupresitente Christine //Hoëbes, ngoka a popi kutya Doëseb haye awike e na okupewa etumba metotepo lyeimbilo lyopashigwana.

Joseph Diescho, moonkundathana noshifonkundaneki shomoshilongo okwa popi kutya nakusa Doëseb ke na euveko li ihwa po kombinga yemanguluko lyoshilongo, opo a kale oye awike omushangi gweimbilo lyopashigwana.

“Ongalo ndjoka kaya li okwasa kwasa opo yi kale owala ya ningwa komuhikingalo gumwe pwaana omagwedhelopo gaantu mboka ya li mekondjelomanguluko noye na euveko,” osho Diescho a popi ngaaka.

Ngoka wo a gandja omaiyuvo ge, ominista omukulu gwomayelithilo nomakwatathano gopaungomba Joel Kaapanda, ngoka a zimine kutya eimbilo lyopashigwana inali totwa po nokushangwa komuntu gumwe, ashike osha ningwa kongundu yaantu.

“Omukwelengendjo ogwa ningwa kuDoëseb ashike iitya oya totwa po kaantu yalwe mboka ya li mokomitiye, ndjoka kwa li ya kwatelwa komeho kunakusa Hidipo Hamutenya,” osho Kaapanda a lombwele oThe Namibian ngaaka.

Kaapanda okwa popi kutya nakusa Hamutenya oye a dhana onkandangala onene mokwe eta po iitya yeimbilo lyopashigwana.

“Omuntu okuna okukala e na ontseyo lela opo kuningwe iitya mbyoka, tayi ulike muule wekondjelomanguluko. [Aatoti]Oye na okukala ya li oshitopolwa shekondjelomanguluko,” osho a gwedhapo ngaaka.

Okwa popi kutya nakusa Doëseb kali kombanda mekondjelomanguluko molwashoka okwa li owala meni lyoshilongo.

Doëseb okwa pewa efumviko lyopapangelo komupresitente Hage Geingob sho a longo “oshilonga sha simana” moshigwana.

Momukanda gwe ngoka gwa pitithwa oshiwike sha zi ko, Geingob okwa koleke kutya Doëseb haye awike omutotipo gweimbilo lyopashigwana, ashike oye gumwe gwomaamboka ye li toto po, nedhanonkandangala lye otali kala nokudhimbulukiwa.

Oshilyo shegumbo lyopashigwana, Dudu Murorua, mEtiyali okwa pula kutya omolwashike sha kala sha holekwa kutya Hidipo oye a dhanga eimbilo lyopashigwana.

“Omambo gondjokonona otaga popi eimbilo lyopashigwana lya totwa po kuAxali, ndele omolwashike inaashi tumbulwa nande mondjokonona yopapolitika yaHamutenya?” osho oshilyo shongundu yo-United Democratic Front, a pula ngaaka.

Epulo ndyoka olya gandjwa komuprimaminista Saara Kuugongelwa-Amadhila, ngoka i ikanyuna nokulombwela omutumba kutya ayihe kombinga yeimbilo lyopashigwana oyi li mOveta 17 yOmandhindhiliko gOpashigwana yo2018.

Doëseb okwa mana oondjenda momasiku 27 Kotoba, mepipi lyomimvo 69 nokwa fumvikwa mOlyomakaya pomawendo gaPioneerspark, mOvenduka.