Ongudu yedina South West Africa National Union (Swanu) otai pula kutotwe oveta yokuyandja ehandukilo lefyo kwaavo va monika ondjo moibofa yomadipayo nosho yo oibofa ikwao yoimbuluma i nyanyaleka.
Omuleli wongudu Evalistus Kaaronda onghela okwa lombwela oDesert Radio kutya okuyandja ehandukilo lefyo komunhu ou a dipaya mukwao oku li shimwe shomoinima oyo ongudu tai lalakanene ngee oya findana omahoololo nokuwete kutya otashi ka kala enyamukulo nekandulepo loimbuluma.
Omuhongi woshilongwa shi na sha noinima ya pamba oufemba womunhu koUniversity of Namibia John Nakuta, nande ongaho, okwa ti oshinima osho itashi dulu okuningwa moNamibia shaashi itashi popilwa koveta youfemba womunhu oyo i li mekotamhango.
“Okatendo koveta youfemba itaka dulu okulundululwa momukalo wokukufa po osho shi li po, shapo otaka dulu ashike okulundululwa pamukalo wokukaxwepopeka,” Osho a ti ngaho.
Nakuta okwa ti kapu na oveta oyo tai popile okuyandja ehandukilo ledipao kutya oshinima shi li nawa, ta weda po kutya hamhangu moNamibia ya yandje ehandukilo lefyo.
Kaaronda okwa ti ehandukilo lefyo olo ashike tali dulu okuxwepopeka oimbuluma.
“Ngee hasho, oto dipaya ashike omunhu, to tuminwa kodolongo, to i komesho nonghalamwenyo yoye, ndee to kala u na elineekelo kutya mutu efiku limwe oto ka dja mo,” Osho a ti ngaho.
Kaaronda okwa ti oshinima eshi kashi shi oshinima shishona shoo kashi shi oshikumungu shokupatanekwa pauhongelwe.
“Oshinima osho hashi kumu ovanhu moshilongo omu okudja muJanuali fiyo omuJuni ashike. Otu na eemwenyo dihapu dOvanamibia di li momake Ovanamibia vakwao,” Osho a ti ngaho.
Kaaronda okwa ti otashi longekidile Ovanamibia opo va kale ve shi oilanduli ngee va kufa omunhu omwenyo. Okwa yandja oshihopaenenwa shaBotswana, ta ti ondodo yomadipayo moBotswana oi li lwopunola.
Oludi lehandkilo eli moBotswana oli li paveta, nohali yandjwa unene koinima ya nyika omadipao. Okwa ti ondodo yomadipayo moSouth Africa naNamibia otai kumwifa neenghono.
Kaaronda okwa ti ekotamhango laNamibia paife ngaha inali tala naana kwaasho ovanhu va hala shi ningwe.
“Ekotamhango olo oli na okuya. Inali tu vatela sha,” Osho a ti ngaho, ta weda po vali kutya ekotamhango eli kali shi nande oshinima shaNamibia.
“Ekotamhango olo lihe na oshilonga, inali vatela sha, kali na oshilonga, ndee otu na okukala tu na ekotamhango olo tali tu kumwe noinima oyo tai linyenge,” Osho a ti ngaho. Omundjadjukununi woikwapolitika Rui Tyitende okwa ti oshixwepo omunhu a kale modolongo nande inava monika ondjo filufilu ponhele yokufikila ashike va dipawa.
“Ongudu oyo tai lele, oilyo yopaliamente, ihapu, vamwe ngaa vomuvo, okwa li ve li oilyo yomutumba wokutota eeveta oo kwa li wa tota ekotamhango laNamibia ashike okwa li vaanya kutya kapu nande ehandukilo lefyo tali ka ningwa moNamibia molwowino wavo kombinga yepangelo lokatongotongo,” Tyitende osho a ti ngaho.
Okwa ti Kaaronda ponhele yokukala a hala oinima oyo shixwepo a tale komaupyakadi eliko loshilongo: okuhena oilonga, okuhafikapamwe nosho yo oluhepo.
“Oyo oyo oinima ei hai fininike ovanyasha va ye va ka longe oimbuluma,” Osho a ti ngaho.
Tyitende okwa ti shama ashike oinima ei ya ungaungwa nayo, ehalo lokuninga oimbuluma oli na okushuna pedu.
“Ngeno okwa li taku ningwa omahoololo nena kombinga yoshinima eshi, kandi wete ngee Ovanamibia vahapu otave shi yambidida,” Osho a ti ngaho.
“Ngee owa tale koSwanu ongongudu yopolitika, okudja ngaa momudo 1990, ova kala ashike nokumona oshipundi shimwe okudja ngaa nghee oshilongo sha mangulukile, onghee nee nande okwa li va hala okulundulula ekotamhango, eyambidido okudja keengudu dimwe dopolitika itali kala po,” Osho a ti ngaho.
Tyitende, nande ongaho, okwa ti oshilongo inashi tala eisho lomupofi koushili ou u li po kutya oimbuluma oi li pombada moshilongo.
“Ohatu longo noshinima osho ngahelipi, otwa pumbwa okupula epulo kombinga yomulandu wepangelo,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
