Ombelewa ya Elcin mOniipa tayi pandula Aakwanegongalo

OMBELEWA yOngeleka ya Evangelical Lutheran Church in Namibia (Elcin) pOniipa mOndonga moshitopolwa sha Shikoto otayi pandula noonkondo Aakwanegongalo ayehe mboka ya kuthile ombinga mElongelokalunga lyOsoondaha yeti 21 Juni 2009 moBennie`s Etertainment Park mOngwediva, ano mOpaaka ya BH mOngwediva nokugandja omagano kOngeleki yawo omanenenene ge thike po N$1,260,915.84, kwa gwedhwa onzi yethona noshikombo.

Amushanga gwIiniwe mOngeleki ya Elcin Omusita Linus Dama Shimakeleni, ta ti kutya esiku ndyoka, Ongeleki ya ELCIN oya pewa omagano gOodola dha Namibia Emiliona limwe (N$1,000,000.00 kOmunangeshefa a tseyika nawa tate Benjamin Hauwanga (BH) negumbo lye. Ongundu yaanangeshefa, ya li mElongelokalunga moka, oya gandja N$239,955.00 (ano ya gandjwa opo yi thindikile omiliona ndjoka ya gandjwa ku tate Hauwanga).Ongalo ndjoka ya umbwa kAakwanegongalo mElongelokalunga moka, Omusita Shimakeleni okwa ti kutya, oya li N$20,960.84 n oshowo nee onzi yethona noshikombo.Omusita Shimakeleni ta yelitha ta ti omagano giimaliwa ngaka ngashi ga tumbulwa metetekelo, kumwe nonzi yethona noshikombo, oga gandja ngashi tashi landula mpaka; Omiliona ya gandjwa ku tate Hauwanga negumbo lye oya gandjwa ayihe ngashi yi li, esiku tuu ndyoka. Mwaambyoka yAanangeshefa, ya tumbulwa yi li N$239,955.00, okwa taambwa ashike manga yi li N$77,955.00. Mbyoka inayi thika natango, opo yi ninge ayihe kumwe yi li N$239,955.00, oyi li N$162,000.00. Nayo oyi li mondjila okuya kiikwawo kOngeleki. Mbyoka ya tumbulwa ya umbwa mOngalo yElongelokalunga, ayihe kumwe yi li N$20,960.84, okwa taambwa manga ashike yi li N$18,610.84, ko taku thigala yi li N$2,350.00 mbyoka ya uvanekwa koonakuumba ongalo yamwe, yi na okuthika natango. Omusita Shimakeleni ota ti maaumbi yongalo opu na mboka ya tula mo uumbapila womiyalu dhoshimaliwa shoka ya uvaneka taya gandja.Oshimaliwa nee shoka sha gandjwa esiku ndyoka ngele owe shi tula kumwe naashoka sha uvanekwa, nena oto shi mono mo kutya ashihe kumwe oshi thike pOoN$1,260,915.84, kwa gwedhwa nee onzi yethona noshikombo.Omusita Shimakeleni, pehala lyOngeleki ayihe ya Elcin, ota pandula Aakwanegongalo ayehe ya kutha ombinga mElongelokalunga ndika nokugandja omagano ge thike mpoka kOngeleki yawo. Unene ta gandja olupandu olunene komusamane Hauwanga negumbo lye sho a gandja oshiholelwa oshiwanawa shi thike mpoka kOoitaali yakwawo.’Oona-kugandja omagano ngaka, omuhemuhe, otamu pandulwa unene molwoshimpwiyu sheni oshinene shokudhilaadhila okukutha Ongeleki yeni moshilambo. Onkee edhina lyOmuwa nali simanekwe nokutangwa,’ Omusita Shimakeleni, pehala lyOngeleki ayihe ya Elcin, ta ti ngawo nokupandula.