Haimbili a shunwa miilonga

NGASHIINGEYI oshi li pambelewa! Titus Haimbili, ngoka a li kuthwa miilonga yUukuluntuwiliki wa TransNamib omumvo gwa zi ko, okwa shunwa miilonga.

Ominista yIilonga nOkamwatakanithokumwe gOpangodhi, Helmut Angula, okwa li a lombwele aanankundana mOmaandaha mOvenduka kutya Haimbili nEwilikongundu lya TransNamib oya ninga etsokumwe (kutya Haimbili na shunwe miilonga) ‘omolu uuwanwa woshigwana.’Shika otashi ti wo nee kutya Festus Lameck ota shuna wo mUunashipundi wOlaata ya TransNamib okuudha, mboka a li i ikutha sha zi mpoka sho Haimbili a tulwa pevi uule woomwehi 11. Angula okwa ti Haimbili nEwilikongundu lya TransNamib oya dhiminathanapo, ‘omolu uuwanawa woshilongo.’ ‘Otandi indile nee koshigwana, okupitila miikundaneki shi yambidhidhe edhiminathanopo ndika. Otandi indile wo iinkundanaki yi tinde ‘ootakatika’ dhaatopoli (yaantu), mboka ihaya palutha nande ompito dhokweetapo omafekelathao,’ Angula ta popi ngaaka.Haimbili okwa li a tulwa pevi mu Auguste gwomumvo gwa zi ko poshigongi shotango shEwilikongundu lya TransNamib, e ta ningilwa iipotha yokulonga iilonga yokoraputo yi li ihamano.Ihe oshigongi shoka a ningilwa kuyele nuumvo, sha li mewiliko lyOmunaveta Clement Daniel, ina shi mona ondjo miipotha itano.Haimbili okwa li aniwa a ningi oshinima shi li pondje yoonkondo dhe nokondalaka ye sho aniwa a li a eta po omulandu gwoshimaliwa shomailongo kashi na iishoshela, ine gu gandja kEwilikongundu lya TransNamib li gu zimine.Nande ongaaka, Okangundu okaningimatokolo gopapolitika omanene kopati yo Swapo – oka li ka gandja elombwelo ku Minista Angula kutya na kale a tala Haimbili okwa shunwa miilonga na shika osha li wo sha yambidhidhwa kOkabinete.Momaandaha, Angula okwa li a popi kutya ye elombwelo ndika ke li shi, ta ti kutya Ewilikongundu lya TransNamib olya li ya pulakene kOlutu olupitithe, ndoka lu li Okabinete. Ewilikongundu olya ningi etokolo kulyo lyene. ‘Ina shi indikwa oshilyo yOkabinete nenge Okabinete ayihe yi popye nEwilikongundu, ihe Okabinete itayi vulu okulombwele Ewilikongundu nkene Okampani yi na okulonga,’ Angula ta popi ngaaka.Angula okwe shi zimine kutya oshinima shika osha kanithitha Okampani Oomiliona, molwashoka osha li wo sha eta aaniilonga ya TransNamib moshilongo ashihe ya ninge ekanka.Lameck okwe shi koleke kutya Haimbili okwa shunwa miilonga na ota ka tameka mpoka e yi thigile. ‘Otandi pandula Kalunga sho a eta oshinima shika mpoka uuwanawa woshigwana wa vulu mboka wopombandambanda,’Haimbili osho a popi ngaaka. Kepulo, Angula okwa ti ye kali nande gmOmpangu yOpapolitika na iilonga ye kaya li i moshiponga.