Uudhano wa Kapuka wa hugunina omOlyomakaya twa thinda pOmafo

OMUUNGANEKI gwUudhano wa Kapuka mboka hau dhanwa kehe omvula nowa tamekelwe okudhanwa Omwedhi gwa zi ko pOhangwena mOshitopolwa sha Hangwena ndele tau kala inau pwa, otau ka manithwa nee mOlyomakaya ngaka twa thinda pOkapale kOmaudhano ka Namundjebo pOmafo mOndoolopa ya Helao Nafidi mOshitopolwa sha Hangwena moka.

Omulongekidhi gwUudhano mbuka tate Sammy Mushelenga ta lombwele The Namibian kutya Oosipana odhindji, dhomaudhano gi ili nogi ili, odha dhengwa mo nale koonkwawo Omwedhi gwa zi ko nomwa thigala ashike ndhoka tadhi ka kondjithathana mOlyomakaya twa thinda moka tamu ka za ndhoka tadhi ka dhenga mo natango oonkwawo nokuhokololwa oosindani dhuudhano mbuka nenge muudhano mbuka.Osipana yetanga lyokoompadhi yaamati yOseko yOpombanda ya Ngha, oyi li nale kedhingoloko lya hugunina, ya tegelela ashike ndjoka yaamati tayi ka sindana pokati kOsipana yOseko yOpombanda ya Haimbili Haufiku pEenhana mOshitopolwa sha Hangwena naandjoka yOseko yOpombanda ya Mweshipandeka mOngwediva mOshitopolwa sha Shana, ndhoka tadhi ka dhana ongula yOlyomakaya ngaka twa thinda pOkapale ka Namundjebo pOmafo mpoka.Kakele kOosipana ndhika dhaamati dhetanga lyokoompadhi opu na wo dhetanga lyokoompadhi dhaakadhona noshi li nee ngeyi kutya ongula yOlyomakaya otaku ka dhanwa oosemi kOosipana yetanga lyokoompadhi yaakadhona yedhina Eleven Stars FC nOshakati Youth FC na Elao Primary School na Weyulu Primary School nokuza mpoka ndhoka tadhi ka za mo mbali otadhi ka dhana methigathanopo lyahugunina mehuliloshiwike tuu moka. Omaudhano ga hugunina methigathaopo ndika, ngashi Obokisa, Etenga lyOmoshimbamba, lyOvolley nolyObasketa, oga dhanenwe nokuya pehulilo meti 21 Juni 2009 pOhangwena mpoka.Oonakusindana momaudhano ngaka, ongashi nee Shondili Mshasho Boxing Academy (boxing), NDF-Windhoek, ya sindana Ovolley mOocluba, Oseko yOpomband aya Ngha, tayi sindna Ovolley yAamati, Six Stars ta sindana Ovolley yaakadhona, Oseko yopombanda ya Ongha SSS tayi sindana Etanga lyomOshimbamba lyaakadhona, Leopard oya sindana Obasketa yaamati, na Tigers tayi sindana Obasketa yAakadhona.Mushelenga ota ti kutya oonakusindana muudhano mbuka otaya ka pewa nee oondjambi okuza ngaa pomakopi gomayugathano, Oomedalia dhOshingoli, Oshisiliveri nodhOshikushu.