OMUTELI omukulu meme Saima Ndemwiimba, ngoka a longa moohotela odhindji uule woomvula omulongo nasha, okwa tokola oku gandja ontseyo ye kaagundjuka sho a patulula osikola yokuteleka moshitopolwa sha Hangwena uule woomwedhi mbali dha pita paife.
Okwa hokolola kutya Osikola ndjika oya patululwa momatungo gameme Queen Namundjebo mOhangwena.
Meme Saima, ngoka a longa uule wethimbo yiilonga mbika yuunahotela, okwa hokolola kutya okuna elalakano enene okuhumitha komeho aagundjuka yoshilongo shetu miilonga yuunahotela, yaa kale yena ontseyo miilonga yokuyakula oonakulya moohotela, okukala nuuyogoki, okulongekidha iikulya yomaludhi ga yooloka, okukala nookasitoma, okuyalula ositoka, okuyala oombete, okuyakula oongodhi na unene tuu okuyakula aatalelipo yoshilongo shetu.
Saima, hi ithanwa woo meme Ndokotola okwa tokola nee okupatulula osikola yokulonga iilongwa mbika, opo a kwathele aagundjuka mboka ya mana osikola, ihe inaa amona iilonga nenge omatsikilo opo yi ilonge iilongwa mbika yuunahotela yo yaka longe moohotela nenge yaka tote oongeshefa dhawo dhokulongekidha nokulanditha iikulya.
‘Onda hala okulonga epipi lyaagundjuka iilonga yuunahotela, unene tuu yokulongekidha iikulya. Otu Oohotela oonene odhindji miitopolwa ayihe yoshilongo tadhi pula aantu mboka yena ontseyo. Onda hala okutopola ontseyo yandje naagundjuka yoshilongo shetu, h meme Ndemwiimba ta popi.
Okwa ti osikola ndjika otayi ka kala nokulonga iilongwa ngaashi kombinga yuuyogoki, okulongekidha nokuteleka iikulya, okulonga niikulya, uunahotela, okuyalula iilandithomwa nenge ositoka, okuyakula oongodhi noshowo omalweendo nomatalelepo.
Aanasikola mboka ya mana ootundi, otaaka ka kala haya pewa omadheulo mOohotela dha yooloka moshitopolwa.
Osikola ndjika otayi adhika mOshakati konima yo Corner Life pOkandjengedi pegumbo lya meme Saima. Oshitayi oshikwawo osha patululwa pomatungo gameme Queen Namundjebo pOhangwena. Uuyelele wa gwedhwapo otawu monika kongodhi ya meme Saima ko: 081 2912 574.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
