Clinton metalelepo lyomasiku 11 muAfrica

Amushanga gwIikwapondje gwiilongo ya hangana yaAmerika (United States of America) Hillary Clinton ota talelepo iilongo iheyali muAfrica oshiwike shika.Elalakano lyetalelepo lye oku ulika kutya enenevi ina li dhimbiwa kwAmerika nonando osha fa shili ngaaka.

Etalelepo lya Clinton lyomasiku 11 lili ele okuza sho a ulikwa a ninge omunani gwoodiplomate dhaAmerika konyala oomwedhi hamano dha piti, olya tegelelwa li ka shoneke uuthemba woomeme,noshowo okutsakanena noomeme yamwe mboka ya kwatwa koonkondo noshowo oomeme aanangeshefa.Clinton okwa hala okutunga omakwatathano gakola na Kenya, Nigeria naSouth Africa, no ta ka talelapo woA ngola, DRC na Liberia iilongo itatu mbyoka opo ya zi miita yopashigwana, nopehulilo lye talelepo lye ota piti mo Cape Verde kuume kopothingo kaAmerika. Omahala ge na omakuyunguto menenevi nago otaga ka kundathanwa metalelepo ndi.Clinton ota ka kambadhala okutya sha kuEritrea ngoka a talika oye omuyambidhidhi gwongundu yahomata yaIslama ndjoka tayi kondjitha epangelo lyaSomalia. Clinton ota ka kambadhala woo oku pula iilongo mbyoka ta talelepo opo ya tale nkene uudemokoli uunene ta u galukile moZimbabwe.Amushanga gwopevi gwiikwapondje yAmerika, Johnnie Carson okwa ti Epangelo lye otali vulu okulonga nomilandu dhiikwapondje dha kwata oombinga odhindji. Ta tindi omapopyo kutya Amerika okwa tila omakwatathano ngoka taga kolo pokati kAfrica na China.Clinton ota tameke etalelepo lye moKenya metitatu ehala moka mwa valelwa he ya Barack Obama, unene shoka sha fala mpoka kutya Aafrika oyendji oya tala kepangelo lyObama kutya ota li ningile shike enenevi ndika.Obama sho a li a talelepo Africa omwedhi gwa ziko okwa yi ko Ghana peha lyaKenya, mpeyaka okwa kumike Aafrika ya kwatele enenevi lyawo yoyene komeho mokupula omapangelo omawanawa nosho tuu okukondjitha oombumbo. MuNairobi Clinton ota ka tsa omuthindo kwaashoka epangelo lye li wete sha pondolwa kuAfrika moku dhika po oshiketha shoodola obiliona 20 okukoleka uunamapya noku kondjitha ondjala miilongo mbyoka ya hepa.Oshiketha shika osha li sha ziminwa kiilongo iiyamba ihetatu omwedhi gwaziko mu Italia. Clinton ota ka popitha woo etsakaneno lyiilongo 40 yAfrika mbyoka ha yi landitha nAmerika okupitila mompango ha yi ithanwa African Growth Opportunity Act. Iilongo mbika oyindji yi li pevi lyombuga yaSahara oyo mbyoka yi na omapangelo guudemokoli noshowo omahupilo ga manguluka. Iilongo yimwe muAfrika oyi na uumbanda kutya sho Amerika ta gandja ompito yiipindi ya manguluka kiilongo ngaashi Bangladesh na Cambodia ota ka ehameka omahupilo gawo. Metalelepo ndika okwa tegelelwa Clinton a ka lombwele iilongo yAfrika nokutya nayi humithe aantu yawo komeho ngele oya hala oku kala iinankondo momahupilo.Clinton ota ka talelapo woo oshilando shaGoma muuzilo wa DRC mehala moka oontauki odhindji dha mbombolokele pethimbo lyomadhipago ga nyanyaleka ga ningilwe moRwanda mo 1994. Ota ka tsakanena noomeme yamwe mboka ya ningi iihakanwa yomakwatonkonga. Iigwanahangano otayi tengeneke kutya aakiintu yevule 3 500 oya kwatwa koonkondo mehala ndyoka okuza petameko lyomumvo ngu.