Omwaalu wOvanamibia owa ya fiyo opeemiliyona nhatu

Omukulunhu wehangano lomavalulo moNamibia Alex Shimuafeni, okwa ti momwaalu wOvanamibia weemiliyona nhatu, eemiyona mbali oshinghwanyu imwe ovanyasha, osho tashi eta okuya komesho kokuhena oilonga, oluhepo nokuhafikapamwe.

Shimuafeni eshi okwe shi popya Etitatu omanga kwa li ta yandje oidjemo yomavalulo omaumbo novanhu oo a ningwa odula ya dja ko, okwa holola kutya omwaalu wovanhu moshilongo owa ya pombada okudja peemiliyona mbali oshinghwanyu imwe fiyo opeemiliyona nhatu.

“Namibia okuna oshiwana shihapu shovanyasha nomwaalu u shona wa kalela po ovakulupe,” Osho a ti ngaho.

Omavalulo okwa ulika kutya eepelesenda 71,1 dovanhu moNamibia ove li koshi yeedula 35, omanga eepelesenda 56,1 dovanhunu ve na eedula okudja po15 fiyo 59 odo ashike di na oilonga, eepelesenda 6,8 odovanhu ve na eedula 60 ile di dulife po. “Omwaalu owa ulika kutya ovanhu ova kala nokuhapupala okudja ngaa pomavalulo omomudo 1991” Shimuafeni osho a ti ngaho.

Omunawino moinima ina sha noilonga Sydwill Scholtz Etitatu okwa ti omwaalu wovanhu vehe na oilonga moshilongo unene ngaa ovanyasha otau ehameke.

“Eepelesenda 71 dOvanamibia ovanyasha, ovo opo tave ya moshikondo shoilonga ile va kala mo ashike okafimbo kaxupi, ndee okutala omwaalu wovanhu vehe na oilonga eshi ka shiwa,” Osho a ti ngaho.

Okwa pula opo kutotwe eemhito deengeshefa dovanyasha, shaashi eshi otashi va vatele opo va indjipaleke omikalo davo dokumona oiyemo.

“Onda uda nawa kombinga imwe eshi oshinima eshi sha enda nawa, ashike onghalo yeliko loshilongo oye ya novanyasha vehe na eshiivo va ye ile va yambule po eliko loshilongo.

“Eshi otashi pula opo ku ningwe eenghendabala dokuvahonga nghee ve na okulonga noshimaliwa opo kukwashilipalekwe kutya eliko loshilongo ola yambulwa po,” Osho a ti ngaho.

OKHOMAS NATANGO OYO I NA OVANHU VAHAPU

Shimuafeni okwa ti oshitopolwa shaKhomas osho shi yadi ovanhu, shi na ovanhu ve li 494 605, omanga oshitopolwa shaMaheke osho shi na ovanhu vashona, shi na omwaaalu u fike po102 881. Shimuafeni okwa ti ovakulukadi ovahapu ve dule ovalumenhu moshilongo.

“Okwa li mu na ovakulukadi vahapu shi dulife ovalumenhu moshilongo mo2023 meedolopa nokomikunda. Oshinima eshi oshe lifa noitopolwa ikwao, kakele oshitopolwa sha//Kharas, Erongo, Hardap, Kunene noTjozondjupa, odo di na omwaalu wovalumenhu uhapu u dule wovakulukadi.

“Eepelesenda 52,8 dovalumenhu okwa li da didilikwa mOmaheke, omanga dovakulukadi di li ashike 47,2,” Osho a ti ngaho.

OMAUPYAKADI NEEMHITO

Omunapaliamente wongudu yoPopular for Democratic Movement, Maximalliant Katjimune, okwa ti Namibia okwa kala nale ta longo noudjuu okuyandja omayakulu a pumbiwa kovanhu ve li eemiliyona mbali okudja momudo 2011.

“Onghee nee oupyakadi kombinga yokuyandja omayakulu noluhepo lanaipala, efiko pamwe nokuhe na oilonga otaku i ashike komesho,” Osho a ti ngaho. Katjimune okwa ti otapa dulu okukala pu na omhito yokuyambula po eengeshefa, ashike oshinima eshi otashi monika sha fa itashi i komesho nawa shaashi eepelesenda 70 deengeshefa di shona moshilongo ohadi teka po moule weedula nanho.