Ongudu yoNEFF oya kufwamo meengudu dopolotika

Omupedu pelesidente wongudu yoNamibia Economic Freedom Fighters (NEFF) Longinus Iipumbu Etivali okwa ti okakomisi komahoololo kaNamibia kedina Electoral Commission of Namibia (ECN) otaka talulula etokolo lako lokukufa mo ongudu yavo meengudu dopolotika.

Ongudu yoNEFF nongudu yedina Christian Democratic Voice (CVD) okwa li da kufwa mo meengudu dopolotika daNamibia mwolwo eshi kwa li da dopa okuyandja omikanda doshimaliwa, oshinima osho tashi dulika shi etele ongudu tai lele omauwa momahoololo oo taa ka kala ko muNovemba oupelesidente nomutumba wopashiwana.

“Natango otwa fikama nomukumo kutya ECN ota talulula etokolo laye nde ta pitike oNEFF i kufe ombinga moitopolwa aishe yomahoololo,” Iipumbu osho a ti ngaho.

OMILANDU
Haende Nafimane Halweedo Etivali okwa lombwela oThe Namibian kutya okakomisi komahoololo okwa li ke na kupula eengudu kutya oshike inadi ongela omikanda dado doshimaliwa nokwa li ve na okupewa elombwelo omanga inaku kufwa etokolo lokudikufa mo.

Okwa ti eengudu okwa li di na okupewa efimbo lonumba lokwoongela ndee konima tadi kufwa mo nee nawa, netomeno kutya okwa li da pewa efimbo olo.

Iipumbu okwa ti oshinima osho kakwa li sha ningwa. Halweendo okwa ti omatomeno aeshe okwa li e na okuyandjwa keengudu odo da kumwa koshinima eshi.

“Ngee okakomisi itaka ningi osho sha popiwa kokatendo, nena eengudu edi oda manguluka okutwala oshinima eshi komhangu,” Osho a weda po ngaho.

OSHINAKUWANIFA SHAVO
Omundjadjukununi woikwapolotika Rui Tyitende okwa ti ngeenge eengudu oda teya oveta, nena oECN oya ninga ashike osho i na okuninga.

“Eengudu dopolotika onda pumbwa okukala di shi shi nodi udite ko kutya otadi longo noimaliwa yoshiwana noda pumbwa okukalela po keshe odola. “Ngee ou liwete kutya oove to dulu okulundulula onghalo oyo i li moshilongo paife owa pumbwa okukala wa fimaneka okukalela po osho wa ninga nokulonga pouyelele,” Osho a ti ngaho. Oshilyo shoNEFF Michael Amushelelo osha ti oshinima eshi shokukufa mo ongudu meengudu dopolotika okwa li shi li mekwatafano naashi ongudu ya eta pouyelele oulingilingi momikalo dokuyandja oilonga moECN.

“Otushi shi nawa kutya eshi osha handukifa ovahona voECN.”

Amushelelo okwa ti ongudu okwa li ya yandja omikanda dayo doshimaliwa adishe nokwa li i li pokuditula moikundaneki ngaashi tashi pulwa.

Natango Kandume woCDV okwa li a lombwela oThe Namibian Omaandaxa kutya etokolo loECN lokukufa mo ongudu yaye meengudu dopolotika otali eta oita.

“Otwa anifwa komhangu ya shiya ko. ECN olye opo e tu kufe mo mopaliamente? Ova eta oita ndee otu na okuvanyana.” Kandume osho a ti ngaho.
“Eshi oshinima shishona kufye. Ino lipula ko kusho.”