Ontotwampango yomakwatathano gopangodhi ya tumwa kokakomittee

EGUMBO etiyali lopashigwana(National Council) olya tumu ontotwampango yomakwatathano gopangodhi kokangundu kalyo kena sha nIikwapondje nEgameno opo yi talwe nawa koshigwana.

Egumbo ndika etiyali lyoParliamende yaNamibia ohali talulula ontotwampango adhihe ndhoka dha pitithwa kOshigongi shOpashigwana (National Assembly). Ethaneko kutya ontotwampango ndjika nayi tumwe kokangundu ha ka olya gandjwa koshilyo shegumbo ndika shongundu yoSwapo omusamane Hafeni Ndemula, ngoka a ti ontotwampango nayi talwe nawa unene tuu shono aakwashigwana oyendji ya li ya ti ko sha kuyo pethimbo ya li ya kundathanwa moShigongi shOpashigwana. Yamwe oye yi luku ontotwampango yiilonga yomonanguwi onkene oya pumbwa okutalwa nawa koshigwana, Ndemula ta ti. Etokolo ndika otali fala sigo oompoka kutya ontotwampango ndjika yi falelwe komeho goshigwana kokangundu ke nasha nIikwapondje noshowo Egameno, kEgumbo Etiyali lyoParliamende.Elalakano okupulakena kutya oshigwana otashi ti ngiini kontotwampango ndjika, ko Okangundu kIikwapondje nEgameno taka ngongopo omushangwahokololo kwaa shoka sha popiwa koshigwana opo nee ta ke gu eta poshitaafula megumbo Etiyali lyoParliamende.Ontotwampango ndjika otayi utha pu kale endiki lyokutsakaneka, nokupulakena nenge woo okulesha ooe-maila, osemesa noshowo elongitho lyointerneta kaakwashigwana mwakwatelwa okubaanga ta pu longithwa oInternet.Ontotwampango ndjika oya li ya tindwa kiilyo omulongo yomoParliamende yoongundu dhompilameno petameko lya Juli omanga iilyo omi 32 yoParliamende yoSwapo mbyoka yina ewi lyokuhogolola mOshigongi Shopashigwana ya li ya yambidhidha ontotwampango ndjika opo yi ziminwe mOshigongi shOpashigwana. Manga etokolo lyali inaali ningwa ongundu yoDTA oya li ya indile opo ontotwampango ndjika yi tumwe kokangudndu konakoni kamwe koParliamende, ndele Ominista yOmauyelele, nOmakwatathano, omusamane Joel Kaapanda okwa li a ti inashi pumbiwa.