Oonakugwayele mofaalama yOngomboEast mompangu

IILYO OMULONGO niihetatu yehangano //Naosan /Aes Committee mboka ya kwatelwepo kopolisi mehulishiwike lyaziko oya holoka mompangu yaMengisitarata gwaVenduka Omaandaha.

Ongundu ndjika oya holoka mompangu taya tamanekwa sho ya tindi okuthigapo ofaalama yOngombo East ndjoka yi li kuuzilo woVenduka. Ongundu ndjoka ya kwatelamo aanona aashona yane oya mangululwa konima shono Mengisitarata John Shuuveni eya pe okwiifutilamo noodola 200 kehe omuntu. Tango mengisitarata okwa li eya pe yi ifutilemo noodola 500 ndele sho ye mu lile kutya iimaliwa mbyoka ka ye yina shaashi iha longo okwiifutilamo okwe kulukithile pevi noodola 300. Ompangu oye ya lombwele kutya oyi ifutilamo ndele inaya uvika ya shuna popepi nofaalama yOngomboEast nenge ndjoka yOngombo West.Ongundu ndjika oya kwatelwepo mOlyomakaya pehala mpoka ya ningi omasiku yuunga ontanda yawo popepi nofaalama yOngombo East. Aapolisi oye endele ongundu yaantu yeli lwopo 150 sigo 200 mOlyomakaya tayi teya po ootenda dhawo nokudhitika aawiliki yongundu ndjika omanga mboka inaya mangwa ya falwa komagumbo gawo ogendji ge li moVenduka. Shika oshalandula elombwelo lya gandjwa komupangula gwopakathimbo John Manyarara mEtitano lyaziko. Ominista yOmavi nOmatululo, Yegameno lyoshigwana , naandjoka yIilonga odho dhali dha ningi eindilo kompangu.Oministeli ndhika odha fala okangundu ko//Naosan /Aes Committee kompangu. Ongundu yaantu mbaka oye ya pofaalama yOngomboEast muJuli tayi popi kutya oye na uuthemba molwaashoka evi ndyoka oolyoo yinakulu anuwa, no ya li ya hala oyene yofaalama mboka yeli omvalele dha Italia dhikuthwemo mofaalama. Aapolisi oya li yiithanwa opo yiinyengithe aantu mbaka, ya zimo ashike mofaalama ndele taya ungu oontanda dhawo moshipambu shofaalama yepangelo Ongombo West. Nonando Ominista yevi naandjoka yEgameno lyoshigwana oya li ya lombwele aantu mbaka ya shune komagumbo gawo yo oya ndjike oonyala mevi kutya yo itaya zipo mpo. Shika osha fala nee sigo oompoka kutya aaleleli yongundu ndjika yakwatwepo mehulilo shiwike.Mehokololo ndyoka Ominista yOmavi nOmatululo yagandja kompangu, Alpheus !Naruseb okwa ti aantu mbaka shoka ya ningi noya li taa ningi ota shi tsu ondumbo nompango yoshilongo. Aatamanekwa oyiikuthile ompango momake gayo yene noya tsikile okudhina epangelo. Eihumbato lyawo olyo eponokelo lyuukilila ompango nelandulathano, ombili nengungumano mevi lyomapendafule. !Naruseb okwa ti oshinima shevi kashishi shokudhanwa nasho molwaashoka oshikumungu sha simana shaguma oshigwana ashihe.Ta ti nonando oku uvite ompumbwe yawo yoku mona evi ita tsukumwe nomukalo ngoka ya longitha okwikuthila shaali pampango.Ominista yEgameno lyOshigwana Nickey Iyambo naye okwa gandja ehokololo lye nokutya okugwayela mOngombo East kasha oshinima tashi idhidhimikilwa nando. Ta ti omaihumbato kaa ge li pampango oga eta omalimbililo kepangelo molwaashoka oga li taga yonagula ompango,ekalekepo lyompango nelandulathano,ombili, nengungumano moNamibia.Iyambo okwa tsikile tati shika ngele osheethiwa otashi gandja oshiholelwa kuyalwe mboka wo nayo taya ka tameka okugwayela mofaalama dhayalwe kondje yompango.Ta gwedha ko tati ngele kehe gumwe moshilongo okwa pitikwa opo a pule a pewe evi lyooyinakulu shaampoka ta li adhika shika otashi eta evundakano enene moshilongo. Ota shi ka eta onkalo ka yi shi ombwanawa nombili nengungumano, no tayi fala sigo oompoka kutya uuthemba waantu okukala nomaliko otau lyatelwa pevi ngaaka. Ekotampango lyoshilongo olya pa kehe omuntu uuthemba okukala neliko molupe kehe kutya olwevi nenge omatungo