mOlyomakaya esiku enene lyuudhano pu Kandjengedi

MOLYOMAKAYA otali ka kala esiku enene pOsikola ya Kandjengedi mOngwediva
mOshitopolwa sha Shana sho tapu ka kala ethigathanopo lyuudhano wEtanga lyokOompadhi lyaamati yepipi lyoomvula dhi li kohi yoomvula 13.

Omuunganeki gwUudhano mbuka tate Dominiku Kornelius atseyika wo nedhina Yoyo, ta ti kutya uudhano mbuka, ngashi shito, nonuumvo, owa kwashilipalekwa kukuume komaudhano moNooli, Build It, Ofeema nenge tu tye Ongeshefa ndjoka hayi landitha Iitungitho moshilongo.Uudhano mbuka, pa tate Yoyo, otau ka tameka poheyali yongula, ongula yOlyomakaya ngaka twa thinda geti 18 Juli 2009 pokapale komaudhano kopOsikola ya Kandjengedi mpoka. Yoyo ta ithana oshigwana ashihe shi ye shi tale nkene aanasikola yoomvula dhi li kohi yoomvula omulongonandatu taye shi enditha. Otamu ka hogololwa wo aadhanindhingi okuya mOsipana yOpashitopolwa.