Otaku ka kala haku dimbulukiwa omadipao a nghi na nghenda oo a ningilwe kuGermany

… ovaleli vOvanama nOvaherero efiku ove li anya

Eengudu domilameno oda pandula epangelo eshi la ingida kutya omafiku 28 Mei otaa ka kala nokudimbulukiwa ongefiku lomadipao a nghi na nghenda oo a ningilwa ovanhu kuGermany pefimbo loukoloni, efiku eli otali ka kala Oshoondaxa shepengelo okudja momudo 2025.

Ashike nande ongaho otava tanguna kutya oshinima eshi osha ningwa ashike molwomahoololo.

Minista womauyelele nomakwatafano opaungoba Emma Theofelus okwa li a ninga eshiivifo kombinga yefiku eli Etivali.

Ekoleko eli ola landula omukanda oo kwa li wa dja komukwateli komesho nomuwiliki womutumba wopashiwana Peter Katjavivi ta pula opo omafiku 28 Mei a ninge efiku lokudimbuluka omadipao a nghi na nghenda oo kwa li a ningilwa Ovanama nOvaherero.

Eshi oshe ya konima kwa li momutumba wopashiwana mwa etwa oshikundafanwa shi li ngaha momudo 2016 kunakufya Kuaima Riruako naUsutuaije Maamberua.

Maamberua okwa li a pula opo omafiku 28 Mei a ningwe Oshoondaxa shepangelo shokudimbuluka omadipao a nghi na onghenda, shaashi okwa li omefiku olo tuu eli komufala womatanga oukoloni a Germany a yandjele elombwelo opo eekamba dOvaherero nOvanama di ponokelwe.

Omuleli wongudu yoPopular Democratic Movement McHenry Venaani Etivali okwa ti ongudu oya tambula ko oshinima shi li ngaha, kutya nee osha kala sha pulwa shi ningwe nalenale.

“Epangelo ola kala tali ende kashona ndee paife ola tila molwomahoololo. Ova dimbulukwa kutya ova handukifa ovanhu vahapu efimbo lile eshi va kala ihava dimbulukwa efiku eli,” Osho a ti ngaho.

Venaani okwa ti eshi oshi na okweeta elunduluko komukalo ou Germany te liumbatele Namibia meenghundafana domadipao a nghi na nghenda monakwiiwa.

“Heeno opu na omatopauko, oo nee ounghudi wetu Ovanamibia oo, ashike itatu dulu okunghundipaleka oshinima eenghundafana edi da pumbiwa koshiwana,” Osho a ti ngaho.

Omutotiveta mukulu Mike Kavekotora okwa ti eingido eli oshinima shakula kovanhu ava va kumwa komadipao aa.

Okwa ti ongomukwapata wovanhu ovo va ningilwa omahepeko okwa hafa neenghono eshi oiningwanima oyo ya ningwa nalenale tai dimbulukiwa paife.

“Onda li mopaliamente eshi Usutuaije Maamberua kwa li a eta po oshipopiwa osho ndee okwa li nde mu yambidida. Paife eshi sha tambulwa ko otwa pumbwa okulongela kumwe, hatu uya pamwe ndee hatu fininike eenghundafana pokati kaNamibia naGermay opo a fute.

“Onghee nee ohandi pula keshe umwe opo a yambidide efiku olo la tulwa po, shaashi otashi vatele kombinga yeenghundafana,” Osho a ti ngaho.

Omupopiliko wongudu yoIndepent Patriots for Change (IPC) Imms Nashinge Etivali okwa ti oshinima eshi okwa li shi na okuningwa nale opo kudimbulukiwe oinima oyo ya ningwa kovakolonyeki kutya oya tameka naini.

“Otwe lineekela kutya oshinima eshi osha ningwe nelalakano liwa, ile pamwe osha ningwa ashike shaashi odula yomahoololo,: Osho a ti ngaho.

Nashinge okwa ti otashi kala shiwa okutula mumwe oyoondaxa yepangelo ndee Ovanamibia aveshe tave ya pamwe ndee taa tokola kutya otai kala hai dimbulukiwa naini.

“Paife otu na Okashinga, efiku lomapendafaule nefiku lomadipao a nghina nghenda, omanga kwa li omafiku aa taa dulu ashike okudimbulukiwa efiku limwe alike,” Osho a ti ngaho.

Maamberua Etivali okwa ti okwa li tashi kumwifa nai eshi omuwiliki womutumba wopashiwana kwa li e ya koIndependence Memorial Museum mOvenduka, opo ovakwapata voonakudipawa kwa li va ongala.

“Omuwiliki womutumba wopashiwana iha holoka poinima i li ngaho shito, ndee okwa li she tu kumwifa atushe kutya oshike euwila. Ashike osho shi li momukanda oo a lesha kakwa li nde shi teelela.

“Okwa li twa hafa notwa kumwa neenghono eshi pelesidente a hoolola okushiivifa
Hamushangandjai wehangano ledina Nama Traditional Leaders Assocciation (NTLA), Deodat Dirkse, Etivali okwa ti kutya ehangano lavo otali anye efiku olo la tulwa po 28 Mei 1908, ta ti oshinima shotete okwa li sha ningwa momafiku 12 Apilili 1904.