Itatu dulu okumwenena oupyakadi wondjala – Mbumba

Pelesidente Nangolo Mbumba okwa ti eelopota domafyo omanyutu odo da pita omafiku aa otadi piyaaneke.

Pelesidente okwa li ta popi pepatululo ledimbuluko lefiku lomapendafule kOmuthiya Omaandaxa. Oshitufi eshi okwa li shi li koshi yoshipalanyole ‘Honouring Our Martyrs (Heroes and Heroines)’.

Mbumba okwa ti omuprima minista Saara Kuugongelwa-Amadhila okwa pakwilwa oshinakuwanifa shokutala nawa oshikumungu eshi nokukufa eenghatu da pumbiwa dokuvatela oshikukuta nosho yo onghalo yondjala moshilongo.

Okwa popya kutya Namibia okwa taalela onghalo yoshikukuta idjuu oyo ya kuma keshe oshitopolwa moshilongo.

“Itatu dulu okusheefa, itatu dulu okushihenuka. Molwoshinima osho, otu na okushitaalela atusheni,” Mbumba osho a ti ngaho.

Pelesidente okwa popya kombinga yoikulya yoshikukuta oyo epangelo hali yandje oshilongo ashishe.

“Ashike nee, onda mona eelopota tadi piyaaneke domafyo e na sha nomanyutu, unene ngaa mokati kounona moitopolwahoololo ya yooloka,” Osho a ti ngaho.

Oshivike sha dja ko oThe Namibian okwa li ya lopota kutya ovanhu ve li lwopo800 ova fya komanyutu moshitopolwahoololo shaMaheke okudja momudo 2022.

Oshitopolwahoololo natango osha didilika oibofa yomanyutu i li 30 219 moule weedula mbali odo tuu odo, ngoloneya wokOmaheke Pijoo Nganate osho a popya ngaho pefimbo kwa li ta yandje ouyelele waasho tashi li nyenge moshitopolwahoololo oshivike sha dja ko.

Natango okwa ti vali oibofa i li 14 774 ipe yomanyutu okwa li ya didilikwa okupitila molopota yoNutritional Assessment Counselling and Support yomudo 2022/2023.

Pelesidente Mbumba okwa popya vali kutya opu na omumbwe yomeendelelo yokutota eliko nosho yo eemhito doilonga dOvanamibia aveshe, unene ngaa ovanyasha.

“Onde shi popya oikando ihapu kutya natu endelele tu yambule po nokukulika eliko letu opo keshe omukwashiwana a mone omauwa,” Osho a ti ngaho.

Ngoloneya woshitopolwahoololo shaShikoto Penda ya Ndakolo eshi kwa li ta popi poshivilo opo tuu opo okwa twa ovakondjeli manguluko omukumo opo va shange owino wavo kombinga yekondjelo manguluko.

“Shangeni omambo opo mu yandje ondjokonona manga Kalunga ine ya ndee te tu kufa po. Ningeni oitufi ndee tamu lombwele ovanyasha osho sha ningilwe mekondjelo manguluko,” Osho a ti ngaho.

Ya Ndakolo natango okwa pula Ovanamibia opo va kale ve na oukumwe.

Pefimbo lokulesha eendjovo nokuninga elikano, omufitaongalo wongeleka onghwaluuteli yaNamibia Linekela Shikulo okwa lundila ovanhu ovo va dalwa konima oshilongo sha manguluka kutya kave na ohokwe yondjokonona.

“Vamwe inava hala va lombwelwe sha kombinga yondjokonona. Ova ti ondjokonona kai na oshilonga,” Osho a ti ngaho.

Shikulo okwa pula opo ondjokonona i fimanekwe noikwatelwe po.