Ootransfomer dholusheno ishewe mOmbaye

OSHILUKU oshitiyali shomashina gokuindjipaleka nenge okushonopeka oonkondo dholusheno (transformer) oga thikile mOmbaye oshiwike shaziko. Omashina ngaka galandwa kuNampower otaga ka longithwa mopolojeka yokugandja olusheno yedhina Caprivi Link Interconnector.

Omashina ngaka guudhigu wootona odhindji oge li oshitopolwa shomashina kumwe agehe gahetatu ga longwa moSweden. Ngashingeyi otaga falwa piitaasi mpoka taga ka longa pOtjiwarongo noshowo poKatima Mulilo. Omashina oga zi kuSweden taga pitile mu Hamburg shaNdowishi okuya kOmbaye ga humbatwa kosikepa yoondongelwa yedhina MACS. Okweenditha omashina ngaka okuza koSweden osha longekidhwa kehangano lyomitsalo lya Bremen moNdowishi ha li ithanwa LS International Cargo, omanga meni lyaNamibia iilonga yokufala omashina ngaka oyili miikaha ya Manica Group Namibia. Omashina otaga falwa koshitaasi sholusheno poZambezi popepi noKatima Mulilo, ekwawo otali yi poshitaasi sholusheno poGerus kuumbangalantu wOtjiwarongo.Omashina ngaka oge li oshitopolwa shopolojeka ye gandjo lyolusheno lya Caprivi Link Interconnector lyongushu yombiliona 3,2 ndjoka tayi mangele kumwe iitopolwa iyali yondjandjo yokugandja olusheno moshilongo,noshowo oonetweeka dhomalusheno moNamibia, Zambia, Zimbabwe,DRC,Mozambique na South Africa. Elalakano enene, okweetapo ondjila ontiyali nenge yilwe yokweetamo olusheno okuza kiishiindalongo nenge okulanditha olusheno kiishiindalongo oyo tuu mbyo.Opolojeka ndjika oya etapo etameko lyokulongitha uungomba watya ngeyi mokueenditha olusheno moongodhi dhopombanda.