Ounona vamwe vokofikola yedina Nankuntwe Combined School ohava nangala pondje yeengulu dofikola omafimbo amwe, shaashi vati eetenda omo hava nangala oda kulupa neenghono.
Ofikola oi li ponhele hapu kala efundja koshikandjohoololo shaKabbe koshitopolwahoololo shaZambezi, oko luhapu ihaku iwa naana molwefundja.
Eshi osha eta nee opo ounona ve fike po190 va kale va ninga onanda mofikola vo va dule okutwikila neetundi davo.
Omukwashiwana umwe womomudingonoko oo a limbililwa koshinima shi li ngaha, okwa popya noThe Namibian Etitano ashike okwa pula opo oukwatya waye uha holoke, okwa ti ove na omalipulo kombinga yonghalonawa neameno lounona vavo tava nangala meetenda.
Omukwashiwana ou okwa ti ngee ounona ava va nangala pondje otava dulu okumonifwa oiponga koifitukuti oyo ya nyika oshiponga, ngaashi omayoka voo natango otava dulu okweehamekwa keengangala.
“Ihava mono efudepo la wana opo va dule okulitula mo meetundi davo. Itatu dulu okuuda ko ehongo neameno nounona ounamibia li li ngaha moshilongo sha manguluka.
“Efimbo loutalala ola fika paife, ndee ounona ava natango otava kala ashike nokunangala pondje pa talala ngee oshinima eshi inashi katukilwa onghatu,” Oshilyo shimwe shomomudingonoko osho sha ti ngaho.
Omukulunhufikola Gift Samboma okwa ti ofikola otai kendabala okuwapaleka oshinima eshi, ashike okwa ti nee opu na omumbwe yoshimaliwa shokulanda oitungifo.
“Shito, ohatu pewa eetenda kelelo loshitopolwahoololo, ashike eetenda edi ihadi ningi odula ile efimbo li dulife po opo, shaashi ohadi kulupifwa kodula ile komutenya.
Ohatu kala nee hatu wapaleke eetenda edi, ashike ngeenge ku na odula ile omhepo ohadi u po.
“Oshinima sha nyika oshiponga neenghono. Eshi osha eta nee ounoma vamwe va hoolole okunangala pondje shaashi ove wete shi li xwepo shi dule okunangala motenda oyo tai dulu okulidenga po keshe efimbo mokati koufiku,” Osho a ti ngaho.
Samboma okwa ti ofikola okwa li ya tameka okutunga eenduda dokunangala odula ya dja ko.
Okwa ti ofikola oya pula oipeleki oyo ya longifwa nale okudja kelelo loshitopolwahoololo ndee tai pewa oipeleki efele.
“Odula ya dja ko otwe shi pondola okulanda oitungifo okudja moshimaliwa shetu ndee hatu tungu obashu imwe. Ashike nee ohamu nangala ashike ounona vashona.
“Ngee otwa mono vali oshimaliwa shetu shimwe, otu na ondunge opo tu tunge po vali obashu imwe opo mu dule okunangala ounona vahapu. Otwa pula opo tu pewe oshimaliwa okudja koshikondo shehongo ashike inatu mona ko evatelo fiyo okeluwa eli,” Osho a ti ngaho.
Ofikola oya pumbwa omitengi, eepala neemboxa meendelelo, osho a ti ngaho.
“Ohatu pula nelininipiko linene kovanangeshefa opo ve tu vatele,” Osho a ti ngaho.
Okwa ti vali ove na oupyakadi umwe shaashi ofikola kai na oshipa, osho tashi dulu okweeta oifitukuti neembudi.
‘EHALO LA HOLAMA’
Omukulunhuwiliki wehongo, ounghulungu nomifyuululwakalo, Sanet Steenkamp, eshi kwa li a pulwa kombinga yoshinima eshi Omaandaxa, okwa ti kapu na omuhandjo wa nyolifwa kouministili u li kofikola oko, onghee nee ounona kakwa li va pumbwa okuninga eenanda pofikola opo.
“Eshi mu wete paife oshinima sha kundafanwa kovadali nomukulunhufikola opo ounona va kale hava di pofikola pefimbo lefundja. Ashike nee, pamhito ei, efundja ola xula, onghee nee kapu na omumbwe opo va kale tava di pofikola.
“Epangelo okupitila melelo loshitopolwahoololo, ohali va vatele neetenda ngee ve di pumbwa. Keshe ou e na ehalo lopaholamo a hala tu tunge omuhandjo pofikola apa neshi dimbwe,” Osho a ti ngaho.
Steenkamp okwa ti opo kukandulwepo oupyakadi ou wefundja, epangelo otali tungu omuhandjo tau pula eemiliyona dihapu koSchucmansburg opo u kale hau vatele ounona veefikola odo di li momudingonoko.
Okwa ti omuhandjo otau pu muKotomba ndee ounona tava tameke okuya mo petameko lodula tai ya.
“Shimwe vali, eenghendabala dokuvatela eefikola ngaashi Nankuntwe, Muzii noMpuakano odi li metifa shaashi otwa mona oshimaliwa sha dja kokomisi oyo hai ungaunga nomaupyakadi efundja shi fike peemiliyona N$26 okupitila mombelewa yomuprima minista.
“Otwa kufa noho eemiliyona di li N$70 momutengenekwafaneko wetu opo tu vatele eefikola edi opo ounona va kale tava dulu okuya keetundi nopefimbo lefundja,” Osho a ti ngaho.
Omapulo oo kwa li a tuminwa omukulunhuwiliki wehongo koshitopolwa oko, Joseph Kawana, Omaandaxa kakwa li a nyamukulwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
