Ootekisa dha pata oondjila moshilando

AAHINGI yotekisa omathele oya li momapandaanda ga Venduka Omaandaha taya ningi ehololomadhiladhilo ye li ompinge netulomiilonga lyompango ya Muni yi na nuulamba wOotekisa.

Aahingitekisa ota ya ti ompango ndjika otayi ya thiminike okuyonagula iihauto yawo.Ootekisa odhindji odha li dha thitike oondjila ndhoka dhuuka koombelewa oonene dhopolisi yoshilando shaVenduka pomatsakaneno gondjila ya Sishen na Essens, sigo opokati komutenya gwoMaandaha.Pethimbo olyo tuu ndyono ootekisa dhimwe ndhoka inaa dhi kutha ombinga menyenyeto odha holeke oolamba dha dho opo dhi vule okupita nuupu mekondeka lyaanatekisa.Oshiningwanima osha tameke lwopomugoyi gwongula, manga aakalelipo yehangano lyaanatekisa (NABTA) ya yi moonkundathana naKakukutu kopolisi yaVenduka, Abraham Kanime kombinga yepatelo lyoolamba dhootekisa kombanda yoondunda.Omathimbo ngano opolisi yaVenduka oya kala tayi futitha aahingitekisa oodola 300 shampa oolamba dhawo inadhi patelwa kondunda yotekisa sha ningwa pethimbo ya ka futila omikanda dhawo dhokuhumbata aantu.Ooyene yootekisa noshow aahingitekisa oyendji shono yapulwa, oya ti oye na oolamba dhomangeneta ndhoka hadhi tulwa kombanda yondunda,omanga yalwe, ya ti oolamba dhawo oha dhitulwa meni dhi wetikile mekende lyokomeho.Aanatekisa otaya ti okupatela oolamba koondunda otashi shundula oohauto dhawo unene tuu uuna ye na okudhilandithapo. Ishewe oha shi kala oshidhigu ngele ya hala okulongitha ohauto dhawo paumwene mehuliloshiwike.Aapolisi kombinga yawo otaa ti oolamba ndhoka hadhi kuthwako nuupu ota dhi kumike aanatekisa yamwe ya longe iilonga yuufuthi, noyuulingilingi. Pethimbo Kanime naawiliki yoNABTA taa kundathana,aahingitekisa kaayenambili oya kala ya kondeka ombelewa dhopolisi yOshilando, shika oshaka thiminika opolisi yi tule po omainda komeho goombelewa dhawo.Aanetikasa yamwe oya ka tameka okuhinga mepandaanda lya Independence moka ya thiminike aahingitekisa mboka ya li taa longo yaa ha longe. Omuhingitekisa Frobrians Ashipala ngoka a li natango ta longo okwa li a hilwamo motekisa nokonyala a kondje naamboka ye mu kutha mohauto ye. Okwa lombwele The Namibian tati nonando ota yambidhidha aahingitekisa ooyakwawo ka li uuva kutya otaku kala ehololo madhiladhilo molwoolamba. Omaiuvo ngaka oga li ga hololwa wo koyendji yaahingitekisa mboka inaa kutha ombinga mekanka. Einda lyootekisa olyali lyiihana sigo opopepi nondholongo ya Venduka, mpoka ohauto yomuhingitekisa gumwe ya tatulwa omakende koonakunyenyeta. Elandulathano olya ka holoka konima sho etanga lyowina lyoPolisi ya Namibia lya ithanwa. Oshigongi pokati koNABTA nomusamane Kanime sho sha pu Kanime okwa popitha aahingitekisa uule wotundi yimwe kombinga yomatokolo ganingwa po. Okwa ti aapolisi itaya ka shuna monima shina sha nokupatela uulamba koondunda dhuutekisa,omolwa okuyoolola ootekisa, kakele oya pe NABTA iiwike itatu opo eetepo omukalo omwaanawa gwokupatela oolamba koondunda dhootekisa.Oshigongi sha landulako pokati ko NABTA nOpolisi ya Venduka oshiliko mo17 Auguste. Kanime tati ngashingeyi Opolisi itayi ka futitha mboka taya yono ompango ndjika. Naamboka nee ya adhika nale yena okufuta omolwompango ndjika naya kwatathane naye opo ya gandje uudhigu wawo.Ngashingeyi aapolisi oye na iipotha yeyono lyompango kaahingitekisa yili oma-7,967. Mokati kaambino omuna shomuhingi gumwe e na omapogolo 32.
Omupresidende gwaNABTA, Magnus Nangombe okwa tengeneke aahingitekisa mboka ya kutha ombinga ye li 4000.