Yamwe oongundu dhompilameno oya hala oku ka eta evundakano : Iivula-Ithana ta ti

PETHIMBO ta popitha engathithi enene lyAakwaSwapo pOnheleiwa mOukwanyama mOshitopolwa sha Musati omutenya gwOsoondaha ya zi ko, Amushangandjayi gwOswapo me Pendukeni Ivula-Iithana, okwa ti kutya yo mOswapo oya kundana oshinima oshinene sha nika oshiponga, shOongundu dhimwe dhoompilameno dhi na omadhilaadhilo gokukayona noku ka vundakanitha omahogololo gOpaupresidende nogoshigongi shOpashigwana ngoka taga ka kala ko mu Novemba nuumvo moshilongo ashihe.

Me Pendukeni Ivula-Iithana ta ti: ‘Nandi mu yakele ko kutya opu na omahembombolo ga hala ga ka ete omapiyagano momahogoloolo twa thinda mo. Ga hala ge ke tu hindeni, tse ngeno yOswapo natse tatu ya yamukula nomahindo ngeno, sho oshinima tashi yonuuka, ano go omahogololo taga yonuuka, ko kuka tiwe kutya tse yOswapo otse twe ga yona. Ko taku tiwa naga shune mo nenge naku tungwe Epangelo lyuukumwe, lyopamuhanga, ngashi sha ningwa miilongo yimwe ngashi mu Zimbabwe, mo Kenia noshow tuu. Aantu mbaka inaya halika koshigwana. mOmahogololo otaya ka za mo ozilo. Oye shi shi onkee taya ka kembadhala noku ka eta po omavundakano gOpapolotika momahogololo ngoka tage ya, opo iinima yi yonuuke ngeno, ko kugandjwe ombedhi kOswapo ndjoka tayi pangele,’me Ivula-Iithana ta ti ngawo. Okwiindile kAakwaSwapo ayehe yi ikaleke kokule nomahindo, omatukano, okwiivunda mumwe nomashongo nomahindo taga ningwa koongundu dhoompilameno. ‘Inatu yeni nande momalugodhi gopapolotika noongundu ndhoka. Nge taye tu hindi nenge taye tu tuku, tseni inatu ya yamukuleni, minatu ya hindeni na inatu ya tukeni. Tu mweneni, oshoka esindano olyetu noya hala oku li tu yonena. Taleni kOmuntele koshitopowa sha Shikoto sho ya ninga ko omasiku ga zi ko. Oya yile ko ya yaleka ehala lyawo li li okule nuundingosho wopOmuntele mpoka,mpoka ya li ya pelwa epitikilo ku mwene gwomukunda nokOpolisi, ashike sho ye ya po nokumona kutya kapu na aantu, oya tokola ya ze po ya engene kuundingosho hoka ku na aantu kwali taya landitha nokunwa omalovu gawo nombili. naantu mboka, ya li puundingosho mpoka molwashoka kaye shi yo RDP, sho ya mono RDP te ya okuningila oshigongi pooha dhuundingosho, oya nyenyeta nokutya naya ze po mpoka, yo inaya hala okupulakena iinima yo RDP. Opolosi oye ya shili noku ya lombwela ya ze po oshoka hapo ya li ya pewa. Omu wete kutya aantu mbaka kaye na aantu nohaya hala nee okuhinda aantu mboka kaye shi yongundu yawo, ngashi ye shi ningi pOmuntele mpoka,’ Ivula-Iithana ta ti popi.’Ano shigwana pahuka, opu na aantu ya hala oku ka yonagula omahogololo. Ngele taya ningi uugongi wawo, ya etheni ya ninge uugongi wawo. Nane mu hole kupulakena, kuugongi wawo ohamu katala shike tuu? Ivula-Iithana ta ti nokupula ngawo. Epopyo lye ndika olya kolekwa kOmukokolipresidende Sam Nujoma sho a pewa ompito ku ye a popithe oshigwana shOswapo mOnheleiwa. ‘Onda hala okukoleka shoka sha popiwa ku Amushangandjayi gwoSwapo meme Pendukeni Ivula-Iithana, kutya natu etheni uungundu woompilameno mboka, oshoka auhe otau ka sila mompa konima yomahogololo. Inamu wu tumbula we komadhina gawo nokuli, wu etheni, ondjila yawo oya thinda moompa moka tau ka sila,’ Omukokolipresidende ta ti ngawo manga AakwaSwapo ya li mpoka taya ligola nokupandula kepopyo ndyoka.