Ongudu yedina Affirmative Repositioning (AR), oyo ya kwatelwa komesho kuJob Amupanda, oi li moshipyu.
Eshi oshe ya konima ovakalimo vokoshitopolwa shaZambezi va lundila ongudu kutya oya longifa omashaino avo opo i dule okulishangifa ongongudu yopolotika kokakomisi komahoololo kedina Electoral Commission of Namibia (ECN) ihe na ediminino lavo.
Omukulunhu wopolifi koKatima Mulilo komufala Charles Mayumbelo Etivali okwa koleka kutya oshibofa osha patululwa.
“Opu na yoo vali omanyenyeto ahapu, ashike fiyo opapa oshibofa shimwe osha patululwa poshiitaashi. Omikanda otu di na,” Osho a ti ngaho.
Omupopiliko wongudu yoAR George Kambala okwa ti ongudu oya teelela omanyamukulo okudja koECN kutya okatendo komahoololo otaka ti ngahelipi.
Ota lundile ongudu yoIndependent Patriots for Change (IPC) kutya oya pula ovanandjungu voAR opo va piyaaneke eehelo longudu.
Okwa ti oilyo imwe yongudu oya koleka kutya oya kala tai dengelwa. “Otushi shi omikalo odo eengudu dimwe tadi longifa opo di tu kelele, unene ngaa IPC. Kandi shi kutya omolwashike, ashike omunhu ou wete kutya ova tila ongudu yetu,” Kambala osho a ti ngaho. Okwa ti ongudu oye lipaka mo natango mokukalela po ovanyasha vaNamibia.
“Ovanandjungu vetu ove udite ko nawa oilonga noinakuwanifa yavo kombinga yepupi lavo,” Kambala osho a ti ngaho.
Omupopiliko woECN Malauli Siluka Etivali okwa ti okakomisi otaka ka tya sha ashike konima ka mana okuninga omakonakono.
Omuunganeki woAR koshitopolwahoololo shaZambezi Watson Kalaluka Etivali okwaanya kutya inava shangifa nande ovahoololi shihe li papitikilo lavo, ta weda po vali kutya omunhu okwa pumbwa omauyelele omuhoololi opo e mu shangife.
“Eshi ovanhu va pumbwa okuuda ko osheshi kutya eshi omadina avo e li momusholondodo wetu itashi ti ova ninga oilyo yongudu yetu. Okwa li twa ya momaumbo nomomapandaanda hatu pula ou a hala oudemokoli wa yuka opo etuvatele e lishangife,” Osho a ti ngaho.
Kalaluka okwa koleka kutya okwa mona eengodi okudja kovahoololi vahapu tava nyenyeta kutya oshike ve li momusholondodo wavo.
Ovahoololi ova lundila nokuli Kalaluka kutya okwa kufa omadina avo membo longeleka ndee te a tula momusholondodo waavo va shaina.
Kalaluka okwa nukila pomutenya ndee ta ti omunhu opo a nyolifwe okwa pumbwa onomola yokakalata komahoololo.
“Eenomola doukalata vomahoololo inadi shangwa mo membo longeleka. Ongeleka yange ihai yambidida opolotika, ohandi ningi opolotika yange paumwene,” Osho a ti ngaho.
Kalaluka okwa ti opu na oudjuu uhapu eshi eengudu dopolotika di wete omadina ovanhu vado momusholondodo, osho ta ti opolotika ashike.
“Lao linene, oumbapila vomahoololo ihava monika. Ngeno okwa li ovanhu hava kala ve shi kutya otwa hoolola lyelye, ngeno otava kala mo mongudu. Opu na ovanhu ovo ihava hoolola eengudu davo,” Osho a ti ngaho.
OSHIBOFA OSHA PATULULWA
Natango, odjo imwe oyo inai hala oukwatya wayo wa hololwa, Etivali oya lombwela oThe Namibian kutya okwa li ya kumwa eshi omumwainamati e mu lombwela kutya edina laye omo li li momusholondodo woAR. “Onda shakeneka omumwamememati ponhele yomalishangifo oECN. Opo nee nda uda kutya fyee nameme omadina etu omo e li momusholondodo omo. Okwa li nda kumwa nai nosha li sha piyaaneka nge, unene ngaa shaashi okwa li handi shange omakonakono,” Osho a ti ngaho.
Odjo oya ti oya dengela Kalakula opo a kwashilipaleke kutya edina laye ola dja mo momusholondodo omo.
“Eshi osha nyika oshiponga. Ngee ovanhu otava dulu okushangifa edina loye uhe shi shi, lipula ashike kutya oshike vali tava dulu okuninga. Ohandi ka patulula oshibofa kopolifi,” Osho a ti ngaho. Odjo oya tulila mo ongudu yoAR oshibofa shili, noThe Namibian oya mona onomola yoshibofa.Omuunganeki nomukwateli komesho wongudu yoIPC koshitopolwahoololo shaMusati, Titus Pendapala, okwa lundila oAR kutya otai longifa omusholondodo womadina ovanhu ovo kwa li tava yambidida oIPC momahoololo a dja ko.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
