Yatano ya sa miiponga yiihauto mehuliloshiwike moNooli

AAKALIMO yomoNooli ye li yatano oya si ombaadhilila miiponga yiihauto yi nyanyaleka komatango gEtitano lya zi ko sho ohauto yimwe yi idhenge monkwawo omutse nomutse omanga yimwe yOloli yi idhenge mongombe nokukandoma.

Opolisi ya Shakati oya lopota kutya iihauto oyi idhenge mumwe omutse nomutse, pomukunda Ompumbu mondjila onene ya Shakati nOshikuku komatango lela gokwatoka mEtitano lya zi ko, okabaki koka Ford Bantam nokabaki koka Opel Corsa. mOkabaki koka Ford Bantam,otaku tiwa kutya omwa li tate Likius Shuuveni, mwene gwako, kuume ke Herman Nauyala Kalumbu nomufaalelwa gwawo omukadhona gwoomvula 22 Sarafina Thikameni Kashishiwa. Likius Shuuveni na Herman Nauyala Kalumbu, yomomukunda Oshima mOmbalantu mOshitopolwa sha Musati, otaku tiwa kutya opo ya hulithila poshiponga mpoka, omanga Sarafina Thikameni Kashishiwa, ngoka a za komukunda Omaandi mUukwaluudhi mOshitopolwa sha Musati, a ka hulithila kOshipangelo shEpangelo sha Shakati hoka a li a falwa meendelelo okuza poshiponga mpoka.Omuhingi gwokahauto okakwawo koka Opel Corsa, Opolisi tayi ti kutya omeme Kristofina Alweendo, okwa hupa moshiponga shoka noku li ta mono epango mOshipangelo shOpaumwene sha Ngwediv hoka a falwa meendelelo konima yoshiponga shika.Komatango ogo tuu ngoka gEtitano lya zi ko, ohauto yololi yEpangelo oyi idhenge mongombe mondjila yongalama yopokati kOshikuku na Elim mUukwambi mOshitopolwa sha Musati nokugalangata ko. mOshiponga moka,, Opolisi otayi ti kutya, omwa sile Nabot Gabriel gwokomukunda Okapuku, tashi vulika hoka kokOndonga mOshitopolwa sha Shikoto nOmupolisi gwomOshakati Constabela Abraham Kandau, a li omufaalelwa mOloli ndjoka. Omuhingi gwayo,tate Titus Nandjiwa nomufaalelwa Elago Kashidhimbwa, oya hupu moshiponga moka noye li kwali taya mono epango mOshipangelo sha Shikuku. Nakusa Likius Shuuveni, ngoka e li omonamati gwomunangeshefa a tseyika nawa gwomOmbalantu tate Ausiku ya Shuuveni, okwa li naye omunangeshefa mwene gwOfaabulika yiipilangi, ano yIipoleki mEndiki lyOongeshefa lya NDC pOutapi mOmbalantu.Oshifo shetu otashi gandja omahekeleko koonakuthigwapo atuheni.