Omafele avali ondjaba ashike ya kupulwa etanga- Ovakulupe

Omanga ovakulupe vamwe va uda nawa ketokolo lepangelo eshi la wedela oshimaliwa shopendjela yavo noN$200, vamwe otava ti kutya ehalo lanakufya Hage Geingob, okwa li li na okuwanifwa po, opo opendjela yavo i ninge oN$3000.

Vamwe otava ti kutya oinima oya ninga ondilo, omanga va wedelwa ashike okamaliwa kashona.

Oshivike sha dja ko, minista woimaliwa Iipumbu Shiimi, okwa shiivifa kutya opendjela yovakulupe oya wedelwa okudja poN$1 400 fiyo opoN$1 600 eshi kwa li ta yandje omutengenekwafaneko wopashiwana womudo 2024/25.

UHA PANDULA NOVAKE

Lucia Swart Kalf (70), womOvenduka kolukanda laBabylon, okwa ti ewedelo otali ningi elunduluko mokufuta eendjo daye.

Okwa ti oN$200 otai mu vatele opo a fute omukuli waye oo kwa li a kufa eshi omonakadona oo a kula a xulifa momudo 2020.

“Itandi nyenyeta. Onda pandula shaashi eshi otashi vatele nge okufuta eengunga dange odo nda kufa momudo 2020,” Swart Kalf osho a ti ngaho.

Okwa ti okuna edilaadilo opo a wedele obashu yaye omo hadi nounona vaye novatekulu vaye, osho a ti ngaho.

“Ohandi lande oipeleki ivali neepala keshe omwedi fiyo oitungifo otai wana okuninga obashu ya kula.” Oha kala ta hondjo oinyanyu yoikutu keenyala opo a ninge oikutu yomufyuululwakalo, shaashi ita dulu okulanda eshina lokuhondja, osho a ti ngaho.

Omutekulu waye, Dennis Nangolo (22), okwa ti meekulu waye oye ha lande oikulya mofamili yovanhu ve li 12 meumbo lavo.

Ovakwapata vahapu hava di meumbo ihava longo, omanga tatekulu waye umwe okwa li a efa ofikola mondodo onhinano shaashi okwa li ha shindwa.

Paife oha xupu ashike mokutoola oinima oyo hai dulu okulongululwa opo a ka landife a dule okuvatela meme waye okulanda oikulya meumbo, Nangolo osho a ti.

‘OSHA XULA KONIMA YEFYO LAYE’

Ovakulupe vamwe ovo hava kwata opendjela ova lombwela oThe Namibian kutya okwa li ve na elineekelo kutya epangelo otali wanifa po ehalo laGeingob lokuwedela ovakulupe fiyo opoN$2000 noN$3000. Saima Kamati (87), oo kwa li ha longo meumbo nale hadi koDonkerhoek, okwa pula kutya otapa ningwa shike kombinga yehalo laGeingob nongeenge opendjela otai wedelwa ngaa natango.

“Ondi wete kutya osha xula konima yefyo laye,” Osho a ti ngaho.

Kamati, oo a kala mOvenduka eedula 63, okwa li tali omusha peumbo laye pefimbo lomapulaapulo.

Okwa ti opwa li omafiku oo ovakulupe kwa li ashike hava mono oshimaliwa shopendjela shi li koshi yeyovi. Kamati okwa ti Geingob eshi a ninga pelesidente okwa wedela opendjela oikando itatu, okudja poN$600 fiyo N$1000, nokudja poN$1000 fiyo N$1 400. “Okwa li ndishi ovakulupe otava mono N$3000 opo va lwife oluhepo,” Osho a ti ngaho, ta weda po vali ta ti oluhepo oudu wa kula.

Lisaes Shikale (73) okwa ti ewedelo lomafele avali itali ningi elunduluko shaashi oinima oya ninga ondilo. Shikale okwa li a teelela oN$3000 oyo ya popiwa kuGeingob odula yadja ko.

“Ohatu xupu noudjuu moshilando eedula edi, kashi shi ngaashi nale. Onda kala mo omu okudja momudo 1963 nondi li umwe womongudu oyo kwa li ya etwa oku okudja kOld Location, osho a ti ngaho. John Tobias (84) ohadi nomukulukadi waye,nomonamati weedula (40) e na oupyakadi wopamadilaadilo novatekulu vavali. Okwa ti eumbo laye ohali xupu ashike koN$2 800 hava mono nomukulukadi waye okudja kopendjela.

“Oshi djuu okuwanifa sha. Oimaliwa ei hatu mono ohai futu ashike olusheno nomeva, inai wana okulanda oikulya tai wana omwedi,” Osho a ti ngaho. Monica Shikwambi (80) okwa ti ina pandula ewedelo shaashi oli shona unene, omanga oinima oya ninga ondilo.

“Keshe fiku ondi li moshipangelo oimaliwa oyo itai wana omwedi aushe.”

Omundjadjukununi womilandu depangelo, Graham Hoopwood, okwa ti ekufombinga loshiwana momutengenekwafaneko ola fimana shaashi otali eta opo oshiwana shi lineekele epangelo.

“Osha fimana opo oshiwana shi tye kosha komutengenekwafaneko. Eshi otashi vatele opo oshiwana shi kale shi na elineekelo la kola mepangelo notashi vatele opo ovanhu va longe pouyelele,” Hoopwood osho a ti ngaho. “Omutengenekwafaneko ou li oshinima sha fimana moveta epangelo hali eta kopaliamente, shaashi ohau tofa mo opo epangelo la tala unene moshilongo.”