Kalunga awike ta tseya onakuyiwa yoontauki dhaDRC

KALUNGA oye awike ta tseya onakuyiwa yoontauki 41 ndhoka dhi li moshitopolwa shaahenamwene pokati ka Namibia naBotswana.

Omupopiliko gwoontauki ndhika dha hakela poongamba dha Mamuno okwa ti onakuyiwa yawo oyi li moshikaha shaKalunga, oye awike ta tseya kutya ota ya zipo uunake mpoka ya kakatela. Epangelo lyaNamibia mEtitano olya ti lyo kali na esiku li pitikile ongundu yoontauki ndhika dhi galukile moshilongo.Ongundu ndjika oya zi mehala lyoontauki Osire ta yi ti anuwa ka yi li megameno na ishewe oya tilithwa neso kepangelo lyaNamibia. Epangelo lya Botswana nalyo olya tile kutya ita li pitike oontauki ndhika dhi ye moshilongo,oshoka oli itaala nokutya oontauki ndhika odha li megameno moNamibia. Oontauki adhihe 41 mwakwatelwa uunona 23 odha za koDRC no dha li dha kala mOkamba yontauki pOsire popepi nOtjiwarongo. Joel Kabangu Mwamba okwa lombwele The Namibian kutya ye oku shi ekankameno lyepangelo nonando ongawo ongundu ye ka ya li we tayi galukile koNamibia. Okwa ti yo oya dhiladhila okukala moshitopolwa shaahenamwene sigo pwa adhika epotokonono lyomukundu. Okwa tsikile tati ina ya mona natango eyamukulo okuza kepangelo lyaBotswana , nonando ehangano lyo National Society for Human Rights olya tile pampango yopaigwana Botswana ke na ompito yilwe yaashi okutaamba oontauki ndhika. Mwamba okwa ti wo ongundu ye kayi na we einekelo mehangano lyoontauki lyiigwana hangano (UNHCR) nonando olyo tali tsikile oku ya pa omakwatho agehe.Okwa ti aniwa aanambelewa yehangano ndika oha ya fundju sho osho ongundu ye inaa yi hala okukundathana nayo. Ta ti yo inaya inekela UNHCR oshoka oye ya pele omaudhigu gawo ye ga fale kOministry, ndele nee sigo ompaka inaya mona eyamukulo, ishewe ehangano ndika otali longele kumwe nEpangelo lyaNamibia. Omasiku ga zi ko, UNHCR okwa li a kambadhala okuuvitha ko oontauki ndhika dhi galukile ku Namibia, ihe Ominista yIikwameni Rosalia Nghidinwa mEtitano lya zi ko okwa li a lombwele iikundaneki kutya shika kasha li sha ningwa pakwatathano mUuministeli wawo.