Ovo tava tamanekelwa oshibofa shoFishrot ove wete kutya oihokolola yavo otashi dulika ashike i ka ningwe mo2026

Vamwe ovo ve li moshibofa shoFishrot ova ti otava ka kala ve lilongekidila oihokolola yavo metata lomudo tau ya ile petameko lomudo 2026.

Eshi okwa li sha lombwelwa omhupanguli ta vatele Moses Chinhengo eshi kwa li ovalumenhu ve li omulongo ovo tava tamanekelwa oshibofa shoFishrot kwa li va holoka komhangu yopombada yaVenduka Etitano.

Chinhengo okwa li a undulila komesho eemhangu opo a mone ouyelele kutya oihokolola yavo otai ka twikila naini, sha shikula etokolo laye omo a ekelashi eindilo lovafeekelwa vatatu olo tali pula omapulo e li aheyali opaveta a didilikwe ndee taa tuminwa komhangu ya shiya ko opo a tokolwe.

Ovafeekelwa vatatu ovo va pula Chinhengo a tumine omapulo opaveta komhangu ya shiya ko ovo minista nahaendendjai mukulu Sacky Shanghala, James Hatuikulipi naPius Mwatelulo.

Chinhengo Etitano okwa ti eshi oshibofa kwa li sha yandjwa kuye, okwa li a lombwelwa kutya oihokolola otai tameke momafiku 02 Oktomba odula ya dja ko.

Osho inashi ningwa, nande oihokolola yopetameko oya tameka nale muDesemba, ashike okwa li nee ya piyaanekwa keindilo laChinhengo lokudja mo moshibofa omu olo la dopa, olo kwa li la landulwa keindilo laShanghala, Hatuikulipi naMwatelulo olo inali pita.

Konima eshi Chinhengo a pula oihokolola, haende novatamanekwa vanhe vehe na ovakalelipo vopaveta kutya onaini oihokolola tai twikile, omupedu tamanekindjai Ed Marondedze okwa ti epangelo ole li longekida paife.

Oshikumungu eshi osha kala shi li ashike poihokolola yopetameko oule weedula di dulife pumbali paife okudja ngaa muApilili momudo 2021 fiyo omafiku oihokolola tai tameke muOktomba odula ya dja ko kwa li a tulwa po nonghee nee oihokolola nai tameke paife, Marondedze osho a ti ngaho.

Shanghala ou ina kalelwa po kuhaende paife ngaha, okwa ti oku na ehalo oihokolola i tameke diva ngee a mono omukalelipo wopaveta, ashike ita dulu nee okupopya kutya osho otashi ka ningwa naini.

Okwa ti vali etengeneko liwa olo ta dulu okuyandja kutya ota ka kala e lilongekidila oihokolola naini otali kala muAuguste momudo 2025.

Hatuikulipi, oo naye ehe na omukalelipo wopaveta okwa ti okwa tengeneka oihokolola i kale komuJanuali momudo 2026.

Mwatelulo naye ina kalelewa po kuhaende okwa ti okwa teelela a ka kale e lilongekidila oihokolola konima yeemwedi omuwoi okudja paife, muJuni 2025.

Omufeekelwa wotete moshikumungu, Ricardo Gustavo, okwa lombwela omhupanguli kutya ota ningulula etokolo laye lokutameka oihokolola ehe na omukaleleipo wopaveta.

Okwa ti omafiku oihokolola muFebuluali naApilili modula tai ya oku li nawa kuye, Gustavo osho a ti ngaho.

Omukalelipo ashike umwe wopaveta a kalela po umwe womovatamanekwa, Milton Engelbrecht, e li po natango ta dulu okuya komesho noihokolola odula aishe ei.

Engelbrecht, oo a kalela po omukulunhuwiliki mukulu wehangano leeshi lopashiwana laNamibia Mike Nghipunya, Otneel Shuudifonya naPhillipus Mwapopi okwa manguluka okudja momafiku 02 Septemba nosho yo omafiku amwe momwedi tau ya, muKotoba,Desemba naApilili odula ya dja ko, omhupanguli osho a lombwelwa ngaho.

Haende Mbanga Siyomonji, oo a kalela po Nigel van Wyk, okwa ti oku na oilonga odula aishe ei nota ka kala ashike a mangaluka muFebuluali naApilili momudo tau ya.

Omukalelipo wopaveta waminista mukulu weeshi noinima yomefuta Bernhard Esau nomufeekelwa pamwe naye oshitenya shaye Tamson Hatuikulipi, Florian Beukes, naye ota ka kala ashike a manguluka momudo tau ya, omhupanguli osho a lombwelwa ngaho.

Chinhengo natango okwa li a lombwelwa kutya Shanghala, Hatuikulipi naMwatelulo ova yandja omikanda dimwe dipe komhangu omo va holola kutya ova hala okukondjifa Chinhengo ongomhupanguli ta vatele a hoololwa.

Ova hala vali okupula omhangu ya shiya ko i talulule oihokolola yomhangu oyo ovafeekelwa kwa li va pulwa va yandje omahokololo avo kombinga yoinima imwe oyo tava tamanekelwa vehe na ovakalelipo.

Chinhengo okwa pula epangelo, oohaende nosho yo ovafeekelwa ovo inava kalelwa po opo va yandje omikanda tadi popi nghee oihokolola i na okuya komesho ngeno manga etitatu loshivike eshi inali koya.

Ota ka yandja enyamukulo kombinga yoihokolola mEtivali loshivike tashi ya, Chinhengo osho a ti ngaho.