Aakwashigwana taya ihakana okushangitha uukalata woongodhi

SHO esiku lya hugunina lyokushangitha uukalata womoongodhi tali thiki popepi, aakwashigwana oyendji moshilongo otaya mbombolokele kiitayi yomahangano gomakwatakanitho goongodhi dhopeke opo ya shaningithe uukalata wawo.

Esiku lya hugunina lyokushaningitha uukalata o31 Desemba, noyendji otaya kwata ondjuhwa komulungu okukawaimina omikweyo piitayi yomahangankwatakanithi goongodhi opo ya shilipaleke kutya uukalata wawo inawu tetwa mo mombepo.

Ashike nando ongaaka, onkene oshigwana tashi indile opo omasiku ga gwedhelwe molwashoka esiku lya hugunina olya thika ashike onkene ondumba yaantu inaayi shangitha natango uukalata wawo, omanga kombinga onkwawo oombaanga odhi na eikwato pomutima kutya ngele uukalata woongodhi owa tetwa mombepo muJanuali ngaashi sha thanekwa otashi ka guma nayi ookastoma ndhoka ngashingeyi olundji hadhi longitha oongodhi okutuminathana oshimaliwa.

Ngele okakalata okatetwa mombepo nena otashi vulika omuntu ngoka a kanithe thilu onomola ye yongodhi, yo yi ka gandjwe po komuntu gulwe monakuyiwa.

Uuministili womauyelele, oshikondowiliki shomakwatathano moshilongo shedhina Communications Regulatory Authority of Namibia (Cran) osho wo omahanganokwatakanithi goongodhi lyoMTC naTelecom otaya ningi oshigongi shiikundaneki nena opo ya gandje omauyelele koshigwana kombinga yaampoka ya thikama moshinima shoka shokushangitha uukalata woongodhi.

Omukuluntuwiliki guuministili womauyelele Audrin Mathe uunambo okwa talelepo omahala gaali mpoka tapu ishangithwa uukalata moshilandopangelo opo i italeleko yemwene kombinga yonkalo yomaishangitho ngoka osho wo okupulakena omakemo goshigwana kombinga yomaishangitho ngoka.

Omulandu ngoka gwomaishangitho ogwa tamekele muJanuali numvo, sha landula sho omumvo gwa zi ko epangelo lya pititha oveta yokushangitha uukalata woongodhi moshilongo opo shi hwepopeke onkalo yokukondjitha iimbuluma mbyoka tayi longithwa okupitila momakwatathano goongodhi.

AAKALIMO YOKOMIKUNDA

Onkalo yokushangitha uukalata oya guma kehe gumwe, ashike mboka ye li komikunda otaya nyenyeta noonkondo omolwiinano okuthika koondolopa nenge pomahala mpoka tapu ishangithilwa.

Aakalimo yokomikunda moshitopolwa shaZambezi mboka ya popi nonzonkundaneki ndjoka oya nyenyeta kurya otaya nana nondatu okumona oshimaliwa sholefa, nokuli yamwe oya popi kutya kaye na shoka taya vulu okuninga po onkene otaya etha owala uukalata wawo wu tetwe mombepo.

“Ohatu uvu owala kutya oya li komikunda dhilwe ya ka shangitha aantu, ashike aanambelewa mboka yoMTC komikunda dhetu ndhoka dhi li kokule ihaya thiki ko. Ishewe ngame kandina nande oshimaliwa shokuya koKatima Mulilo ndi ka shangitha okakalata kandje, ondiwete kutya onomala yandje yongodhi ondi na oku yi kanitha,” osho Innocent Simataa gwomomukunda Mbalasinte a popi ngaaka.

Mwene gwomukunda Linyati, omusamane Michael Tiyeho, okwa lombwele oThe Namibian kutya aakalimo oyendji yomukunda gwe inaya shangitha natango uukalata wawo molwashoka ehangano lyaMTC okwa li owala lye ya mo esiku limwe momukunda gwawo.

“Aakalimo yamwe inaya vula okwiishangitha sho aanambelewa yoMTC ya li huka molwashoka okwa li ku udha noonkondo, omanga yamwe inaya vula okuthika molwashoka ohaya zi kokule. Aanamikunda oyendji oya sholola, molwashoka sho kwa li ya yi kondolopa inaya kwathelwa. Shoka tashi kwathele ngashingeyi okugwedhela owala omasiku gokwiishangitha osho wo ehangano lyaMTC li ye komikunda uule woshiwike, molwashoka omukunda gwetu omunene,” osho
Engungo lyaakalimo yomEenhana moshitopolwa shaHangwena mboka ya li poshitayi shoMTC uunambo, oya holola okwaauvanawa kombinga yomikweyo omile osho wo omulandu gwokushangitha uukalata ngoka tagu shongola. Oya popi kutya ohaya meneka lwopotundi 04h00 ashike sho tashi ka thika po06h00 omukweyo omule nale noonkondo.

“Shika osho oshikando oshitiyali tandiya koMTC nohandi shuna owala, molwashoka oho iyadha wu li kokule natango momukweyo potundi 17h00 sho taya pata. Opu na owala aaniilonga yatatu mboka taya kwathele engungo lyaantu. Ohatu kala momutenya notashi uvitha nayi,” osho omukalimo gwomOndobe, Johannes Fillemon, a popi ngaaka.

Cecilia Matengu ngoka a li poMTC yomoKatima Mulilo okwa popi tati okwa menekele ko potundi 05h00 netegameno kutya oye ta kala gwotango.

“Ashike nando ongaaka, kehe ethimbo tandi thiki mpaka, ondi na okwa adha po aantu ya konda po50, omolwokwaana nkene ondina owala okwi idhidhimikila momukweyo ngoka. Ashike nando ongaaka esiku ohali hulu owala inandi adha nopomweelo gwokuya moMTC,” osho a popi ngaaka.

Ashike nando ongaaka, omukumo opo gu li kutya otashi vulika omasiku ga gwedhelwe.

Ngoka a li omunashipundi gwokomitiye yomutumba gwopashigwana miipambele yomauyelele nomakwatathano gopaungomba, Steve Bezuidenhout, okwa popi kutya oveta oya pitika egwedhelo lyomasiku, nomasiku 120 ano okuza pesiku ndyoka lya tulwa po lyo31 Desemba. “Oveta oya gandja ompito (yegwedhelo) noCran oya popya nale kutya otaku ka gwedhelwa omasiku 120, onkene muMaalitsa 2024 aantu ayehe naya kale ya shangitha [uukalata wawo],” osho Bezuidenhout a popi ngaaka.