CoD na RP oyi ikwata etulopevi lya Shalli

OPAATI yo Congress of Democrats (CoD) oya ti kutya oshinima shetulopevi lya Letenanda-Ndjayi gwEtanga lyEgameno, Martin Shalli, ihe ina ningilwa natango oshipotha – oshinima tashi tilitha.

‘Aanamibia oye na okukala ya tila, ya tila noonkondo. Osha fa shi li ngeyi kutya Minista (Albert Kawana), ngoka e shi tseyitha, Okomisi yEkondjitho lyOkoraputon nOshikondo oshipanguli ayehe oya fa taye shi holoke,’ Amushanga-Ndjayi gwa CoD Tsudao Gurirab, osho a popi ngaaka.’Omolwashike itaa yi komeho e taya ningile Ndjayi oshipotha, pehala lyokuninga iinima momilema shoka tashi vulu okupiyganeka egemeno lyoshilongo,’ Gurirab ta pula ngaaka.Lwopokati mpoka, Omupresidende gwopaati yo Republican Party Henk Mudge okwa lombwele The Namibian kutya opaati yawo nayo oyi ikwata etulopevi lya Shalli. Sigo onena ina ku gandjwa uuyelele wa yela kombinga yetulopevi lya Shalli.Shalli ina ningilwa natango oshipotha molwashoka aaantu mboka taya konakona shoka ta popilwa, oye li taya tala kutya oshika shi na okuningwa po. Otaku popiwa kutya Shalli okwa li a li ko sha koshimaliwa sha li sha landa iilongitho yEtanga lyEgameno (ya li ya landwa ku China), sha pitile momuntu omutitatu. Shalli okwa li aniwa a longitha oakaunta yomuniilonga mOmbelewa yOmukalelipo gwa Namibia ku Zambia, moka omo nee aniwa mwa li mwa tula ‘Oondola oomiliyuna.’ Mwene gwoakaunta ndjika okwa ka gandja nee oshimaliwa shika ku Shalli.Nande ongaaka, Opolisi ya Zambia oya li ya mono kutya opu na sha sha puka, konima sho ya lombwelwa kutya oshimaliwa shomwaalu ogundji osha li sha yi mOakaunta yOmuniilonga mOombelewa dhOmukalelipo gwa Namibia mu Zambia na omuniilonga nguka okwa li a pulwa-pulwa.Osha fa nee shi li ngeyi kutya omuniilonga nguka okwa ka gandja uuyelele auhe na oshinima shika osha ka gandjwa kOshikondo shOpolisi hashi ungunga niimaliwa kayi li pauyuuki nosho wo kOkomisi yi na sha nekondjitho lyiilonga yOkoraputo.Oonzo dhomauyelele odha popi kutya Shalli okwa hokolola kutya oshinaliwa shOondola dhaAmerika omayuvi omathele gaali nomilongo ntano osha tulwa mOakaunta ye okuza ko China kaantu mboka ya li haya zi megumbo lye mOvenduka uule womvula.Oonzo dhomauyelele odha ti kutya Omutamaneki-Ndjayi Imalwa, omasiku ga zi ko okwa li ko China a ka manithe omakonakono moshinima shika. ‘Shoka taya konakona pethimbo ndika okutala ngele opu na wo aantu yalwe yalya ko sha kOomiliona,’ onzo yimwe yomauyelele osho ya popi ngaaka.Shalli okwa kala mnEtanga lyEgameno lya Namibia okuza momumvo 1990 sigo Febuluali 2005, sho Omukokolipresidende Sam Nujoma a li e mu tumu ko Zambia a ka kale Omukalelipo gwa Namibia hoka. Ihe konima yethimbo lya konda poomwedhi 18, Pohamba okwa li e mu galulile kegumbo e te mu ningi Omukuluntu gwEtanga lyEgameno lya Namibia.