UNESCO a gandja omagano giitaafula niipundi kOosikola moNooli

EHANGANO lyIigwanahangana lya tseyika nawa nedhina UNESCO, mEtitano lya zi ko olya gandja omagano gIipundi nIitaafula kOosikola dhomUumbangalantu ndhoka dha li dha gumwa nayi komeya gefundja omvula ya zi ko nopetameko lyomvula ndjika, unene tuu dhomOshitopolwa sha Hangwena nosha Musati, sha ningilwa pOombelewa dhElongo dhOshitopolwa sha Hangwena pOndangwa mOshitopolwa sha Shana.

Iitaafula ayihe kumwe yi li 415 niipundi yi li 667, taku tiwa kutya ya kotha omayovi omathele gane lwaampoka, ya longwa kOfaabulika yIipilangi ya tate Nashipili mOshakati ya tseyika nawa nedhina Ekwafo Wood Work, oya pewa Omuwiliki gwElongo mOshitopolwa sha Hangwena omusamane Josia Udjombala nOmupehawiliki gwElongo mOshitopolwa sha Musati meme Loide Shatiwa, kOmuwiliki gwa UNESCO moNamibia Omuprofesore Alaphia Wright, ngoka e li Omukalelipo gwa UNESCO moNamibia, moSouth Africa, moLesotho nomoSwaziland. pOshituthigandjo lyomagano ngaka opwa li wo Amushangandjayi gwOkomissi yopashigwana yi na sha na UNESCO mUuministeli wElongo me Trudie Amulungu.Oosikola ndhoka dha pewa omagano ngaka giipundi niitaafula ongashi,Elakalapwa, Haikonda, Nasheya, Ndilokelwa, Onghala, Shingunguma, Usko Nghaamwa, Okamukwa na Nghiteke.Pethimbo ta taamba ko Aakalelipo ya UNESCO mbaka naayehe ya li poshituthi shegandjo lyomagano ngaka mpoka, Omuwiliki gwElongo mOshitopolwa sha Hangwena tate Udjombala okwa pandula noonkondo UNESCO. Omusamane Udjombala ta ti mOosikola dhawo, unene tuu ndhoka dha gama koongamba nodha hepekwa komeya gefundja, omu na aanona oyendji kaye na iipundi yokukaatumba, oombaanga niitaafula yokushangela noyendji ohaya kaatumba kiitandu yoondhopi nenge kiipundi yiiti. Onkee, Udjombala ta ti etokolo lya UNESCO lyokukwathela oosikola ndhika ngeyi oshinima sha simana notashi pandulwa noonkondo.Meme Amulungu, okwa ti kutya UNESCO oku shi okupandulwa noonkondo molwashoka okwa tokola toko okukwathela Namibia noshigwana she unene tuu okugandja omakwatho miinima ya etwa kiiponga yopauntshitwe nosho tuu, ngashi momaupyakadhi ga etwa kiiponga ngashi mbyoka yomililo, yomeya gefundja nosho tuu.Meme Amulungu ta ti kutya UNESCO okwa kwathela wo mIitopolwa yilwe ngashi mo Caprivi pethimbo lyomeya gefundja moka noshowo koMalinda mOshitopolwa sha Hardap sho ya adhikile nayo komeya gefundja oomvula dha zi ko.Omuprofesore Wright, ta lombwele Aawiliki yElongo yaali ya li mpoka naayehe mboka ya li po kutya UNESCO, Ehangano ekulukulu lyiigwanahangana, olya tokola toko okukwathela iigwana yi li muupyakadhi nomoompumbwe dha etwa po komaupyakadhi ngashi ngoka ga etwa po komeya gefundja komililo nosho tuu. Ta ti,kakele kokugandja omakwatho gatya ngawo, UNESCO, oku li i ilongekidha wo okuyambula po oshigwana, unene tuu ngashi shoka oshigundjuka meilongo lyasho. Omuprofesore ta indile kAawiliki yElongo ya hwahwameke Elongo lyAakuluntu, opo ya shiwe okulesha nokushanga, ya vule okwiileshela yoyene nokwiimonena omauyelele, omaunongo notseyo yi li nawa.Pethimbo ta gandja omapandulo pehala lyElongo, meme Shatiwa okwa pandula noonkondo UNESCO kwaashoka a ninga po, shokukwathela oosikola ndhoka iipundi niitaafula. Meme Shatiwa ta ti, oshili, moosikola dhawo omu na aanona haya kaatumba koondhopi molwashoka kapu na iipundi, yo yamwe taya shangele komatundji molwashoka kaye na uutaafula wokushangela ko.’UNESCO ote tu kutha muupyakadhi shili noku tu hupitha, na otu na oku mu simaneka noku mu pandulila ekwatho lye ndika enene noonkondo,’ meme Shatiwa ta ti ngawo nokugwedha po ta indile kOmahangano galwe noshowo kaanangeshefa ya landule oshiholelwa oshiwanawa sha UNESCO shika. Meme Shatiwa ta kumike UNESCO kutya yo Elongo oye li kwata oshimati noye li yi ilongekidha okuya nalyo komeho, kutya nee otashi ya pula shike.