Oongundu dhOompilameno inadhi ka mona sha momahogololo

PETHIMBO ta popitha oshigongi shOswapo mOshakati, Olyomaka ga zi ko, Gavena gwa Hangwena omusamane Usko Nghaamwa okwa indile oshigwana shi ka hogolole Oswapo nOoperesenda ethele nasha ndele oongundu dhOompilameno tadhi ka za mo owala.

Nghaamwa okwa li omupopi omunene pOshigongi shoSwapo sha ningilwa mOshakati omutenya gOlyomakaya ngaka ga zi ko. ‘Swapo oye a lwila emanguluko lyoshilongo shika. Oye e shi mangulula nokwiigidha ombepo yedhiminathanepo. Ta tula po ombili, uukumwe, elandulathano, euvathano nengungumano moshilongo,mokati koshigwana sha Namibia, ashike opu na aantu yamwe yoongundu dhompilameno oompe noonkulu ya hala okuyona omalandulathano goSwapo omawanawa, nokwa indile oshigwana shOswapo shika hogolole nawa nokweekelahi kokule oongundu ndhoka. Nghaamwa ta gwedha po ta ti oongundu dhompilameno, okuza ngaa ko DTA, ohaa kala taa kondjitha Oswapo, ashike iha ya piti nongashingeyi Nghaamwa ta ti, ombelewa dhawo odha pata. Nodho RDP ndjoka opo ya totwa po, Nghaamwa ta ti, odha tameka nale ta dhi pata,molwashoka odha totwa kaantu kaye na elalakano ewanawa na kaye shi mpoka ya thinda. Ta ti Oswapo oyo ashike yi na omalalakano, yi shi mpoka ya za, mpoka yi li naampoka ya thinda. Nghaamwa ta ti, Swapo oye ashike ongundu tayi vulu okupangela oshilongo shika noshigwana shamo. Onkee tu thikameni utale ndele tatu ka dhengeni oongundu ndhoka momahogololo ngoka twa thindeni, opo Swapo, a ka tsikile nokupangela Namibia nokukaleka mo ombili, uukumwe, elandulathano nengungumano, ngashi e shi ningi ethimbo alihe ndyoka lya zi ko sho a mangulula oshilongo shika,’ Gavena Nghaamwa ta ti. Okwa tsikile ko ta ti omolu ombili ndjoka ya etwa mo kOswapo, aanangeshefa kutya nee oyomoshilongo nenge oyopondje, otaya matuka taye ya okutunga nokuninga oongeshefa dhawo moNamibia nombili, oshoka Epangelo lyOswapo olya tula po omalandulathano ge li nawa nogeuvathano. Omusamane Nghaamwa ta ti, mboka yoongundu dhOompilameno, ohaya popi iifundja. Taya lombwele oshigwana kutya otaye ke shi pa iilonga, yo yene nayo kaye na iilonga. Taya ka gandja omeya, yo yamwe nayo pomagumbo gawo kapu na omeya, ya nyengwa okuga eta po. Taya ti otaya ka gandja iikulya yoshikukuta, omanga ye li ya sondjala, kaye na iikulya. ‘ Sho ya kala ya nyengwa nale, opo neetaya vulu oku shi ninga ngaashiingeyi. Nghaamwa ta ti kutya Oswapo hela ya yi koshipundi oshilongo sho otashi tameke okuhuma komeho. Swapo a tameke okutunga oosikola, iipangelo, oondjila, oondoolopa oonene ngashi ndhika dhOoshakati nosho tuu, oositola oonene, ngashi ndhoka dhOoyetu, Oogeima, ndhoka tadhi adhika mOshikango mOhelao Nafidi, mOndangwa moka nosho tuu, adhihe odha tungwa po omolu ombili ndjoka ya etwa kOswapo moshilongo.Okwa indila wo ayehe ya pukithwa nokukandjoina Oongundu dhOompilameno ya galukile kOswapo. ‘Galukeni,ileni kegumbo, zeni ko hoka mu li mwa pukithwa. Atuheni ileni tu gongaleni megumbo lyetu lyOswapo. Aanona mboka mwa valwa konima yemanguluko, ina mu za mo moompadhi dhaakuluntu yeni.Nghaamwa ta ti okuuvitile ohenda mboka ya kala Omapendafule gEkondjelomanguluko, ya za mo mOswapo. Ta ti hoka ye li itaya ka monena ko we esimano lyUupendafule.