Ounona otava ningi omateelelo shi nyanyalifa kOhangwena

Oshitopolwahoololo shaHangwena osha dididilika omwaalu u fike po9 077 wounona voukadona va ninga omateelelo okudja muJanuali 2020 fiyo Apilili 2024.

Elelo loshitopolwa ola ti oshinima eshi osha nyika oupyakadi neenghono.

Pefimbo olo tuu eli, ounona ve li 283 ovo va ninga omateelelo ove li koshi yeedula 14, ashike aka kashona oke na eedula omuwoi.

Omwaalu ou okwa li wa yandjwa komukulunhu wopolohalama youkolele ina sha neefamili, Angolo Angolo, pefimbo loshoongalele oshi na sha noikunda fanwa yovadali novanyasha osho kwa li sha ningilwa kEenhana Etine loshivike sha dja ko.

Eenghundafana edi okwa li da longekindwa kehangano ledina Regain Trust ongombinga yoproyeka yehangano loUnited Nation Population Fund.

Oprolohalama okwa li tai kundafana kombinga yoinima oyo ya kuma ounona ngaashi omakwatongonga nokuninga omateelelo unene ngaa ovo ve li peedula dokuya kofikola.

Angolo okwa ti omateelelo ounona moshitopolwahoololo otaa kumwifa nai.

“Omwaalu ou otau kumwifa nowa tula oshitopolwahoololo ponomola yotete opo oshinima shomateelelo mokati kounona tashi limbililike,” Osho a ti ngaho.

Angolo okwa ti oshinima shimwe osho tashi etifa ounona va ninge omateelelo okuhena oshisho kwo vadali novatonateli vounona, taku landula oluhepo.

“Oto hange ounona ava va tulwa meembashu popepi neefikola opo puhe na ou teva tonatele, ova efwa ashike va kale ovo aveke. Eli efiloshisho la nghundipala lovadali. Ounona ihava kumaidwa, nande ongee ve li komaumbo novadali vavo, ohava kala ashike ve li kuvoovene. Ovadali ova efa ounona ovo va kale tava wilkie omaumbo, shaashi ohava kala ve li keendingosho davo tava landifa ile ohava kala ashike ve li keendingosho tava nu oinima yavo,” Angolo osho a ti ngaho.

Adeleila Hamukwaya oo kwa li a dja kouministili woukakwashikekookanhu, ekandulepo loluhepo nonghalo nawa yopangahalafano okwa ti opu na omumbwe yakula yokuninga omahongo kombinga yomateelelo ounona ve li koshi yeedula odo da tumbulwa, oshoyo kombinga yomakwatongo, ashike okwa ti nee eshi inashi kala ashike oshinakuwanifa shepangelo ashike novakufimbinga vakwao ngaashi ovadali noshiwana ashishe koonono.

“Ovadali nava kale va fimaneka oyoongalele yokundungika nokuyandja omauyele. Ihave ya koyoongalele, sho osho ho mono kutya ounona vahapu ava hava ningilwa ominyonena dopaixulo ohave di ningilwa momambo avo omo kwa li va pumbwa okukala ve na eameno nominyonena edi luhapu ohadi ningwa kovakwapata,” Hamukwaya osho a ti ngaho.

Natango, ngoloneya woshitopolwahoololo shaHangwena Sebastian Ndeitunga okwa ti okuninga omateelelo kounona vofikola ohaku eta omwaalu wokufiya po ofikola u ye pombada, osho tashi limbilike ombelewa yaye neembelewa doshitopolwa yoo dimwe.

“Oshinima shounona tava ningi omateelelo moshitopolwahoololo shaHangwena otashi limbililike neenghono ndee ongovaleli novakufimbinga, otu na okukala omutumba ndee hatu dilaadila kutya oshike mbela shi na okuningwa po opo kukandulwe po oupyakadi ou.,” Ndeitunga osho a ti ngaho.

OUPYAKADI WOPASHIWANA

Omukulunhuwiliki wouministili wehongo, omaunghulungu nomifyuululwakalo Sanet Steennkamp okwa ti opu na eyooloko pokati kouyelele wa ongelwa koministili yehongo noministli youhaku kombinga yomateelelo ounona, ta weda po vali kutya oshinima eshi shounona tava ningi omateelelo peedula dokuya kofikola oshi li oupyakadi koshiwana ashishe.

“Otwa tala komatomeno oo a yandjwa kutya ounona ohava efele ofikola shike. Okuninga omateelelo kwounona oshinima sha kuma oshiwana ashishe, shimwe osha etwa komahepeko, omakwatongonga nomahepeko opaixulo oo haa ningilwa ounona. Otwa mona kutya ounona vahapu ohava tameke okuya moixulo peedula 13 moNamibia ndee omapekapeko okwa mona kutya oshinima eshi ohashi etwa komiheka nomatilifo, oimbuluma nomahepeko opaixulo,” Steenkamp osho a ti ngaho.

“Okaana kamwe ngee okaningi eteelelo, osha kuma ovanhu aveshe. Otu na eepolohalama dihapu odo twa tula meefikola, ashike mbela natango otwa pumbwa vali okushuna mondambo,” Osho a ti ngaho.