Meme Aletta na tate Nyelele ya pewa aakwana, omuluudhe nomuyelele

AAGUNDJUKA yaali yomOndangwa mOshitopolwa sha Shana, tate Nyelele Nambuli Alweendo (36) na meme Aletta Lazarus (31) meti 26 Mei 2009 oya pewa omagano guukwana uumati mOshipangelo shEpangelo sha Shakati noye wu luku Pandeni na Panduleni.

Oshinima nee shimwe oshikumithi kuyo, ashike otaya pandula omagano gawo ngaka ya pewa ku Kalunga, osho shoka kutya Pandeni omuyelele, omanga Panduleni omuluudhe.’Oshikumithi shili, ashike otatu pandula omagano getu guukwana wetu twe ga pewa ku tate Kalunga,’ meme Aletta ta lombwele oThe Namibian, sho a li e ke ya talela po mEtine lyoshiwike sha zi ko pEgumbo lyawo pOndangwa.Meme Aletta ota ti kutya aakwana yawo mbaka oya landula omukadhona gwawo gwosheeli Magdalena gwoomvula heyali (7) nomumati gwawo Jasma Tangeni gwoomvula ndatu (3), ngoka esiku ndyoka a li ta monika a nyanyukwa noonkondo sho a gwedhwa kaamwayina mbaka aamati yaali Pandeni na Panduleni.Tate Nyelele na meme Aletta, oha ya ilongele yoyene. Tashi ti oye na lela uudhigu wokwiihupitha yoyene naanona yawo mbaka. Taya ti oya pumbwa ekwatho okuzilila moshigwana oshisihenda moka, opo ya vule okwiihupitha nokuhupitha oluvalo lwawo nduka ya pewa omagano ku Kalunga kawo.’Sho tu li ngeyi nomuholike gwandje Nyelele, katu na iilonga, otatu longo ashike kutse yene. Ngaye ondi na osalona, ihe kandi mona we ookastoma, naamboka haye ya okupandwa oyo mboka ashike ookuume kandje yontumba yongandi, haye ya ashike nokuli uuna ya pumbwa okuopalekwa momitse dhawo. Tashi vulika tapu piti oomwedhi odhindji inaa ye ya nohashi thigi ndje nee ndi kale kandi na we oshimaliwa shokulanda iikulya niipumbiwa yilwe yomegumbo yaanona yetu noye tu tseyene. Omuholike gwandje Nyelele naye ke na iilonga. Oha landitha ashike iipakete iyali, itatu yoombiila, mbyoka hayi landwa wo uuna twa mona po ookastoma. Onkee, sho twa pewa omagano gaakwana mbaka yaali, ya gwedha komagano gambeyaka yaali ya kala po nale,otwa pumbwa ekwatho lela ngashi lyiikulya, lyomahini, lyoothewa noshowo iizalomwa yaanona yetu mbaka. Onkee otatu indile nesimaneko enene twa tsa oongolo kaasihenda moshilongo nopondje yoshilongo mu tu kwathele yakwetu mompumbwe yetu ndjika onene,’Meme Aletta ta ti ngawo.