Ovanamibia ve fike pomiliyonaoshinghwanyu nhee otava fi ondjala

… Opu na ashike eepelesenda 16 doikulya oyo kwa li ya tuvikilwa

Nande oshilongo osha lopota ovanhu ve li 2000 va kwatwa koudu wondjala, ovanhu vahapu otava ka kala vehe na eshi tava li pokati kaJuli naSeptemba odula ei.

Eshi okwa li sha hololwa kolopota oyo kwa li ya dja kombelewa yomuprima minista oyo kwa li ya pita omafiku aa.

Olopota oya ti Ovanamibia ve fike pomiliyona oshinghwanyu nhee otava ka kala vehe na oikulya ya wana pokati kaJuli naSeptemba, paife ovanhu ve fike po33 105 voiwana oyo ya lyatelwa pedu ohava mono oikulya yoshikukuta, novanhu ve li 1 835 okwa li va lopotwa ve na oudu wondjala moshilongo.

“Eepelesenda dovanhu di li 48, odo di fike pomaumbo e li 341 855, oda teelelika di ka kale dihe na oikulya ya wana pokati kaJuli naSeptemba neudo,” Ombelewa yomuprima minista osho ya ti ngaho.

Natango, epangelo ola eta po opolohalama yokulwifa oshikukuta yongushu yobiliyona imwe oshinghwanyu nhatu oyo natango tali ka pumbwa eyambidido mokuitula moilonga.

Epangelo otali dulu okuyandja oshimaliwa shi fike peemiliyona N$829 ashike natango ola pumbwa oshimaliwa shi fike peemiliyona N$482.

Oitopolwahoololo oyo ya lopotwa mwa monika oudu wondjala ongaashi, //Kharas, Omaheke, Omusati nOshana.

Oshitopolwahoololo sha//Kharas osho sha lopotwa shi na omwaalu u li pombada woudu wondjala eshi shi na ovanhu ve fike po744 va monika oudu ou. Okwa shi kula Omaheke e na ovanhu ve li 738, omanga Oshana shi na ovanhu 176.

Oshitopolwa shaKhomas osha didilika ovanhu ve li 111, omanga Omusati wa didilika ovanhu ve fike po66.

OVANHU TAVA MONO OIXUNA
Oshitopolwahoololo shaKavango Ushilo noshitopolwahoololo shaMusati oi na omwaalu uhapu womaumbo taa mono oixuna, okwa shikula Kunene nOhangwena.

OVAYAMBIDIDI

Omupedu prima minista John Mutorwa okwa li a ongela ovakalelipo voilongo ya yooloka novakufimbinga opo va vatele Namibia kombinga yoshikukuta.

India okwa popya kutya okwa pula epangelo laye opo li vatele, omanga China oku na ehalo lokuyandja eemiliyona N$5 tadi wedwa koikulya yongushu yeemiliyona N$5 oyo kwa li a yandja omaano.

China natango okwa holola ehalo laye mokuvatela okuninga eemboola.

TAI LONGIFWA PAPUKO

Omupelesidente wongudu yoPopular Democratic Movement McHenry Venaani okwa lundila epangelo kutya otali longifa oikulya yoshikukuta opo li kambainine omahoololo.

“Ovanhu ova kotoka paife, ohatu va lombwele moyoongalele nakeshe pamwe kutya ngee ova nomo oikulya kaishi yaSwapo, oikulya yOvanamibia,” Osho a ti ngaho.

“Ova kala tava longifa oikulya yoshilongo nai. Elongifo nai lopanghatu yopombada,” Osho a ti ngaho.