Swapo, ke ya dhenge mo yimwe nopevi: Omusita Kapewangolo

PETHIMBO ta egulula oshigongi shoSwapo nEgalikano pOnethindi mOndonga moshitopolwa sha Shikoto mOlyomakaya ga zi ko,Omusita Aino Kapewangolo, okwa indila koSwapo yi ka kondje nuudhiginini nokukadhenga mo oongundu dhilwe,yimwe nopevi.

Egalikano okwe li tameka nokulesha mOmbiimbeli, Ombapila yotango yOmwaapostoli Paulus kAakorinto, Ontopolwa ontimugoyi okuza pokavelise okati 24 sigo okati 25, ndhoka tadhi ti; ‘One omu shi shi kutya aantu mboka taa ningi shanamutango, ayehe otaa matuka, ihe gumwe awike ta mono ondjambi yesindano.Nane wo matukeni ngaangoka, mu yi mone. Omuthigathani kehe oha mono edheulo, nkene e na okuvulika koompango dhomethigathano. Oye ote shi ningi, a zalekwe oshishani shaaluhe.’Sho a lesha ngawo mombiimbeli ye, Omusita Kapewangolo, ta gwedha po nee kuye mwene ta ti, ‘Swapo kala wu shi shi kutya nuumvo oku na omahogololo. Longa nuudhiginini, ndele to ke ya dhenga mo Knock Out, ano, yimwe nopevi.’Ya li mpoka oya tameke taya ligola nokupandula. Okuza mpoka, omusamane Armas Amukwiyu, ngoka a li Omuwiliki gwoshigongi shoka, sha li sha popithwa kOmupresidende gwOpevi gwoSwapo, Hage Geingob, a thindikilwa kOministeli yUunamapya John Mutorwa nosho tuu kAawiliki yalwe, okwa pandula noonkondo Omusita Kapewangolo.Ta ti yo moSwapo oye na elago okukala nAasita yOludhi nduka. ‘Omahogololo getu oga yambekwa ngeyi, Ooradopa otatu ke ya pa kapenya,’Amukwiyu ta ti ngawo.