Inamu landa we mOositola dhAanangeshefa yoompilameno: Amukwiyu ta ti

PETHIMBO ta popitha oshigongi shOswapo, shoka wo a li ta wilike, Omukuluntu gwoSwapo moshitopolwa sha Shikoto, Armas Amukwiyu okwa ninga eindilo e li ukitha mAakwaSwapo moNooli, unene tuu moshitopolwa sha Shikoto kutya inaya landa we iinima yawo mOositola dhAanangeshefa yomOongundu dhOompilameno, unene tuu mboka yomoRDP.

Amukwiyu ta totha mo aanangeshefa yaali, omusamane John Andre Kandindima gwOsitola yedhina Holiday Inn yi li momudhingoloko gwa Nethindi mOndangwa mOndonga mOshitopolwa sha Shikoto nosho tuu, noshowo omusamane Johannes Haidika Shihepo mwene gwoositola dhedhina Onambango, kutya Aakwaswapo inaya landa mo we mOositola dhawo.’Onda hala oku mu pandula nee iilyo naayambidhidhi yOswapo sho mwa uva ko eigidho lyetu ndika nale, kutya inamu landa mOositola dhawo, oshoka omathimbo ga zi ko kamu landa we mOsitola ya Kandindima yo Holiday Inn, , shoka sha eta ngashiingeyi mu kale kamu na sha we, mu na ashike omakola ogo ge li mo taga tonatele mo. Sho Kandindima a li mOswapo, okwa li nawa, ashike nee sho a za mo noshigwana oshe mu ekelahi notanana nondatu ngawo,’ Amukwiyu ta ti nokugwedha ko ta indile koshigwanaOshiSwapo kutya inashi landa we mOositola dhoNambango, oshoka mwene gwadho omusamane Haidika, ke shi gwoSwapo. ‘Ano otamu ka landela mo shike. Ngele Osuuka ndjoka yi li mo oyombiliha, omolwashike ihamu ka landa kUumini nenge kOfysala? Omolwashike tamu sapota oongeshefa dha Nambango. Oositola dha Nambango nadhi ka landwe kaakwanezimo ya Radopa, inamu ya ko we, ‘ Amukwiyu ta lombwele Aakwaswapo ngawo poshigongi shoka mOlyomakaya ga zi ko.Oshigongi shoka osha li wo sha popithwa kOmupresidende gwOpevi gwOswapo Omundohotola Hage Geingob ngoka a li a ende pamwe nOministeli yUunamapya omusamane John Mutorwa. Amukwiyu ta lombwele Geingob nosheendo she kumwe nOshigongi kutya opu na yamwe (yoRDP) taya ti kutya otaya kutha ko Oshikoto koSwapo, ashike kaye na sho taya vulu. Oya kembadhalele ashike oya nyengwa.Gavena yOshitopolwa sha Shikoto, Penda yaNdakolo, naye okwa lombwela oshigongi kumwe nOmundohotola Geingob kutya opu na yoongundu dhOoprojeka,unene ndjoka yoRDP, yi imanga kumwe nOopapeta, taya ti kutya otaya kutha ko Oshikoto, ashike nee kaye na esiku ye shi vule. ‘Iimentu yimwe onde yi pele omayele kutya oshoshili, otaya ende taya tuku Omukokolipresidende gwoSwapo Sam Nujoma nOswapo. Inaya dhina tuu aantu naaleli yasho na oye shi ngaa sho taya ningi. Onde ya lombwelwa kutya otwa vulwa notwa tokola okupopila tatekulu gwetu, Omuleli gwetu Sam Nujoma sigo okomuntu gwa hugunina. Omahogololo nage ye ashike tu ke ya kolile,’ Ya Ndakolo ta ti ngawo.