Hamushangandjai woSwapo Sophia Shaningwa okwa kala nokupewa oushima eshi a ka popya kombinga yomalwaambo opaumwene kombinga yokukala e na omulumenhu koshoongalele shopolitika ponhele yokupopya oikumungu oyo ya kuma ovahoololi.
Shaningwa, pefimbo loshoongalele koHelao Nafidi koshitopolwahoololo shaHangwena mexuliloshivike, okwa ti opu na omapopyo eheshi oshili kutya ohai koyoongalele a ka konge ovalumenhu.
“Vamwe vomunye otamu ti ohandi tondauka noyoongalele yoSwapo shaashi kandi na omushamane ndee vati ondi na elineekelo lokumona omushamane koyoongalele yoSwapo. Olyelye e mu lombwela kutya kandi na omushamane? Nolyelye e mu lombwela kutya ohandi kongo omushamane? Oipolopolo! Itandi ehama momutwe ame itandi i eemwengu, ondi shi ongushu yange,” Osho a ti ngaho mokaviidio oko ta ka lotoka nomalungula.
Okwa pula ngee ovo tava andjakaneke ouyelele uhe li mondjila ova hala a ninge omukulukadi wavo, ta ti ina hala.
Okwa pula oshiwana opo shi li kaleke kokule nokwiifana okandidate yoSwapo momahoololo oupelesidente Netumbo Nandi-Ndaitwah omadina.
Omukalelipo waNamibia mukulu Pius Dunaiski okwa ti molwondodo yaShaningwa ongohamushangandjai wongudu tai pangele, kakwa li a pumbwa okupopya oinima yoludi olo koshitufi sholudi olo.
“Okwa li a pumbwa okukala e na edeko liwa lopolitika nonghee hai longo ndee kashi shi okuudifwa nai konima oyo.
Kakwa li a pumbwa okuya fiyo oponghatu opo shaashi ota teya po etumwalaka lopapolitika loSwapo momudo wa piyaana womahoololo,” Osho a ti ngaho Etivali.
Ashike nee, profesa Johan Coetzee okwa ti Shaningwa oku li koshi yokupewa omaushima ahapu ongoshidjemo shoita nomatopaukafano oo e li moSwapo, ndee okupewa omaushima shihe li pauyuki otaku ningwa medina laavo ve li ominge naye nova hala okuya ponhele yaye.
“Okutula ovanhu kumwe paife osha fimana shaashi kapu na omuleli wolela, shaashi kapu na omupelesidente woSwapo pamhito ei,” Osho a ti ngaho.
Coetzee okwa ti ongohamushangandjai, Shaningwa oku na okupwilikinwa kovanhu vahapu, ashike okutya sha kombinga yomapopyo eheshi oshili kakwa li oshinima shi li mondjila okuninga momudo womahoololo.
Okwa ti okwa li e na okushininga pambelewa ngee okwa li a hala okutya ko sha komapopyo oipupulu oo.
“Osho osho ovanhu hava ningi, ohava kufa ashike okatumbulo kashona kaasho wa popya ndee tava dimbwa oinima aishe,” Osho a ti ngaho.
Coetzee okwa ti opolitika oya kaka ndee keshe shimwe otashi dulu okulongifwa, shaashi kapu na eemhango.
“Osha fa ashike oita. Kamu na eemhango moita. Opolitika oye lifa ashike,” Osho a ti ngaho.
Eshi a popya noThe Namibian Etivali, Shaningwa okwa ti okavidio oko ta ka lotoka komalungula oka kufwa ko papuko shaashi ovo va li koshoongalele ova uda ko kutya okwa li a hala okupopya shike.
“Ito udu ko kutya oshinima osha dja peni, otashi kala sha djuupalela nge okukufatululila ngee kwa li poshoongalele opo,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
