Oshitopolwahoololo shaShana oshi na omwaalu uhapu wovanafaalama tava kongo oulifilo woimuna yavo shihe li paveta.
Ngoloneya waShana Elia Irimari okwa ti oshinima eshi shokulikufila edu nokutula eedalate keenhele kOmbuga itashi dulika.
Irimari okwa ti oshinima eshi osha eta omaupyakadi mahapu nai.
Okwa li ta popi koshoongaleleilonga shi na sha nokutala kutya oshike naana va longa fiyo opapa kOshakati osho kwa li sha ningwa koministili younamapya, omeva nomatendululo omapya Omaandaxa.
“Ngaashi naana oitopolwahoololo ikwao, nafye otu na oudjuu woikumungu yedu,” Irimari osho a ti ngaho.
Okwa ti okutula onhele eedalata oku li unene koshitopolwa shoulifilo shokOmbuga, osho tashi dulika shi ka ete omaupyakadi monakwiiwa.
“Otashi dulika puha ka kale vali edu loulifilo,” Osho a ti ngaho.
Irimari okwa pula oministili opo i vatele mokutofa mo oibofa yokulikufila omadu moshitopolwahoololo.
“Otashi dulika ovanhu vaha ka kale vali ve na edu lokulifa la manguluka. Onda pandula eshi epangelo la longa noudiinini mokutula po eemboola domeva monhele ei.”
‘VA KUFEI PO’
Omukulunhuwiliki woministili younamapya nounaimuna Ndiyakupi Nghituwamata okwa ti oshinima eshi shokulikufila edu nashi ungaungwe nasho ngee oministili tai shangifa omadu.
“Ito shangifa osho she likufilwa. Onakwiiwa itai kala iwa ngee ovakwashiwana vetu kave na apa tava dulu okulifa oimuna yavo. Ohandi pula omuwiliki oo e na oshinakuwanifa shokushangifa oufemba womadu pamufyuululwakalo opo a kwashilipaleke kutya otwa landula oveta ndee hatu kufa po eedalate adishe odo dihe li paveta,” Ngituwamata osho a ti ngaho.
Okwa weda po vali ta ti nande edu oli na ondilo, opa tulwa eudafano lovanafaalama nomaufemba e li 180 edu okwa li a shangifwa.
OSHIHAPU
MuMarsa, Nghituwamata okwa li a kunghilila kombinga yokulikufila edu moshitopolwahoololo shaShana.
Okwa ti oministili newilikongudu ledina Oshana Communal Land Board ova kala nokumona eelopota dokulikufila edu shihe li pave ta okupitila momikalo dokulandifa edu komikunda, osho yo momudingonoko waShakati, Ongwediva nOndangwa.
PATULULENI OKATOMENO KASHAKATI
Irimari okwa pula oministili opo i patululule okatomeno kedina Oshakati Eloolo Abattoir.
“Epangelo ola kufa eenghatu opo li kwashilipaleke kutya okatomeno oka patuluka ashike medina lomakondjifafano ovanhu, oproyeka ei natango oya mwene ndee kapu na ashike eshi tashi ningwa po. Otai dulu okuyandja oilonga. Ohandi pula opo tu ninge po sha meendelelo.”
Irimari natango okwa ti onhele oyo hai longo ombelela kOngwediva itai longo
“Onhele ei yokulonga ombelela oya kula neenghono ndee nomatungo ngaa ayo oya mwena ashike. Paife oshi li momake eni ongovawiliki opo mu dilaadile opo tu dule tu patulule onhele ei. Taleni ashike koshimaliwa osho sha longifwa pokuyeeta po, otashi kala shiwa ngee otwe i patululula.”
Omupopiliko welelo lopamufyuululwakalo lAndonga Frans Enkali okwa ti itapa ka kala vali eelopota dipe domalikufilo omadu, omanga eedalate kwa li da kufwa ko keenhele odo kwa li da lopotwa nale.
“Oshinakuwanifa shovaleli vakula vopamufyuululwakalo ile oovene vomikunda opo va kwashilipaleke kutya kapu na nande omunhu ta ningi eedalate dihe li paveta ndee ngee ova lopotwa, nava katuke onghatu meendelelo. Inashi pitikwa okutula eedalate meenhele doulifilo, itali dulu okuninga loye,” Enkali osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
