Epangelo ola tula eemiliyona N$700 moMeatco moule weedula mbali

Ominista yoimaliwa Iipumbu Shiimi oya ti epangelo ola tula oshimaliwa shi fike peemiliyona N$700 mehangano lokulandifa onyama moNamibia ledina Meat Corporation of Namibia (Meatco) okudja momudo 2021 fiyo 2023, oimaliwa oyo kwa li ya pumbwa okulongifwa moinima imwe ya fimana yoshiwana.

Shiimi okwa li a lombwela oThe Namibian oshinima eshi Etitano.

“Pokati komudo 2021 no2023, epangelo okwa li la longifa oshimaliwa shi fike lwopeemiliyona N$700 okuyakula nofuta eengunga daMeatco, osho yo okuyambidida eyokomesho laye noilonga,” Osho a ti ngaho.

Minista woshimaliwa okwa ti ehangano otali li po oimaliwa yovafuti voifendela oyo kwa li ya nuninwa okuyandja omayakulo a pumbiwa.

“Omaliko oo okwa pumbiwa okuvatela meemumbwe doshiwana ngaashi omehongo, moundjolowele, mokutunga omaumbo nosho yo meependjela,” Osho a ti ngaho. Shiimi okwa ti oministili oya limbililwa neenghono koudjuu wokulongifa oshimaliwa shepangelo mokukulila mo Meatco.

“Otwa tambula ko kutya oilonga yaMeatco inai kala i li nawa oule weedula dishona da pita. Ongomukufimbinga, oministili otai twikile nokukala ya limbililwa kombinga yefininiko loshimaliwa shepangelo tali etwa kokuhaninga nawa kwa Meatco,” Osho a ti ngaho.

Oivike ivali ya dja ko oThe Namibia okwa li ya lopota kutya Okabinete oka pula Shiimi opo natango a yandje oshikako shimwe shoilonga komukulunhuwiliki woMeatco Mwilima Mushokabanji shaashi oshikako shaye otashi ya pexulilo.

Oministili yaShiimi otai monika ya fa inai hala nawa okuyandja oshikakoilonga shimwe, omolwomalimbililo kombinga yokuhaninga nawa kwehangano.

Odula ei Meatco okwa li a shiivifa kutya okwa ninga oveenisha yoshimaliwa shi fike peemiliyona N$109.

Ashike nee, minista woimaliwa okwa ti oilonga yehangano eli oya kala iheli nawa oule weedula dishona nande kwa li kwa lopotwa kutya ola ninga oveenisha moikundaneki.

Shiimi okwa ti Meatco okwa kala luhapu ta nyengwa okufuta eengunga daye keembaanga.

“Oministili yoshimaliwa oya konakona okukanifa oko kwa kala moMeatco, oko kweeta ehangano li ha dule okuwanifa po omaudafano alo okufuta eengunga,” Osho a ti ngaho. Okwa ti oministili konima oye lidopa mo okuyandja oshimaliwa shepangelo okupitila mombaanga yomayambulepo yaNamibia yedina Development Bank of Namibia (DBN).

“Oshimaliwa osho sha dja kombaanga oku osha pitika Meatco opo a fute eengunganga daye odo kwa li inadi futwa nokwa li yoo kwa yandjwa oshimaliwa shi yambidide oilonga i ye komesho oule wokafimbo kashona.” Shiimi okwa ti oministili oya tota po ongudu opo yuungaunge noupyakadi woshimaliwa shaMeatco.

“Meenghendabala dokumona enyamukulo li li nawa efimbo lile kombinga youpyakadi woshimaliwa shaMeatco, oministili oya tota po ongudu, mu na ovanailonga va dja koministili yoshimaliwa, koministili younamapya nounaimuna, omeva nomatendululo omadu, moMeatco nosho yo koDBN,” Osho a ti ngaho.

Shiimi okwa ti, ongudu oyo kwa li ya totwa opo yuungaunge noupyakadi woshimaliwa moMeatco oya eta mo ehangano ledina Ombu Capital opo li vatele moshinima shi li ngaha.

“Ombu Capital okwa li a kutwa opo a ninge omakonakono kutya oshike naana hashi eta okukanifa oshimaliwa moMeatco nosho yo okuninga omaindilo omikalo dipe doilonga mehangano,” Osho a ti ngaho.

Shiimi okwa ti Ombu Capital okwa li ya yandja olopota oyo ya konakona oilonga yomeni laMeatco nosho yo omakonakono omoule okoshikondo shonyama yongobe.

Konima yeenghundafana novakufimbinga vakula mongeshefa omu, mwa kwatelwa ovanafaalama vashona naavo vakula, epangelo ola konga omukalo ndee tali yandje elombwelo koministili opo i longele kumwe noMeatco, osho a ti ngaho.

Olopota yomomafiku 14 Juni 2023, i li koshi yoshipalanyole ‘Meatco Review Report’, ya dja komuningi womakonakono oshimaliwa wehangano lOmbu Capital Vetumbuavi Mungunda, okwa pula epangelo opo li yandje po oipambuliko i fike peepelesenda 85 koikondo yopaumwene.

Mungunda okwa tengeneka ngeno etotepo lehangano tali ifanwa New Company (NewCo), olo tali kala li na eepelesenda 85 doikondo yopaumwene ndee epangelo tali kala ashike li na mo eepelesenda 15.

Mungunda okwa ti, oshinima eshi otashi ka pitika ovanangeshefa vopaumwene opo va ka dule okweeta oshimaliwa shi fike peemiliyona N$300 fiyo N$400.

“Ngee omukalo upe oo wa pulwa owa kolekwa, ovanangeshefa vopaumwene otava ka pulwa opo va yandje shi fike pamwe, mwa kwatelwa oshimaliwa shoilonga kehangano lipe shi fike peemiliyona N$300 fiyo N$400,” Osho a ti ngaho.

Odula ya dja ko oThe Namibian okwa li ya lopota kutya omukulunhuwiliki waMeatco Mwilima Mushokabanji okwa ti ehangano ola pumbwa oshimaliwa opo li dule okwaalukila kouwa.