Kuthiipo omayoolokathano: aaleli mu Zim taya ti

HARARE – Aawiliki yoongundu dhopapolitika mu Zimbabwe oshiwike shika oya ningi eindilo kaayambidhidhi yoopaati dhawo, ya fumvike omayoolokathano opo pu etwe po ekotampango epe lyopaundemokoli.

Eindilo ndika oye li ningi konima sho Okonferensa yimwe ya li yi na okukundathana kombinga yekotampango epe ya li ya kalekwa mOmaandaha, sho iilyo yoopaati dha yooloka mbyoka ya li ya tameme okushekathano nuukuumbathana niinima.Lago enene, Opolisi yokuhalakanitha oya li ya ya zi mo moovugo okweeta po oveta nelandulathano. Okonferensa ndjika oya ka tsikile nee mEtiyali, ihe opwa li egameno lya kindja.Paul Mangwama, ngoka a li gumwe gwomaanashipundi pOkonferensa ndjika noku li oshilyo shopaati yo Zanu-PF, okwa li a lombwele oshigongi shika kutya okonferensa ndjika oyi li ompito yokukundathana kombinya yomauwanawa ga Zimbabwe na kayi shi yokukundathana omauwanawa goopaati nenge gopaumwene.’Ndika kali shi ethimbo lyokupolitika. Ihe olyokweeta po ompito yaantu, ya gandja omadhiladhilo gawo,’ Mangwama ta popi ngaaka.Okwa ti sigo onena opu na omatopoko omanene mAazimbabwe, nonande moshilongo omu na Epangelo lyopaukumwe. Douglas Mwonzora, naye a li wo omunashipundi pOkonferensa ndjika noku li oshilyo oshikuluntu shopaati yo Movement for Democratic Change (MDC), okwa ningi eindilo aanashigongi yi idhidhimikilathane noya tule mpeyaka omayoolokathano.Okonferensa ndjika oya li ya eta po uungundu mboka tau ka enda-enda noshilongo uule woomwedhi ne, tau kongo omadhiladhildo gaantu kutya oya hala ekotampango epe li kale li li ngiini.