Inamu hoolola ovakulupe – Venaani

Oita yopakanya okwa li ya holoka pokati kahamushangandjai woSwapo Sophia Shaningwa nomuwiliki wongudu yoPopular Democratic Movement (PDM) McHenry Venaani eshi va ti ina halela mo ovakulupe momahoololo oupelesidente nomutumba wopashiwana.

Eshi kwa li ta popi poshoongalele shaye osho kwa li a ninga kOkalongo mOlomakaya, Venaani okwa ti Ovanamibia inava hoolola ovakulupe momahoololo oo taa ka kala ko muNovemba.

Eshi a popya ngaha okwa li ta popi Netumbo Nandi-Ndaitwah (71) oo e li omuulikwa pelesidente woSwapo naPanduleni Itula (66) woIPC.

Venaani okwa ti ovanyasha ove li eepelesenda 71 dOvanamibia, nava hoolole ovaleli vovanyasha, ta yelekanifa napelesidente waSenegal Bassirou Faye (44) oo opo kwa li a hoololwa omafiku aa.

Fiyo opapa, omuleli wongudu yoLandless People’s Movement Bernadus Swartbooi (45) kwa kolekwa kutya oye ta ka kalela po ongudu yaye momahoololo oupelesidente, opamwe naNandi-Ndaitwah woSwapo naItula woIPC.

Oshoongalele shoPDM osho tashi ka hoolola ou ta ka kalela po ongudu momahoololo opashiwana otashi ka ningwa muJuni, oko Venaani (46) a teelelika a ka kolekwe ongapelesidente wongudu.

“Onda hala okumupula, inamu hoolola ovakulupe va ye mombelewa. Hoololeni omuleli womushanyasha ngaashi ame. Itamu dulu okuhoolola ovakulupe ovo tava kofa ashike moilonga.”

Okwa ti vali ota ka longa mouwa wovanyasha nongeenge ova hoolola Nandi-Ndaitwah, ota ka kofa omanga e li moyoongalele yopaiwana.

“Ohonde yange otai fuluka, Netumbo ota ka kofa ashike momitumba dopashiwana. Okwa tameka nale okukofa. Venaani oku na eenghono, ota ka longa mouwa weni, ota ka longa keshe pamwe, keshe efiku ina kofa,” Osho a ti ngaho.

Shaningwa eshi a nyamukula oThe Namibian Oshoodaxa kombinga yaasho sha popiwa kuVenaani okwa ti Venaani okwa pumbwa eemofi dihapu opo a kule yee okwa pumbwa okulombwelwa kutya okukofa ihaku ningilwa eindilo.

“Venaani na dimbulukifwe kutya omufimanekwa Netumbo ota dulu okukala ina kofa moshoongalele shaashi okwa kofa sha wana. Venaani omu shona nokwa pumbwa eemofi dihapu opo a kule,” Shaningwa osho a ti ngaho.

Okwa ti Nandi-Ndaitwah ke na nande ofiku a kofele komutumba wopashiwana wOiwana yaHangana. “Poushili, Venaani na teelele manga shaashi eemofi peedula daye otadi pumbiwa shi dulife Netumbo, okutya Netumbo okwa kulupa ondi wete kutya omukalo wokumunanena pedu,” Shaningwa osho a ti ngaho.

Venaani natango okwa pula ovanyasha opo va xulife po okupwilikina kovanhu ovo tava ti ota ka landifa po oshilongo ngee okwa ningi pelesidente.

“Venaani omuyambididi woshilongo. Itandi ka landifa po nande oshilongo kovadjaidjai. Inandi landifa nale onakwiiwa yOvanamibia. Ondi na owino wa pumbiwa wokukwatela po oukumwe woshilongo.

“Kandi na okatongo. Ame Omunamibia nde lilongekida okulundulula onghalo omo oshilongo shi li. Itandi popi ashike shaashi onda hala okulela, ohandi popi oshili. Ame omuleli ou a eta ovanyasha momutumba wopashiwana ndee Swapo ta hopaenene nge,” Venaani osho a ti ngaho.

OMULUMENHU OMUNAMBILI

Venaani okwa pula ovanyasha opo ve mu hoolole ndee tava anye omapopyo okutya ngee ove mu hoolola ota eta oita.

“Itandi etele nande oshilongo oita. Ame omulumenhu omunambili. Lombweleni ovo tave mu lombwele kutya ngee omwa hoolola nge ohandi etele oshilongo oita kutya otava popi oipolopolo,” Venaani osho a ti ngaho.

Okwa ti vali ongudu yaye oya hala omahoololo opauyuki ndee ovaleli voSwapo inava popila nande vakwao oinima yongaho

“Shama va udu kutya oPDM oi na eenghono mOkalongo, vo otave mu etele oikulya yoshikukuta. Ngee ove mu etele oikulya lyeni ndee inamu landifa po eemwenyo deni medina loikulya. Ove na okuuya nomaudaneko ahapu,” Venaani osho a ti ngaho.

KAPU NA OVAANGOLA
TAVA HOOLOLA

Venaani natango okwa popya kombinga yaNandi-Ndaitwah ta lundile eengudu domilameno kutya otadi lidopo moinima yoshilongo eshi tadi popi novatumwakalelipo voilongo imwe i lili.

Venaani okwa ti okulidopa mo ongeenge Ovaangola tava pitikwa va kufe ombinga momahoololo aNamibia.

“Itandi landifa po oshilongo eshi, ashike ohandi popi nakeshe ou nda hala okupopya naye. Lombweleni Meme Netumbo meme wange, kutya okulidopa mo ongeenge tu na Ovaangola tava hoolola moshilongo shetu. Okwa mwena kombinga yOvaangola tava kufa ombinga momahoololo oshilongo shetu. Ngaho otave lidopo mo, ashike okwe shimwenena shaashi ota mono ko omawi kuvo. Venaani osho a ti ngaho.

IPC OTA SHUNA KOSWAPO

“Vamwe vomunye omwa kala tamu tyapula Swapo manga hatu lu. Paife otamu ti otamu eta elunduluko, tamu ti Venaani ine lipaka mo, omwa tameka okulipaka mo naini?”

Venaani okwa ti eengudu dihapu odo hadi di moSwapo luhapu ohadi shuna mo konima ashike yeedula omulongo.

“Ben Ulenga okuli peni nena? Okwa li va tota oCoD, ove li pamwe moSwapo. Okwa li pu na oRDP, eemwenyo davo nadi tulumukwe nombili, Hidipo Hamutenya okwa shunine koSwapo. Ou ta weelele paife apa konima yeedula omulongo ota shuna koSwapo,” Venaani osho a ti ngaho.

Venaani okwa ti okupitila moPDM eshi ovakulupe tava mono opendjela i fike poN$1600 komwedi ndee ta weda po vali ta ti ngee okwa hoololwa a ninge pelesidente, ovakulupe otava ka mona oN$4000 komwedi.

Omupopiliko wongudu yoIPC Immanuel Nashinge Oshoondaxa okwa ti onghenda inene eshi Venaani a ninga efimbo ta popi ashike IPC koshoongalele shaye.

“Fye koIPC, ongudu yopolotika yopashiwana, otwe lipyakidila naasho tu na okuninga opo tu findane. “Natu taaleleni omahoololo nombili nelongelokumwe,” Nashinge osho a ti ngaho.