Omukalondjigilile gokupungula ogwa pumbiwa

Omukuluntu gwiilonga yaOld Mutual muAfrica omusamane, Johannes !Gawaxab ota ti osha pumbiwa okukumika aantu ya pungule moshilongo, opo omahupilo gaNamibia ga kale ta ga koko esiku nesiku.

Nonando okwa zimine kutya okwaana iilonga oku li pombanda, ngashingeyi tashi vulika ku li pokati koopelesenda 37 nosho 39, no ta shi dhigupaleke oyendji yomaaNamibia ya pungule,!Gawaxab ota ti, shika inashi kala eipopilo opo andola aantu kaa ya pungule nando osha. Okwa ti elalakano lyoshilongo na li kale okweeta po omikalo nkene Aanamibia taya pewa oompito dhokupungula iimaliwa yawo kutya nee iishona yi thike peni.Uukwaana iilonga moNamibia nando okwa tengenekelwa pevi lwopoopelesenda 37 nenge 39, pahokololo lyomushangwa gwoAfrica Competitiveness gwa gandjwa kolutu lwomahupilo muuyuni muJuni, okwaniilonga moNamibia okwa tengenekwa ku li poopelesenda 54. Oopelesenda ndhika odhi li pombanda ngele omwa kwatelwa mboka ya sa uunye okukonga iilonga,mboka ka yena iilonga noshowo mboka ya mwena ita ya kongo we iilonga. !Gawaxab okwa ti opu na ekwatathano pokati kokupungula nekoko ta li ende nawa lyethimbo ehupi lyomahupilo moshilongo noshowo ekoko lyomahupilo muulethimbo, ta fatulula kutya iimaliwa mbyoka ya pungulwa moshilongo kaantu yamo ohayi gandja oompito dho ku eta po iilonga. Pa !Gawaxab shoka sha pungulwa oshi na oku kala oopelesenda 28 dhiilongomwa yoshilongo ashihe opo ekoko lyomahupilo lyoopelesenda 5 sigo 7 li kalekwepo.Pethimbo ndino okupungula oku li ashike oopelesenda 23 dhiilongomwa yoshilongo ashihe.!Gawaxab ta tsikile ko ta ti, kakele kegwo pevi mokwiikankameka kwaNamibia kiimaliwa yaapunguli yokiilongo yilwe, ngele Namibia okwa kala ta pungula nawa shino otashi ka kutha omutenge gumwe komapepe gEpangelo oku sila mboka ye li mopenzela oshimpwiyu. Okwa ti ngele ando kehe omuntu okwa pungula kashona nakashona nena epangelo itali kakala nokufuta openzela kwaamboka ya li taa vulu okwiisila oshimpwiyu manga ya li taa longo.!Gawaxab okwa thaneke wo kutya Epangelo andola na li kuthe aaniilonga omutenge gumwe gwokufuta otax opo ya vule okupungula.