RDP okwe ya okukalelela; Hidipo Hamutenya ta ti

PETHIMBO ta popitha oshigongi shoRDP pOkongo moHangwena Osoondaha , Omupresidende gwo RDP omusamane Hidipo Hamutenya, okwa ti kutya Ongundu yawo oye ya okukalelela, naamboka taya ti kutya kayi na oshilonga, otayi ifyundjaleke nokwiiyuvitha ombili yoyene sho ye wete kutya oRDP oya hwama notayi pula komeho.

Omupresidende gwo RDP Hamutenya, ota ti RDP ota longo neitulomo enene, noonkondo dhe adhihe opo omathaneko ge gokweeta po elunduluko ga kale ga sindana. Ta ti mOlyomakaya oya ningi oshigongi mOpuwo mOkaoko moKunene shoka sha li sha kalwa kaantu ya hala elunduluko.Ta ti miitopolwa ayihe 13 ya Namibia oya unganeka mo nawa noya tula mo oombelewa muule wethimbo lyokukala po kwOngundu yawo lyoomwedhi dhontumba, dhili 12 lwaampoka. Ya tota iikandjo, iitayi nosho tuu oosekshina dhogundu yawo apehe.Hamutenya ta ti oshigwana osha pumbwa elunduluko molwashoka Swapo ngoka a kala uule woomvula omilongombali ta pangele, okwa nyengwa okweeta po elunduluko moNamibia. ‘Shi nda thiki ongula yonena mOkongo, mboka nda tsakanene nayo, otaya ti yo sigo oompaka inaya makela iiyimati yEmanguluko lya Namibia.Hamutenya ta ti, oSwapo oya tila RDP molwashoka, oku shi shi kutya aaleli yo RDP oye shi oshindji noye shi sha uuna tashi ya pokutula po ooprograma dhokolela dhi na sha nehumithokomeho lyoshilongo naantu yamo.Hamutenya ta ti,oshinima shimwe oshinene sha nyenga Swapo nEpangelo lye osho Elongo lyoshigwana. Hamutenya ta ti uunona otau ndopa nokutumwa koNamcolo hoka,nomanga oundji wu li meekolonela dhomapandaanda giilando tau elaela nokukonga omahupilo.Aanona yamwe taya tameke nokuli okunwa omalovu niingangamithi omolu onkalo ndjoka yokwaana oosikola niilonga. ‘Okuya kwaanona moonkalo dhi li ngeyi,kashi shi nande unene ondjo yawo. Ondjo yoSwapo nEpangelo lyayo, ndyoka kayi shi okutula iinima momalandulathano ge li nawa gokugandja ekwatho koshigwana nokuyambula po oshilongo pamona nosho tuu. Okwa ti Swapo nEpangelo lye kaye shi okukwata nokulongitha iimaliwa nawa. Otaya etha iimaliwa tayi kana, tayi liwa po, tayi longithwa nayi nokulongithwa miinima mbyoka hayo yi na naanaa oshilonga.Omusamane Hamutenya ta lombwele oshigongi kutya RDP oyina ooprograma dhokweeta elunduluko enene moshilongo. Ashike nee Ooprograma ndhoka otadhi vulu ashike okutulwa miilonga ngele oRDP oya hogololwa, momahogololo ngoka taga ka ningwa pehulilo lyOmwedhi nguka. Hamutenya ta ti ngele oshigwana osha hogolola oRDP nena nashi kale sha shilipalekwa kutya Elongo,Uuhaku, etungo lyoondjila nomagumbo, egandjo lyomeya nolusheno nosho tuu yilwe otayi ka ningilwa oshigwana pamuthika gwelunduluko enene.Swapo aluhe okuuvite nawa nge ta longo naantu kaye uvite ko. Onkee onda hala ndi mu lombwele kutya natu ka hogololeni RDP omolu elunduluko nokutula iinima melandulathano.Onda hala ndi mu lombwele kutya Swapo ota ende ta tilitha aantu opo a adhe omalakano ge kaage li nawa, ga nyata. Inamu kala we mwa tila nomwa tilithwa. Uumbanda oshinima oshiwinayi. Tse itatu tilithwa nande okulye, na itatu etha nande tu kuthwe mondjila yetu yoshili yokweeta elunduluko mu Namibia. Otwa tokola, na RDP okwe ya okukalelela. Ka hogololeni RDP, oshoka itamu kiipa nande ombedhi sho mwe shi ninga,’ Omusamane Hamutenya ta ti ngawo.