Minista woikwanima noikwanghono, Tom Alweendo, okwa ti omahangano omoshilongo naa kufe ombinga ya fimana mokutala omilandu di na sha nomahooli odo tadi kala tadi wilike oikwafabulika.
Eshi okwe shi popya pefimbo opo kwa li ta popi koshoongalele shedina Namibian Local Content Conference osho shi li koLuderitz, oko a pula natango ovanangeshefa vomoshilongo opo va kufe ombinga momahooli oo a monika moshilongo opo va dule okumona m omauwa oshimaliwa.
Okudja odula ya dja ko oThe Namibian oya kala tai lopota nghee eeveta domaholi moNamibia da kala tadi wilikwa komahangano taa tamanekelwa oulingilingi ngaashi, NJ Ayuk noReconAfrica’s Jay Park.
Alweendo Etitatu okwa pula opo ovanangeshefa voshilongo va kufe ombinga mokufaneka omhilandu odo tadi faneke nghee omilandu di na okuyambulwa po opo ovanangeshefa vomoshilongo noshiwana ashishe shi dule okumona omauwa.
Oshinima shimwe osho tashi likundwa koshoongalele okutula po omakanghameno a kola opo Ovanamibia va dule okukala tava mono omauwa okudja meeproyeka domoshilongo.
“Ongovanailonga mu li moshilongo omu na kukala mwe litula mo musho. Otwa tala movanangeshefa vaNamibia opo tu kwashilipaleke kutya eshi oshi na okuningwa,” Alweendo osho a ti ngaho.
Komisina woikwamahooli, Maggy Shino, eshi a popya koshoonaglele okwa ti okukwatela mo ovanangeshefa vomoshilongo moshinima eshi kashi shi ashike oshilalakanenwa shongaho, ashike oshinima sha kula opo kumonike efimano loshikondo shomahooli moshilongo nokukwashilipaleka kutya Ovanamibia otava mono mo omauwa moshikondo omu.
“Oshi na sha nokweeta eemhito dovanangeshefa vomoshilongo opo va kufe ombinga moikwamahooli, okudja ngaa kokwaa konga fiyo oilonga aishe,” Shino osho a ti ngaho.
Okwa ti omukulunhuwiliki woikwamahooli moministili ota longo noudiinini opo a yandje eemhito odo tadi nghonopaleke omahangano aNamibia a kufe ombinga momafiyafano opo a dule okutwala eliko loshilongo pombada.
“Okupitila meenghatu odo tadi lalakanenwa, eepolohalama domadeulo, ohatu ya dje ounongo komahangano nokOvanamibia noinima yoo oyo va pumbwa opo va dule okuya komesho nongeshefa yomahooli,” Osho a ti ngaho.
Jorge de Morais wokoAngola eshi kwa li ta popi poshoongalele okwa ti Namibia okwa pumbwa okutala mokuyandja omauwa koshiwana shaye opo shi dule ku kala tashi mono omauwa meeproyeka doshilongo shavo.
Eshi osha kwatela mo okuyandja omayakulo e li kalekelwa komahangano omoshilongo, eemhito doilonga de li kalekelwa kovanailonga vomoshilongo, okulanda komahangano omoshilongo nokutwa omukumo opo ovanhu va ninge nova kufe ombinga meengeshefa domoshilongo.
Ashike nee, okwa popya kutya oinima ei oi na okutulwa moilonga nawa.
Morais okwa ti Angola okwa kala nokulonga omahooli oule weedula di dule 50 ndee nena eyakulo laye moshikondo omu oli na ongushu yeebiliyona US18, ashike okwa ti nande ongaho eepelesenda ashike 2 doshiwana shomoshilongo hadi mono omauwa okukufa ombinga moshinima eshi shaAngola.
“Nande nee omu na omilandu di li moilonga, naashi mwa popya eshi sha pumbwa okuningwa lelalela, itashi ti oshilongo otashi ka kala shi na eeproyeka odo tadi ka yandja omauwa kovanhu,” De Morais osho a ti ngaho.
Pelesidente wehangano loNamibia Chamber of Commerce and Industry Bisey /Uirab okwa ti okuxwaxwameka opo Ovanamibia va kufe ombinga moshikondo shoikwanghono, Namibia ota dulu okuyandja eemhito kovanangeshefa vomoshilongo opo va ye komesho nawa, tava yandje oilonga nokuyambula po eliko loshilongo.
“Otwa itavela kutya pakufimaneka ekwatele mo lOvanamibia meeproyeka domoshilongo, ohatu dulu okutunga po eliko loshilongo olo tali dulu okulonga mouwa wOvanamibia aveshe. Mokulonga nepangelo, oombushe moikwabulika noshiwana ashishe koonono, ohatu kwashilipaleke kutya oshikondo shetu shoikwanghono otashi ka yambula po oshiwana shetu,” /Uirab osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
