Okommissi yOmahogololo ya tsakanene noongundu dhopolitika Oshakati

OMBELEWA yOkommissi yOmahogololo moShana mewiliko lyOmunashipundi gwayo meme Ndilimeke Mavulu, mEtitatu lyoshiwike sha yi oya ningi oshigongi shomauyelele ge na sha nOmaishangitho gAahogololi ga gwedhwa po, ngoka taga ka kala ko okuza meti 17 Septemba 2009 sigo eti 30 Septemba 2009 oshilongo ashihe.

Oshigongi osha li nee sha thikama mAanambelewa yOkommissi yOmahogololo ya Namibia mOshitopowla sha Shana mewiliko lya meme Mavulu, Aawiliki yOongundu dhOopolotika mOshana, Aahogololwa ye li kuyo yene, Ookaansela dhIitopolwa nOmagumbo, Aaleli yopamuthigululwakalo, Aawiliki yElongo, Omahangano gaashi gOpapangelo, Omahangano gUuthemba waantu, Etanga lyopolisi nolyEgameno lya Namibia, Omahangano gAaniilonga, Aanandjungu mokati kOshigwana noshowo Iikundaneki.Meme Mavulu, ngoka ta monika kongodhi yonomola 0811283089, okwa tseyitha aanambelewa aakuluntu yOkommissi yOmahogololo pethimbo lyOmaishangitho gaAahogololi ga gwedhwa. Ta ti oyo Julius Shongolo, ngoka e li omupeha gwe nonomola ye oyo 0812432887, Nambinga Haimbodi na ye e li omupehakwatheli gwe nonomola ye oyo 0812509600 noshowo tate Peter Naniga, ngoka e lile po iikwaniipangitho nonomola ye oyo 0812453869 na meme Venas Mweutota ngoka e li gumwe gwomaalongi nAapukululi yAaniilonga mOkommissi yomahogololo.Meme Mavulu ta ti, oye na aanambelewa aakuluntu yomiikandjohogololo ye li omulongo (10) noshowo aanambelewa yokunyola oshigwana ye li omathele gatatu, omilongohamano nomugoyi (369).Omahala gomainyolitho moShana ashihe oge li 186. Aanambelewa aakuluntu yOmainyolitho goshigwana oya endithwa po nale muule womwedhi gwa zi ko, omanga mboka yopevi taya tamekwa okweendithwa po okuza meti 5 Septemba sigo 15 Septemba 2009.Meme Mavulu ta ti Aanambelewa yawo mbaka oyo taya ka kala taya wilike omainyolitho ga gwedhwa po gaahogololi. Ta ti ayehe mbaka oya lombwelekeka nawa noya uvako kutya kaye na nande okulonga moluuwanawa wOngundu yOpolotika yontumba, notaya ka longa yaa na ombinga nandenande.Meme Mavulu, okwa ti kutya mboka ta ye kiinyolitha momainyolitho ngaka ga gwedhwa po, oyo mboka opo ya gwanitha oomvula 18, mboka ya kanitha uukalata wawo noshowo mboka ya lundulukila kiitopolwa yilwe okuza sho ya shangelwe omathimbo ga zi ko.Meme Mavulu ta ti, oye shi wete kutya otapu ka kala omashongo ogendji, ashike yo oyi ilongekidha oku ga tsakaneka nokwoopaleka ashihe tashi ka kala, sha pumbwa okwoopalekwa.Oongundu dhOopolotika dha li mo, odha kutha ombinga moonkundathana, ndhoka meme Mavulu a ti kutya odha etwa po, yi ipe omayele noyi igwedhele ko nokwiipukulula.Yamwe yomoongundu dhOopolotika, oya gandja omaudhigu gawo, ngashi kombinga yOmaishangitho gUukalata kaakalimo yomoondoolopa, itaya uvithwa ko nawa kombinga yokushangwa okakalata komahogololo gOpaupresidende nogOshigongi shOpashigwana naangoka gOmalelo goondoolopa.Okommissi oya pulwa wo yi kale yi na Uumepa woondoolopa. Aaleli yOopolotika yamwe oya gandja omanyenyeto gawo kutya Ookaansela yOswapo oye li po taya longo po iilonga yokommissi yOmahogololo noya indila oshinima sha tya ngawo shi hulithwe po nziya.Oonkundathana odha li wo poshinima shekalelopo lyoonakushangwa uukalata womahogololo. Taya ti oshinima shomuntu gumwe ta kalele po aantu omulongo inashi opala, nenge kutya mwene gwomukunda na kalele po aantu ye ayehe, mboka ya pumbwa okukalelwa po, nasho inashi opala.Meme Mavulu nAanambelewa ye ya li poshigongi mpoka oya ti kutya oya uvako komanyenyeto gaanashigongi shoka notaya ka tala kutya otaya ka ungaunga nago ngiini.