Aakwanezimo yoonakusa ya hala ofuto yoomiliyona N$15

AAKWANEZIMO ya nakusa Stephanus Lukas naFrans Ndengu, mboka ya hulithile poshiponga shoka taku hokololwa she etithwa kondjayi yetanga lyopolisi Joseph Shikongo, otaya pula ofuto yoomiliyona N$15.

Petameko lyoshiwike sha zi ko Shikongo okwa popi kutya oshiponga shoka ta tamanekelwa sho mwa kanene aantu yatatu, inashi ningilwa owina.

Moshiponga shoka omwa hulithile Ndengu, Lukas osho wo Sofia Ananias.

Shikongo ota ningilwa omakonakono ge na sha noshipotha shedhipago lyaashi lyoshiningilawina, nokuhinga nuuhasha sha landula sho oshihauto shoka a li ta hingi sha mono oshiponga sho shi idhenge omutse nomutse notuukala, sha ningilwa mopate, pwIindangungu, moshikandjohogololo shaKaku [moshitopolwa shaShana], momasiku 30 Desemba 2022.

Pauyelele wolopota yopolisi konima yoshiningwanima shoka, Shikongo ngoka a li ta hingi oshihauto she shopaumwene shoToyota Hilux shoondunda mbali, okwi idhenge omutse nomutse notuukala yoHyundai ndjoka ya li oonakusa mboka yatatu. Okuza mpoka aakwanezimo yoonakusa oya kala taya ningi onkambadhala okumona Shikongo opo ya popye, ashike otaku hokololwa kutya ompito ndjoka inaye yi pewa.
Shikongo mEtitatu lya zi ko okwa popi kutya oshipotha shoka osha falwa kompangu yopamuthigululwakalo.

Ashike nando ongaaka, he ya nakusa Lukas, omusamane Toivo Lukas, okwa popi kutya ye opamwe naakwanezimo ye inaya tseyithilwa kutya oshipotha shoka oshi li momake gompangu yopamuthigululwakalo.

“Tse opo lwotango twe shi uvu mEtitatu kutya nani oshikumungu shoka oshi li momake gompangu yopamuthigululwakalo,” osho a popi ngaaka.

Toivo okwa pula kutya Shikongo okwe dhi kundathana nalye opo oshipotha shoka shi falwe kompangu yopamuthigululwakalo.

“Itatu yi nande kompangu yopamuthigululwakalo molwashoka oshipotha shoka otwe shi fala nale hu tu wete kutya otatu mono ekwatho,” osho a popi ngaaka.

Aapanguli yoompangu dhopamuthigululwakalo ohaya ulikwa komalelo gopamuthigululwakalo.

Omupopiliko gwelelo lyopamuthigululwakalo lyaNdonga, omusamane Frans Enkali, oshiwike sha zi ko okwa popi kutya oshipotha shoka kashi li nande momake gelelo lyaNdonga. Omupopiliko gwelelo lyOukwanyama Andrew Niikaku okwa popi tati: “Kandi shi shi ngele oshipotha shoka oshe etwa ko kutse.”

Toivo okwa popi kutya aakwanezimo ye osho wo yanakusa Ndengu inaya hala nande ombili yaShikongo molwashoka okwa li ye mu kongo opo ya kuutumbe nokupya ashike ompito ndjoka inaye yi pewa. “Tse otwa hala ofuto yoomiliyona N$15. Katu na shoka tatu popi naye,” osho a popi ngaaka. Mumwayina gwaNdengu, Nabot okwa popi kutya oya hala okufutwa oomiliyona N$15.

“Katu na nande shoka tatu popi naShikongo. Omolwashike opo a hala okuya kutse ngashingeyi konima oonakusa yoolela nale mevi?” osho a pula ngaaka.

‘KASHI SHI OSHININGILAWINA’

Sho ta popi kombinga yoshinigwanima shoka mOshakati, oshiwike sha zi ko, Shikongo okwa popi kutya ke wete pu na omuntu ngoka ta hingi oshihauto she mopate nelalakano lyokwe eta oshiponga opo a dhipagele mo mboka ye li mo.

“Tse, ongaantu moshilongo shetu, kandiwete mu na omuntu ngoka ta vulu okuningila owina opo a pume oshihauto nenge e etithe oshiponga owina. Tu pitikeni oveta yi longe iilonga yawo, ano omulandu gwomompangu,” osho a popi ngaaka.