… okwa pewa eyovi molwoilonga yaye iwa
Omupendu pelesidente wongudu yoNamibia Ecomonic Freedom Fighters (NEFF) yee oku li oshilyo shopaliamente Longinus Iipumbu, okwa popila omulumenhu ou a kapula oshilyo shoSwapo koshivilo shongudu osho sha li kolukanda ledina Mix mOvenduka mOlomakaya.
Iipumbu (41) okwa lombwela oThe Namibian Omaandaxa kutya Moses Ndjene okwa ninga oshinima sha wapala nokwa li te liamene navakwao ovo va handuka molwoexumokomesho tai ende ka shona.
Okwa ti vati Swapo okwa kala ta fufya oshiwana oule weedula 34. Ongudu yoNEFF oya pa Ndjene eyovi ongepandulo eshi a denga omuunganeki woSwapo Bonifatius Munango, okwa ti, oshimaliwa okwa li edidiliko loukumwe naNdjene netumalaka kwaavo hava fufya kombinga yeepolohalama dexumokomesho.
“Osho okwe shi ninga ponhele yavahapu,” Iipumbu osho a ti ngaho, omanga ta lyatele pedu oimbuluma.
“Ou oulai, ito dulu okukala to undulwa kolumosho nokolulyo omanga to popi oinima ya fimana oyo ya pumbwa okuningwa. Eshi omulumenhu ou a ningakakwa li ashike okuliamena ashike okwaamena naavo vehe na eenghono dokuliamena ngee va lombwelwa va ye.
“Ongehangano otwa pumbwa okweeta ovanhu ava pouyelele. Omunhu okwa ninga nawa. Okwa ninga nawa shaashi ovanhu vatatu ovo kwa li tave mu undula nava kale veshi shi kutya Namibia oshilongo shi na ovanhu ve na oufemba u fike pamwe.
“Otwa mona mokavidio kutya okwa li nale a tulwa mohuke. Osha yela kutya omunhu okwa li e li nale mohuke nokwa li a teelela keshe shimwe shi ningwe.”
“Swapo okwa kala ta fundju okudja oule weedula 34.
Kufye omulumenhu ou okwa ninga oshinima shiwa eshi e liamena,” Iipumbu osho a ti ngaho.
Nande NEFF ita popile oimbuluma, oushili nau popiwe kutya ovanhu ova fya ondjala notava twikile okufya ondjala ngee eemumbwe davo itadi filwa oshisho nawa, osho a ti ngaho.
“Omukalo ou omulumenhu ou e liumbata edidiliko kutya ovanhu ova handuka neenghono. Omayakulo itaa yandjwa.”
Iipumbu okwa ti oilyo yoSwapo okwa li i na okweefa Ndjene a popye osho a hala okupopya omanga kwa li ina fiya po onhele. “Owa mona ehandu olo li li muye. Omunhu okwa kala e na ehandu olo oule wefimbo ndee eshi efimbo olo le ya,owa pumbwa u efe omunhu oo a popye eshi a hala ndee to ka ndula po omukundu, ndee to yandje ombili kutya epangelo otwa kala lela hatu kaleke oinima,” Iipumbu osho a ti.
Ponhele Swapo a yandje ombili kovakwashiwana vokoMix, ova ya komesho ndee tava lombwele Ndjene a fiye po onhele, osho a weda po ngaho.
Oshoondaxa, oshilyo shongudu yoNEFF Michael Amushelelo osha shakena naNdjene , ndee ta ti yee omufimanekwa oo a kapula oulingilingi moshipala.
Amushelelo okwa yandja eyovi kuNdjene ponhele yoNEFF.
Omundjadjukununi woikwapolotika Henning Melber, okwa ti NEFF eshi a yandja olupandu kuNdjene owa ti kasha li mondjia shaashi otashi popila oimbuluma I ye komesho molwopolotika.
“Osha pubwa okukelelwa kuhe na vali opo shiha ninge shihapu, shaashi osha monika kovakwashiwa vahapu eshi sha ningwa okavidio oko ka tulwa komapandja okomalungula. Lipula ashike kutya oilyo yoSwapo nayo otai duu okuponokela oilyo yoNEFF ile imwe yeengudu dikwao dopapolotika peekambaina dayo. Eshi otashi ka eta oinima ihapu. Melber osho a ti ngaho.
Okwa ti vali NEFF okwa yuka mondjila ya puka ndee nava pukululwe kombinga yoshiima osho tava ningi.
“Oshinima osho sha nyika oshiponga inashi mona nande omayambidido. Keshe ou ta yambidida oshinima eshi ota eta oshiponga moshiwana.
Melber okwa ti hamunhu a hoolola ongudu oyo tai yandje omalupandu molwomahepeko opalutu ongokukambaina.
Omundjadjukununi woikwapolotika Rui Tyitenda, okwa ti okuyandja oshimaliwa otashi ulike oluhepo lopamadilaadilo olo la hanga opolotika yoNamibia. “Oimbuluma yoludi keshe nai kelelwe kovanhu aveshe ovo tava popile eemhango doudemokoli.”
Okakomisi komahoololo moNamibia oko haka tula moilonga omaliumbato omahoololo eengudu dopolotika inaka nayamukula nande omapulo oo ka tuminwa Omaandaxa.
Omukanda womaliumbato otau popi eemhango domaliumbato eengudu dopapolotika novashikui vado shi na sha nekufombinga lavo momahoololo, oo eengeudu da teelelwa di liufe kudo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
