Kandjii-Murangi okwa futa – oministili

… minista okwa li ashike a pewa Apilili koACC opo a kale a futa oshimaliwa shovanhu

Omukulunhuwiliki wehongo lopombada, Alfred van Kent, okwa ti minista Itah Kandjii-Murangi okwa futa oshimaliwa shoministili osho kwa li a longifa momalweendo.

Omukulunhuwiliki wokakomisi kokukondjifa oimbuluma kedina Anti-Corruption Commission (ACC), Paulus Noa, muJanuali okwa li a pula Kandjii-Murangi nomuvateli waye wopaumwene, Lungrnesia Uaseupuani, opo va fute oshimaliwa shi fike peedola daNamibia 69 000 domoshimaliwa shi fike poN$952 000 osho kwa li va futwa shi na sha nomalweendo momudo 2022.

Noa okwa li e va pa fiyo opexuulilo laApilili opo va fute oimaliwa yovafutivoishoshela yepangelo.

“Minista okwa futa oshimaliwa shaye ashishe. Oshimaliwa osho osha futwa,” Van Kent osho a ti ngaho.

Etivali Kandjii-Murangi okwaanya okutya ko sha koshinima eshi.

“Owa popya nomukulunhuwiliki,” Osho a ti ngaho omanga ina dima ko kongodi. Uaseupuani Etivali okwa ti eshi oshinima shopaumwene onghee nee ineshi twala moshiwana.

“Mutu pula ou eshi twala moshiwana,” Osho a ti ngaho.

Etivali Noa eshi a dengelwa okwa ti oku li moshoongalele, omanga okatumwalaka kaxupi kopangodi oko okwa li a tuminwa ineka nyamukula.

Kandjii-Murangi okwa kala e li moshipyu okudja odula ya dja ko molwokulongifa omahangano epangelo opo a fute omalweedo aye.

Nande nee kapu na naana oumbangi wa wana kutya minista okwa pula a pewe oshimaliwa shi na sha nomalweendo oo kwa li a filwa nale oshisho, Noa natango okwa fininika opo minista a fute epangelo.

“Minista nomuvateli waye wopaumwene ova lombwelwa kutya nava futa oshimaliwa shoministili osho ve na, va fute omwaalu aushe we liwana po omanga omafiku 30 Apilili 2024 inaa fika,” ACC osho a ti ngaho molopota yaye. Noa okwa ti oACC okwa li ya mona omukanda okudja komudiininimambo (accountant) woministili yehongo lopombada, Delinsia Garises, oo a lombwela okomisi kutya Kandjii-Murangi oku na oimaliwa yoministili i fike poN$46 100, omanga Uaseupuani e na oN$23 400. “Omwaalu ou oo wa monika po konima yoshimaliwa osho sha pulwa shi longifwe momalweendo a yooloka ashike kakwa li tashi tu kumwe nomafiku neevili odomalweendo oo,” Noa okwa ti olopota osho ya ti ngaho.

Olopota oya ti Murangi okwa pula oshimaliwa shi fike poN$952 koministili pokati kaMei naAuguste momudo 2022.

Eshi osha kwatela mo oN$338 000 ya dja kehangono loNamibia Training Authority (NTA) sha ya kuminista nomuvateli waye wopaumwene opo va ye koshoongalele shehongo shopaunyuni shomudo 2022 koLondon nokoManchester muMei momudo 2022. Ehangano loNTA natango okwa li la futa oshimaliwa shi fike poN$140 700 kuKandjji-Murangi opo a ye koMalawi koshoongalele shi na sha nomayambulepo ovaAfricano osho kwa li sha ningwa keeminista dehongo, omadeulo noungoba okudja momafiku 14 fiyo 19 Juni 2022.

Oshimaliwa shimwe vali shi fike poN$140 600 okwa li sha futwa koNamibia University of Science and Technology(Nust) kominista yehongo lopombada opo i ye koshoongalele sha li koSouth Korea muJuli 2022.

Noa okwa ti oimaliwa ei okwa li ya futwa aishe koministili yehongo lopombada.

Momwedi ngaa oo, Kandjii-Murangi okwa li natango a pewa oshimaliwa okudja koNust.

Natango Kandjii-Murangi okwa li vali a pula oshimaliwa okudja koshiputudilo shopombada shaNamibia shi na sha nolweendo okuya koJamaica nokoCuba.

Oministili natango oshimaliwa osho oye shi futa, Noa osho a ti ngaho.

Kandjii-Murangi naUaseupuani natango okwa li vali va pewa oshimaliwa shi fike poN$22 800 koUnesco shokufuta omulele wavo koNew York.

Noa okwa ti Kandjii-Murangi okwa futa ko oshimaliwa shimwe.

Okakomisi kokukondjifa oimbuluma oka ti oke na oumbangi kutya minista okwa futa oshimaliwa osho kwa li va pewa nomuvateli waye wopaumwene opo va fute omulele wavo koNew York.

“Natango minista okwa futa oshimaliwa osho kwa li a pewa opo a ye koKhorixas osho natango kwa li sha futwa koUnesco,” Noa osho a ti ngaho molopota yoACC.