Ongudu yoPopular Demcratic Movement (PDM) okwa li ya ninga oshoongalele shayo shokuhoolola ovaleli vongudu nosho yo shokulombwela ovakwashiwana kutya ngee ya findana omahoololo oo twa taalela otai ka ninga omalunduluko atya ngahelipi mexuliloshivike koKatima Mulilo.
Ovaleli ovo va shuna peenhele davo ongaashi omukwateli komesho wongudu McHenry Venaani, omupedu waye, Jennifer van den Heever, hamushangandjai Manuel Ngaringombe, omupedu waye Linus Thobias, omunashipundi wopashiwana Diederick Vries nosho yo omutonateli nomukwateli komesho woshimaliwa Nico Smit.
Ongudu oya weda mo vali eemhito mbali dakula melelo: omupeduwiliki woshimaliwa Sydney Ndumba nosho yo omupedu nashipundi wopashiwana Rosa Mbinge-Tjiuendo.
Venaani okwa li a hoololwa puhe na omukondjifi a ninge pelesidente wongudu nosho yo okandidate oko taka ka kalela po ongudu momahoololo oupelesidente muNovemba.
Omundjadjukununi woikwapolitika Rui Tyitende okwa ti oidjemo oyo ya dja koshoongalele shoPDM oya holola kutya ongudu inai li longekida okuyambula po ovanyasha.
“Eeno, opu na ovanyasha vahapu ovo ve li oilyo yopaliamente, ashike paife efimbo la wapala okuvayambula po nokuvatula pondodo i li nawa mongudu,” Osho a ti ngaho.
Tyitende okwa ti okutameka oshinima shipe nosha yela ovakulunhu ova pumbwa okweenda tava i.
“Shaashi Venaani itaa luka vali a mone oshikako shitine, olyelye te ke mu pingena po konima yeedula nanho? Nico Smit? Elma Dienda?” Osho a pula ngaho.
“Ondi wete kutya okwa li pu na onghendabala yokukwatela mo keshe omuhoko nosho yo okufikifa pamwe oukakwashikekookanhu melelo lopombada shaashi oPDM inai hala kutiwe ongudu yOvaherero,” Osho a ti ngaho.
Omundjadjukununi woikwapolitika Ndumba Kamwanyah okwa ti oshinima eshi shovaleli va shuna peenhele davo melelo osha nyika oshiponga keyokomesho longudu.
“Otashi dulu okuya moshipala eyambule po lelelo lipe, okweeta omatopauko mongudu nosho yo okunghundipaleka eholokepo longudu koilyo yayo nosho yo kovahoololi aveshe,” Osho a ti ngaho.
Kamwanyah okwa ti, opo ongudu yoPDM i ye komesho nawa monakwiiwa, oya pumbwa lela okulipaka mo mokukwatela po eyokomesho longudu nosho yo okunghonopaleka elundululo lelelo longudu.
Okwa ti otashi dulu okukala sha hala okutya ongudu kai na ehalo ile itai dulu okunghonopaleka ovaleli vape ovo tava dulu okweeta omalunduluko ape ile omadilaadilo.
“Otashi eta omalimbililo kombinga yondodo opo ongudu ya fikama mokuninga elunduluko mopolitika ndee tai shakeneke eemumbwe odo di li po nosho yo osho ovahoololi vayo va pumbwa,” Osho a ti ngaho.
Okwa weda po vali kutya oshinima eshi shokushuna peenhele melelo otashi dulika shi ete omalipulo kutya kapu na omalunduluko asha taa ka ningwa, opo ongudu ishona yovaleli oyo ashike tai ti pii mokuninga omatokolo mongudu.
“Eshi otashi dulika shi ete omalipulo kutya ovanhu inava hala okulinyenga nosho yo otashi dulu okuteya ovaleli ovo vape omukumo wokuya peemhito dopombada, shaashi otashi dulika va kale ve udite kutya ondjila yokuya pombada melelo oya patwa kwaavo va tota ongudu,” Osho a ti ngaho.
“Okulundulula elelo okwa pumbiwa opo ongudu i dule okuya komesho nawa,” Osho a ti ngaho.
Okwa ti oshinima eshi otashi dulu okweeta u kale u wete wa fa u li nawa ile to ningi nawa, opo ovaleli ovo va kala ko nokulela efimbo lile tava dulu okukala itava tale vali komaupyakadi ape nosho yo komikalo dipe odo tadi dulu okulundulula onghalo.
Venaani okwa ti ongudu oya ninga keshe osho tai dulu okuninga opo i kwashilipaleke omahoololo e li pauyuki novanyasha okwa li va tambulwa ko nawa.
“Ovanhu ova findana po eemhito odo molwomawi. Ovanyasha nave lihonge okumona eyambidido kovanhu ovo ve li moshoongalele,” Osho a ti ngaho.
Okwa ti ongudu oi hadi ovanyasha ve li peemhito da fimana sha ningwa opo ve li longekidile onakwiiwa.
Venaani okwa li a pewa oushima komalungula eshi a pula omutotiveta Winnie Moongo a ha kufe ombinga moupedu pelesidente wongudu. Venaani okwa li a hala Moongo opo a kondjife Van den Heever.
“Ongomuleli onda mona kutya, opo u kale mokapale pauyuki, pelesidente ina yambidida nande okandidate imwe, opo keshe umwe a kufe ombinga a manguluka nopauyuki, itava longifa nande edina lapelesidente,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
