Eendado domaumbo koLÜderitz oda ya pombada moule wodula imwe

Mayola wodoolopa yaLuderitz Phil Balhao okwa ti eendado domalukalwa modoolopa oda ya pombada okudja peepelesenda 30 fiyo opeepelesenda 50 odula ya dja ko.

Omahooli oo a monika koshitopolwa oko oo taa eta oshinima shi li ngaha. Ashike nee, oshinima eshi otashi dulika natango shi kale shi na omwawii eendado tadi i pombada domaumbo nosho yo edu.

Oshinima eshi tashi ningwa koLuderitz paife ngaha hapo lwotete tashi ningwa osha kala nale nokuningwa meedoolopa omo mwa monika omahooli mounyuni aushe.

Ovandjeko nosho yo ovanangeshefa vokondje yoshilongo, ovo inava pumbwa omikuli okudja keembanga daNamibia ohava lande ashike omatungo aa noshimaliwa shi li peke. Ovakalimo mwa kwatelwa ovafyoona ohava mono nee oixuna keendado deehiila odo hadi i pombada shaashi ongushu yedu ohai londo.

Eshi otashi twala ovanhu ovo hava di momalukanda omoLuderitz meenghalo didjuu. Eendado dedu tadi i pombada otashi dulu nokufininika ovanhu ovo ve na oiyemo i li pedu va dje mo filufilu moLuderitz.

Balhao okwa lombwela oThe Namibian oshivike eshi kutya kakwa li nande a kumwa koshinima eshi shondado yomatungo tai i pombada.
“Omahangano ahapu opaunyuni moshikondo shomahooli noshimoko okwa li e ya kufye taa pula edu, ashike opu na ashike edu lishona,” Osho a ti ngaho.

Mayola natango okwa ti vali muni okwa li a pula epangelo opo li wedele odoolopa.

“Okuwedela ashike odoolopa taku dulu okuxwepopeka onghalo ei,” Osho a ti ngaho.

Balhao okwa ti ehangano ledina Sperrgebiet Diamond Mining ola kufa ko oikwamina koNamdeb moLÜderitz, nola li li meenghundafana opo li wedelwe.

Eemwedi mbali da pita, Balhao okwa li a popya kombinga yomumbwe yeyambidido loshimaliwa okudja kepangelo, komahangano epangelo nosho yo kovayandji vomaumbo e na ombilixa.

“Otwa pumbwa oshinima tashi dulu okupotokonona onghalo yeyambulepo loikwafabulika yaNamibia unene ngaa moshitopolwahoololo sha//Kharas,” Osho a ti ngaho.

OSHIMALIWA SHIHAPU

Ovanambelewa vombaanga ovo va popya noThe Namibian omwedi wa dja ko ova ti omaumbo ahapu paife otaa landifwa koshimaliwa shidule ongushu yao.

Ovakonakoni vongushu yomatungo koshitopolwa shaLuderitz ova ti, omaumbo ahapu paife otaa landifwa koshimaliwa shi fike poN$200 000 fiyo opoN$500 000 shi dulife ongushu yao.

Eshi osha hala okutya, eembanga itadi dulu okuyandja oshimaliwa tashi dulu okulanda etungo alishe, osho sha eta okulanda kuhapu kuningwe pefimbo ashike opo.

Eyopombada leendado koLuderitz ola etwa kovanangeshefa vokondje ovo tava longifa eedola daAmerica kondado oyo, pandodo yopaunyuni, okwa talika ko kutya oku na ombilixa neenghono.

Omahangano ngaashi Kelp Blue, oproyeka yoHyphen Hydrogen Energy, nosho yo omahooli noshimoko, okwa teelelika a ka twale eendado pombada natango, shapo ongeenge oupyakadi kombinga yedu wa kandulwa po.

OSHO TASHI PULWA

Okukandula po oupyakadi womumbwe yedu, Balhao okwa pula opo kuyandjwe edu limwe lomaumbo ovanhu ovo ve na oiyemo i li pedu nosho yo okutunga omalukanda avali, eekilometa 25 fiyo 50 okudja moLuderitz, unene ngaa kombinga yokuushilo pomunghulo wopate oyo ya dja koAus.

Oshinima eshi shokutunga omalukanda avali ashona pondje yodoolopa otashi kundafanwa paife nepangelo.

Ovakalimo ova tengeneka kukufwe po eengaba daSperrgebiet di pitike oLuderitz i kale i na okadoolopa kashona pomunghulo oko ta ka dulu okukala ke na ovanhu ve li 16 000, kaye komesho nawa popepi nondjila yaAus ya yuka konhele oyo i shiivike nawa kutya odoolopa yoilulu yedina Kolmaskop.

OVASHIINDA VOKAWE

Omaupyakadi oo a taalelwa kodoolopa yaLuderitz otaa hepeke yooOranjemund, odoolopa oyo i li eekilometa 400 kokule neengaba daSouth Africa.

Omukulunhuwiliki wodoolopa yaRanjemund Charles Kakuru, okwa ti, ova wedela odoolopa nomalukanda 16 nosho yo eenhe da wapalekwa di li 200 fiyo 300.

Ovanambelewa voikwanghono okwa li va talela po odoolopa, ashike ovanambelewa vodoolopa ova ti kapu na nande osho sha ningwa po ovanhu va lundululilwe konhele oko.

Kashi shi ashike omahooli taa twala ongushu yomatungo pombada kOranjemund.

Omukonakoni wongushu yomaliko okwa ti: “Okuulika kutya mOranjemund omu na omumbwe yeenhe dokuhiila, omunhu umwe oha hiila ongalashe ihe na onhele yokwiikoshela nokukoshela, koshimaliwa shi fike poN$5 000 komwedi.